Kibayã pipi sebre 29:1-30
29 Rĩm a Davɩɩd yeela nin-buiidã fãa yaa: “Mam biig a Salomo, Wẽnnaam sẽn yãk a soabã+ nan yaa yãag n pa mi bũmbu,+ tɩ tʋʋmdã yaool n yaa kãsenga. Bala roogã pa ninsaal roog ye. Yaa Wẽnnaam a Zeova roogo.+
2 La mam modga ne m pãng fãa n segl bũmb toor-toor mam Wẽnnaamã roog yĩnga. Yaa sãnem, sãnem tʋʋmã yĩnga, wanzuri, wanzuri tʋʋmã yĩnga, zũudu, zũud tʋʋmã yĩnga, kutu, kut tʋʋmã yĩnga,+ raado,+ raad tʋʋmã yĩnga, onigs kuga, kug b sẽn na n tall tãn-maas n tablg b taaba, kug-bõones sẽn tar kõbg buud toor-toore, kug-neeb buud fãa, la albatr kug wʋsgo.
3 Sẽn paase, mam sẽn nong mam Wẽnnaamã roogã+ yĩnga, mam dɩkda m meng paoong+ sẽn yaa sãnem ne wanzuri n na n kõ mam Wẽnnaamã roog yĩnga, n paas bũmb nins fãa mam sẽn segl ro-sõngã yĩnga:
4 Yaa Ofɩɩr sãnem+ talã* tus a tãabo, wanzuri b sẽn yɩlg talã tus a yopoe, sẽn na yɩl n bol rotã lalse,
5 sãnem, sãnem tʋʋmã yĩnga, wanzuri, wanzuri tʋʋmã yĩnga, la tʋʋmd ning fãa nug-tʋʋm dãmbã sẽn segd n tʋmã yĩnga. La masã, ãnd n tar kũun n na n kolg n kõ a Zeova ne yamleoogo?”+
6 Dẽ, buudã rot taoor dãmba, Israyɛll buud toɛy-toɛyã nanambsã, tãb-biis tusr-tusr nanambsã,+ ne tãb-biis koabg-koabg nanambsã, la nanambs nins sẽn get rĩmã yɛlã+ kolga ne yamleoogo.
7 Ad bãmb sẽn kõ bũmb nins Wẽnnaam doogã tʋʋmd yĩnga: Yaa sãnem talã tus a nu, darik* tus-piiga, wanzuri talã tus-piiga, ne zũud talã tus-piig la a nii, la kut talã tus-koabga.
8 Ned ning fãa sẽn da tar kug-neeb rɩkame n kõ tɩ b ning a Zeova roogã laog bĩngr zĩigẽ. Yaa a Gɛrson yageng+ a Yeyiyɛll+ n da get rẽ yelle.
9 Nin-buiidã kɩdma sũ-noog b sẽn kõ kũunã ne yamleoogã yĩnga. Bala yaa ne b sũy fãa la b kõ a Zeova kũunã.+ Rĩm a Davɩɩd me kɩdma sũ-noog wʋsgo.
10 A Davɩɩd pẽga a Zeova nin-buiidã fãa taoore. Yẽ yeelame yaa: “Bɩ yãmb a Zeova sẽn yaa tõnd ba a Israyɛll Wẽnnaamã paam pẽgr wakat fãa yĩnga.*
11 Zeova, yãmb yaa kãseng+ n tar pãnga,+ la yãmb n so neerem la naam.+ Bala bũmb ning fãa sẽn be saasẽ la tẽngã zugã yaa yãmb n so.+ Zeova, yãmb n so rĩungã.+ Yãmb n zẽk n yɩɩd bũmb fãa.
12 Arzɛk ne ziir yita yãmb nengẽ,+ la yãmb rɩta naam bũmb fãa zugu.+ Pãng bee yãmb nugẽ,+ la yãmb nugã n tõe n kɩt tɩ ned lebg kãsenga,+ la a kõ bũmb fãa pãnga.+
13 La masã, tõnd Wẽnnaam! Tõnd pʋʋsda yãmb barka, la d pẽgd yãmb yʋʋrã sẽn tar ziirã.
14 “La mam yaa ãnda, mam nin-buiidã me yaa ãnd rãmb n tõe n kõ kũunã a woto ne yamleoogo? Bala bũmb fãa yita yãmb nengẽ, la bũmb nins tõnd sẽn kõ yãmbã yaa yãmb n kõ tõndo.
15 Tõnd yaa sãamb yãmb taoore, wa tõnd yaab-rãmbã fãa.+ Bala tõnd rayã yaa wa sulunsuka,+ tɩ tẽeb kae ye.
16 Tõnd Wẽnnaam a Zeova, arzɛg-kãngã fãa d sẽn segl n na n me roog yãmb yʋ-sõngã yĩngã yaa yãmb n kõ, la bõn-kãens fãa yaa yãmb n so.
17 Mam Wẽnnaam, mam miime tɩ yãmb feesda sũuri,+ la tɩ yãmb nonga burkĩndlem.+ Yaa ne pʋ-peelem* la mam kõ bõn-kãensã fãa ne yamleoogo, la mam sũur yaa noog wʋsgo, m sẽn ne tɩ yãmb nin-buiidã sẽn be ka wã kõt yãmb kũun ne yamleoogã.
18 Zeova, tõnd yaab-rãmb a Abrahaam ne a Izaak la a Israyɛll Wẽnnaam, sõng-y y nin-buiidã tɩ b kell n tall yam-sõng a woto b sũyã pʋsẽ wakat fãa, la y sõng-b tɩ b sak yãmb ne b sũy fãa.+
19 Sõng-y m biig a Salomo t’a tũ yãmb ne a sũur fãa,+ n sak yãmb noyã,+ y saglsã la y tõodã, n tõog n maan bõn-kãensã fãa, la a me wẽnd-doog ning yĩng mam sẽn segl bũmb toor-toorã.”+
20 Rẽ poore, a Davɩɩd yeela nin-buiidã fãa yaa: “Masã, bɩ y pẽg y Wẽnnaam a Zeova.” La nin-buiidã fãa pẽga b yaab-rãmbã Wẽnnaam a Zeova, n sulg n wõgemd a Zeova taoore, la rĩmã taoore.
21 La bãmb kell n maana maand n kõ a Zeova, la b kõ a Zeova maand sẽn yõogd bugum+ vẽkembeoogã: Yaa lol-poal tusri, pe-raad tusri, pe-bi tusri, ne b divẽ kũunã.+ Bãmb maana maand wʋsg Israyɛll nebã fãa yĩnga.+
22 Bãmb kell n dɩɩme la b yũ a Zeova taoor baraar ne kɩdengo,+ la bãmb le kõo a Davɩɩd biig a Salomo naamã, n zae-a* a Zeova taoor t’a lebg naaba,+ la b yãk a Zadok t’a lebg maan-kʋʋda.+
23 Woto, a Salomo zĩnda a Zeova geerã zugu,+ n ledg a ba a Davɩɩd n lebg rĩma. Yẽ paama tõogre, la Israyɛll nebã fãa ra sakd-a lame.
24 Nanambsã fãa,+ ne gãndaadã,+ la rĩm a Davɩɩd kom-dibli+ wã fãa saka rĩm a Salomo.
25 A Zeova kɩtame t’a Salomo lebg kãseng wʋsg Israyɛll nebã fãa nifẽ, la a kõ-a-la naam ziir Israyɛll rĩm baa a ye sẽn deng yẽ sẽn zɩ n paame.+
26 Woto, a Zese* biig a Davɩɩd rɩɩ naam Israyɛll fãa zugu.
27 A rɩɩ naam Israyɛll yʋʋm pis-naase. Yẽ rɩɩ naam yʋʋm a yopoe Ebrõ,+ la yʋʋm pis-tã la a tã Zerizalɛm.+
28 A vɩɩmdame n kaoos n yaool n ki.+ Yẽ tɩga raya, arzɛgs la ziiri. A biig a Salomo n ledg-a n lebg rĩma.+
29 B gʋlsa rĩm a Davɩɩd vɩɩmã kibarã, a sɩngrã n tãag a saabã, gɛt a Sãmwɛll ne no-rɛɛs a Natã+ la bãngd* a Gaad+ sɛbã pʋsẽ,
30 ne a naamã fãa, a pãngã, la bũmb nins fãa sẽn paam yẽ ne Israyɛll nebã la soolem nins fãa sẽn gũbg-a wã.
Vẽnegr toor-toore
^ Talã zemsa kɩlo 34,2. Ges-y vẽnegr ning sẽn yaa B14.
^ Darik ra yaa Pɛrs nebã sãnem ligd-koɛɛnga. Ges-y vẽnegr ning sẽn yaa B14.
^ Bɩ, “zãmaan woo zãmaana.”
^ Bɩ, “sũur sẽn yaa tɩrg.”
^ Ges-y gom-biis võor bilgrã zĩigẽ.
^ Ezayi.
^ Yaa ned sẽn taasd a taab bũmb nins Wẽnnaam sẽn vẽneg-a t’a yã.
