Kibayã pipi sebre 21:1-30
21 A Sʋɩtãan* yikame n na n maan Israyɛll nebã wẽnga, n pirs a Davɩɩd t’a sõd Israyɛll nebã.+
2 Dẽ, a Davɩɩd yeela a Zowaab+ ne tãb-biisã nanambsã yaa: “Kẽng-y n tɩ sõd-y Israyɛll nebã sẽn sɩng ne Dan+ n tãag Bɛɛr-seba, n wa togs-m b sõorã tɩ m bãnge.”
3 La a Zowaab leokame yaa: “Bɩ a Zeova paas a nin-buiidã sõor naoor koabga! M zu-soab la m dĩma, bãmb fãa pa zoe n yaa yãmb tʋm-tʋmdb sɩda? Bõe yĩng tɩ m zu-soab la m dĩmã rat n maan bũmb a woto? Bõe tɩ yãmb na n kɩt tɩ Israyɛll paam taale?”
4 La rĩmã pa kelg a Zowaab ye. Dẽ, a Zowaab yiime n saag Israyɛlle, la rẽ poore, a lebg n waa Zerizalɛm.+
5 A Zowaab togsa a Davɩɩd nin-buiidã b sẽn sõdã sõor zãnga. Israyɛll fãa yɩɩ tãb-biis milyõ la tus-koabg sẽn bobd sʋʋse, tɩ Zida yɩ tãb-biis tus-kobs-naas la pis-yopoe sẽn bobd sʋʋse.+
6 La b pa sõd Levi ne Bẽnzame buudã neb n naag ye.+ Bala rĩmã goamã pa tol n yɩ a Zowaab noog ye.+
7 Bõn-kãngã pa yɩ Wẽnnaam noog baa bilfu, t’a yãk yam n na n sɩbg Israyɛlle.
8 Dẽ, a Davɩɩd yeela Wẽnnaam yaa: “Mam sẽn maan bõn-kãnga wã, mam beega+ wʋsgo. La masã, m bõos tɩ y kõ y tʋm-tʋmdã sugr a beegrã yĩnga.+ Bala mam maana yalemd meng-menga.”+
9 A Zeova goma ne a Gaad+ sẽn yaa a Davɩɩd bãngdã* n yeele:
10 “Kẽng n tɩ yeel a Davɩɩd yaa: ‘Ad a Zeova sẽn yeele: “Mam na n wilga foo bũmb a tãabo. Yãk fo sẽn dat a soab tɩ m maan-fo.”’”
11 Dẽ, a Gaad kẽnga a Davɩɩd nengẽ n tɩ yeel-a yaa: “Ad a Zeova sẽn yeele: ‘Yãk-y yãmb sẽn dat a soaba.
12 Yãmb datame tɩ yʋʋm a tãab kom+ kẽ y soolmã pʋgẽ bɩ, bɩ y ratame tɩ y bɛɛbã tõog yãmb n kʋ-y ne sʋʋg kiis a tãabo?+ Wall y ratame t’a Zeova sʋʋgã, rat n yeel tɩ bã-loangdg kẽ soolmã pʋgẽ,+ t’a Zeova malɛkã wa ne sãoong+ Israyɛll soolmã fãa pʋgẽ rasem a tãabo?’ Tags-y neer n yãk m sẽn segd n tɩ leok sẽn tʋm-a maamã bũmb ninga.”
13 A Davɩɩd leoka a Gaad yaa: “Yellã namsda maam wʋsgo. M kotame tɩ y bas tɩ m lʋɩ a Zeova nugẽ, t’a nimbãan-zoeerã yaa wʋsgo,+ la m da lʋɩ ninsaal nugẽ ye.”+
14 Dẽ, a Zeova kɩtame tɩ bã-loangdg+ kẽ Israyɛll tɩ neb tus-pis-yopoe ki.+
15 Sẽn paase, Wẽnnaam tʋma malɛk t’a na n tɩ sãam Zerizalɛm, la a sẽn wa n dat n sãam-a wã, a Zeova yãame la a sũur sãama* ne yel-beedã,+ t’a yeel malɛkã sẽn wat ne sãoongã yaa: “Sekame!+ Sik f nug masã.” A Zeova malɛkã ra yasa Zebuus rao+ a Ornan+ zɛɛgã noore.
16 A Davɩɩd sẽn zẽk a nenga, a yãa a Zeova malɛkã sẽn be tẽngã ne saasã sʋka, n zãad sʋʋg sẽn wõog+ t’a nugã tees Zerizalɛm. Zĩig pʋgẽ, a Davɩɩd ne kãsem-dãmbã sẽn yer botã+ lʋɩɩme n fõgen b nens tẽnga.+
17 A Davɩɩd yeela Wẽnnaam yaa: “Pa maam n yeel tɩ b sõd nin-buiidã sɩda? Yaa maam n beege. Maam n maan yel-wẽndã.+ La nin-kãensã* maana bõe? Mam Wẽnnaam a Zeova, mam kotame tɩ y sɩbg maam ne m ba wã roog rãmba, la y ra kɩt tɩ bã-loangdgã yõk y nin-buiidã ye.”+
18 A Zeova malɛkã yeela a Gaad+ t’a togs a Davɩɩd t’a yik n tɩ me tẽn-kugr Zebuus rao a Ornan zɛɛgẽ wã a Zeova yĩnga.+
19 A Davɩɩd saka a Gaad goamã a sẽn togs a Zeova yʋʋr yĩngã, n yik n kẽnge.
20 Wakat kãng t’a Ornan ra pãbda bɩle. Yẽ wẽnemdame n yã malɛkã, la a kom-dibli a naasã sẽn da be ne-a wã zoe n solgame.
21 A Davɩɩd kẽnga a Ornan nengẽ, t’a Ornan zẽk a neng n yã a Davɩɩd. Tao-tao bala, a yii zɛɛgẽ wã n tɩ wõgemd a Davɩɩd taoore, n fõgen a neng tẽnga.
22 A Davɩɩd yeela a Ornan yaa: “Koos f zɛɛgã ne maam* tɩ m me tẽn-kugr a Zeova yĩnga. Koos-a ne maam wa sẽn zems a ligdi, sẽn na yɩl tɩ bã-loangdgã sẽn kʋʋd nin-buiidã sa.”+
23 La a Ornan yeela a Davɩɩd yaa: “Reeg-y zɛɛgã n sooge, la bɩ m zu-soab la m dĩmã maan sẽn yaa sõma ne-a. Ad niisã sẽn na n maan maoong sẽn yõogd bugmã, n paas zɛɛgã ra-vuudsã+ sẽn na n yõgen bugmã, la bɩle wã sẽn na n maan kood biis kũunã. Mam kõta yãmb bõn-kãensã fãa.”
24 La rĩm a Davɩɩd leoka a Ornan yaa: “Ayo. Mam na n da-a-la wa sẽn zems a ligdã. Bala mam pa na n deeg fo bũmb n kõ a Zeova wall m maan maoong sẽn yõogd bugum ne zaalem bũmb ye.”+
25 Woto, a Davɩɩd daa a Ornan zɛɛgã sãnem zɩslem sẽn zems sɩkl* kobs-yoobe.
26 A Davɩɩd mee tẽn-kugr+ be a Zeova yĩnga, n maan maand sẽn yõogd bugum ne zems-n-taar maando. A pʋʋsa* a Zeova t’a leok a pʋʋsgã, n kɩt tɩ bugum+ yi saasẽ n wa rɩ maandã sẽn da be maoong sẽn yõogd bugum tẽn-kugrã zugã.
27 Rẽ poore, a Zeova yeela malɛkã+ t’a lebs sʋʋgã a wʋʋgẽ.
28 Wakat kãnga, a Davɩɩd sẽn yã t’a Zeova leoka a pʋʋsgã Zebuus rao a Ornan zɛɛgẽ wã, yẽ kell n da maanda maand be.
29 La a Zeova sɛk-roogã a Moyiiz sẽn da tilg we-raoogẽ wã, ne maoong sẽn yõogd bugum tẽn-kugrã ra bee Gabawõ zĩ-zãntgẽ*+ wã wakat kãnga.
30 La a Davɩɩd pa tõog n kẽng be n tɩ sok Wẽnnaam ye. Bala yẽ ra yɛɛsa wʋsg a Zeova malɛkã yĩnga.
Vẽnegr toor-toore
^ Pa rẽ bɩ, “Kɩɩsdã.”
^ Yaa ned sẽn taasd a taab bũmb nins Wẽnnaam sẽn vẽneg-a t’a yã.
^ Bɩ, “maana a bãngẽ.”
^ Ebre, “pe-kãensã.”
^ Ebre, “Kõ maam f zɛɛgã.”
^ Sɩkl zemsa garam 11,4. Ges-y vẽnegr ning sẽn yaa B14.
^ Ebre, “boola.”
^ Ges-y gom-biis võor bilgrã zĩigẽ.
