Kibayã pipi sebre 27:1-34
-
Rĩmã tʋm-tʋmdbã taoor dãmba (1-34)
27 Ad Israyɛll nebã sul toɛy-toɛyã sẽn da yaa rĩmã tãb-biisã. Sul-kãensã pʋsẽ, buud rot taoor dãmba, tãb-biis tusr-tusr nanambse, ne tãb-biis koabg-koabg nanambs+ la nanambs sẽn da get sul-kãensã fãa yell+ n da be. Sulã ra tʋmd n deesda taab kiuug-kiuug yʋʋmdã pʋgẽ. Sull fãa ra yaa rap tus-pisi la a naase.
2 A Zabdiyɛll biig a Yasobeyam+ n da get pipi sullã sẽn da segd n tʋm pipi kiuugã yelle. Neb tus-pisi la a naas n da be a sullã pʋgẽ.
3 A Perɛɛz+ kom-dibli wã sʋka, a Yasobeyam n da yaa sull toɛy-toɛyã sẽn da segd n tʋm pipi kiuugã nanambsã fãa taoor soaba.
4 Ahoyi buudã ned+ a Dodo+ n da get sull a yiib-n-soabã sẽn da segd n tʋm kiuug a yiib-n-soabã yelle, t’a Miklot ra yaa taoor soaba. Neb tus-pisi la a naas n da be a sullã pʋgẽ.
5 Sull a tãab-n-soabã sẽn da segd n tʋm kiuug a tãab-n-soabã naab yaa maan-kʋʋdb taoor soab a Zehoyada+ biig a Benaya.+ Neb tus-pisi la a naas n da be a sullã pʋgẽ.
6 A Benaya ra yaa gãndaad pis-tã wã nin-yende, la yẽ n da yaa b taoor soaba. A biig a Amizabaad yɩɩ a sullã taoor soaba.
7 Sull a naas-n-soabã sẽn da segd n tʋm kiuug a naas-n-soabã naab yɩɩ a Zowaab ba-biig+ a Asayɛlle.+ Yẽ loogr poore, a biig a Zebadiya n ledg-a. Neb tus-pisi la a naas n da be a sullã pʋgẽ.
8 Sull a nu soabã sẽn da segd n tʋm kiuug a nu soabã naab yɩɩ Izraya rao a Samut. Neb tus-pisi la a naas n da be a sullã pʋgẽ.
9 Sull a yoob-n-soabã sẽn da segd n tʋm kiuug a yoob-n-soabã naab yɩɩ Tekowa rao+ a Ikɛs biig a Ira.+ Neb tus-pisi la a naas n da be a sullã pʋgẽ.
10 Sull a yopoe-n-soabã sẽn da segd n tʋm kiuug a yopoe-n-soabã naab yɩɩ Pelõ rao a Helɛɛz+ sẽn yaa a Efrayim yagengã. Neb tus-pisi la a naas n da be a sullã pʋgẽ.
11 Sull a nii-n-soabã sẽn da segd n tʋm kiuug a nii soabã naab yɩɩ Husa rao a Sibekayi+ sẽn yaa a Zeera yagengã.+ Neb tus-pisi la a naas n da be a sullã pʋgẽ.
12 Sull a wɛ soabã sẽn da segd n tʋm kiuug a wɛ soabã naab yɩɩ Anatot rao+ a Abiyezɛɛr+ sẽn yaa a Bẽnzame yagengã. Neb tus-pisi la a naas n da be a sullã pʋgẽ.
13 Sull piig soabã sẽn da segd n tʋm kiuug piig soabã naab yɩɩ Netofa rao a Maharayi+ sẽn yaa a Zeera yagengã.+ Neb tus-pisi la a naas n da be a sullã pʋgẽ.
14 Sull piig la a ye soabã sẽn da segd n tʋm kiuug piig la a ye soabã naab yɩɩ Piraton rao a Benaya+ sẽn yaa a Efrayim yagengã. Neb tus-pisi la a naas n da be a sullã pʋgẽ.
15 Sull piig la a yiib-n-soabã sẽn da segd n tʋm kiuug piig la a yiib-n-soabã naab yɩɩ Netofa rao a Hɛldayi sẽn yaa a Otniyɛll yagengã. Neb tus-pisi la a naas n da be a sullã pʋgẽ.
16 Ad Israyɛll buud toɛy-toɛyã nanambse: Rubɛn buudã sʋka, a Zikri biig a Eliyezɛɛr n da yaa taoor soaba. Sɩmeyõ buudã sʋka, yɩɩ a Maaka biig a Sefatiya.
17 Levi buudã sʋka, yɩɩ a Hasabiya biig a Kemuwɛll. A Aarõ yagensã sʋka, yɩɩ a Zadok.
18 Zida buudã sʋka, yɩɩ a Elihu+ sẽn da yaa a Davɩɩd ba-biigã. Isakaar buudã sʋka, yɩɩ a Mikayɛll biig a Omri.
19 Zabulõ buudã sʋka, yɩɩ a Abdiyaas biig a Ismaya. Naftali buudã sʋka, yɩɩ a Azriyɛll biig a Yerimot.
20 Efrayim buudã sʋka, yɩɩ a Azaziya biig a Ooze. A Manase buudã pʋɩ-sʋkã sʋka, yɩɩ a Pedaya biig a Zowɛll.
21 Manase buudã pʋɩ-sʋkã sẽn be Galaadã sʋka, yɩɩ a Zakari biig a Ido. Bẽnzame buudã sʋka, yɩɩ a Abneer+ biig a Yaaziyɛll.
22 Dan buudã sʋka, yɩɩ a Zerowam biig a Azareyɛll. Nin-kãensã n yɩ Israyɛll buud toɛy-toɛyã nanambse.
23 A Davɩɩd pa sõd neb nins sẽn da tar yʋʋm pisi bɩ sẽn pa ta rẽ wã ye. Bala a Zeova ra pʋlmame t’a na n kɩtame tɩ Israyɛll nebã yɩ wʋsg wa ãdsã sẽn be saasẽ wã.+
24 A Seruya biig a Zowaab ra sɩnga nebã sõdbo, la a pa baas ye. Wẽnnaam sũur puuga ne Israyɛlle, sõdbã yĩnga,+ la b pa gʋls nebã sõor rĩm a Davɩɩd kibayã sebr pʋgẽ ye.
25 A Adiyɛll biig a Azmavɛt n da get rĩmã laog bĩngr zĩisã+ yelle. A Ozɩyas biig a Zonatã n da get teedã* bĩngr dot nins sẽn be wetẽ wã, tẽn-bɛdẽ wã, tẽn-bõonesẽ wã la gasdã pʋsẽ.
26 A Keluub biig a Ezri n da get tʋm-tʋmdb nins sẽn koodã yelle.
27 Rama rao a Simeyi n da get viyn pʋtã yelle. Sefam rao a Zabdi n da get divẽ wã bĩngr zĩig yelle.
28 Gedɛɛr rao a Baal-hanaan n da get oliiv pʋtã ne wom-seesã*+ sẽn be Sefela wã+ yelle. A Zowaas n da get kaamã bĩngr zĩig yelle.
29 Saarõ rao a Sitarayi n da get niisã sẽn be Saarõ+ rũms wãbneg zĩisẽ wã yelle, t’a Adlayi biig a Safat da get niisã sẽn be tẽn-nabrẽ wã yelle.
30 Ismayɛll buudã ned a Obill n da get yʋgma wã yelle. Meronot rao a Yedeya n da get bõensã* yelle.
31 Hagaar ned a Yaziiz n da get piisã ne bʋʋsã yelle. Nin-kãensã fãa n da yaa nanambs nins sẽn get a Davɩɩd sẽn so wã yelle.
32 A Davɩɩd kẽem biig a Zonatã+ ra yaa sagenda, ned sẽn tar bãngre, la seb-gʋlsda. A Hakmoni biig a Yeyiyɛll n da get rĩmã kom-dibli wã yelle.+
33 A Ahitofɛll+ ra yaa rĩmã sagenda, tɩ Ark rao a Husayi+ ra yaa rĩmã zoa.*
34 A Ahitofɛll loogr poore, a Benaya+ biig a Zehoyada ne a Abiyataar+ n ledg-a. A Zowaab+ n da yaa tãb-biisã naaba.
Vẽnegr toor-toore
^ Bɩ, “laogã.”
^ Yaa tɩɩg sẽn wõnd kankanga.
^ Ebre, “bõn-yãansã.”
^ Bɩ, “sagenda.”