Sãmwɛll sebr a yiib-n-soaba 1:1-27
1 Ad bũmb ning sẽn maan a Sayull kũumã poore. A Davɩɩd ra tɩ tõoga* Amalɛk nebã n lebg n wa. Yaa rasem a yiib la woto a sẽn lebg n wa Ziklaagã.+
2 Rasem a tãab-n-soabã daare, ned n yi a Sayull sikã zĩigẽ n zoe n wa a Davɩɩd nengẽ. A futã ra pãrsame t’a zugã yaa tom. A kolga a Davɩɩd n wõgemd a taoor n fõgen a neng tẽnga.
3 A Davɩɩd sok-a lame yaa: “Fo yii yɛ?” T’a leoke: “Mam yii Israyɛll sikã zĩigẽ n zoe n põse.”
4 T’a Davɩɩd le yeel-a yaa: “Maana wãna? M kotame tɩ f togs-ma.” T’a leoke: “Nin-buiidã zoee zabrẽ wã, la neb wʋsg kiime. A Sayull ne a biig a Zonatã meng kiime.”+
5 Rẽ la a Davɩɩd sok bi-bɩɩgã sẽn wa n taas-a koɛɛgã yaa: “Fo maana wãn n bãng t’a Sayull ne a biig a Zonatã kiime?”
6 Tɩ bi-bɩɩgã leoke: “Mam da wa n bee Gilbowa tãngã zugu,+ n yã a Sayull sẽn tik a kãndã, tɩ saar-dãmbã* ne wed-rʋʋdbã zoet n pẽnegd-a.+
7 Yẽ sẽn wẽnemd n yã maamã, a boola maam tɩ mam leoke: ‘N-na, ad maam!’
8 A Sayull soka maam tɩ mam yaa ãnda? Tɩ mam leok tɩ m yaa Amalɛk neda.+
9 Dẽ, a yeelame: ‘M kotame tɩ f kolg n baas-ma, bala mam namsda wʋsgo, la m ket n nan pa ki ye.’
10 Woto, mam kolgame n kʋ-a,+ bala mam da miime t’a sẽn pogl n gãe tẽngã, a pa na n põs ye. Rẽ poore, mam rɩka maanfã sẽn da be a zugẽ wã, la zũurã sẽn be a nugẽ wã n tall n wa n na n kõ m zu-soabã.”
11 A Davɩɩd sẽn wʋm dẽ, a gãda a futã n pãrse, la rap nins fãa sẽn da be ne yẽ wã me maana woto.
12 Bãmb yãbame n wiis la b loe noor+ n tãag zaabre, a Sayull ne a biig a Zonatã yĩnga, la a Zeova nin-buiidã ne Israyɛll buudã yĩnga.+ Bala b ra kʋʋ bãmb ne sʋʋga.
13 A Davɩɩd soka bi-bɩɩgã sẽn wa n taas-a koɛɛgã yaa: “Fo yita yɛ?” T’a leok t’a yaa sãana, n yaa Amalɛk ned biiga.
14 T’a Davɩɩd yeel-a yaa: “Bõe yĩng tɩ fo pa zoe rabeem, n sak n kʋ ned ning a Zeova sẽn yãkã?”*+
15 Zĩig pʋgẽ, a Davɩɩd boola bi-bɩɩg a yembr n yeele: “Kolg n kʋ-a.” La bi-bɩɩgã kʋ-a lame.+
16 A Davɩɩd yeel-a lame yaa: “Fo zɩɩmã raagr taal bee fo zugu. Bala fo mengã n yaag f noor n yeel tɩ foo n kʋ ned ning a Zeova sẽn yãkã.”+
17 Rẽ poore, a Davɩɩd yɩɩla sũ-sãang yɩɩll* a Sayull ne a biig a Zonatã yĩnga,+
18 n yeel tɩ b segd n zãmsa Zida buudã nebã yɩɩn-kãnga. A gom-zugã yaa: “Tãpã.” B gʋls-a-la Zasaar sebrã pʋgẽ:+
19 “Israyɛll neba, sẽn da yaa-b yãmb ziirã kii yãmb zĩ-zãntsẽ wã.+
Ges-y yãmb gãndaadã sẽn ki to-to zabrẽ wã!
20 Ra n gom-y rẽ yell Gat ye.+Ra n moon-y rẽ Askelon soayã zut ye.Sã n pa rẽ, Filisti kom-pugli wã na n kɩdma sũ-noogo.Sã n pa rẽ, neb nins sẽn pa kẽ bãongã kom-pugli wã na n kaasa ne sũ-noogo.
21 Gilbowa tãense!+Bɩ meenem wall saag ra sig yãmb zug ye.Bɩ y pʋtã ra wom biis b sẽn tõe n kõ Wẽnnaam ye.+Bala yãmb zut la gãndaadã gãnd paam paoogre.B pa na n le zae a Sayull gãongã ne kaam ye.
22 A Zonatã tãpã ne a Sayull sʋʋgãzɩ n leb b wʋʋgẽ+ n pa raag zɩɩm, la b kõs gãndaad kaam ye.Bãmb zɩ n lebg n kuil zaalem ye.+
23 A Sayull ne a Zonatã+ yɩɩ neb Israyɛll nebã sẽn da nong la b sẽn da nande.La baa kũum pa welg-b ye.+
Bãmb ra tʋʋlame n yɩɩd sɩlse,+la b ra yaa gãndaad n yɩɩd gɩgma.+
24 Israyɛll kom-pugli, yãb-y-yã a Sayulli,a soab ning sẽn da yeelgd yãmb fu-miid la fan-teedã,a soab ning sẽn da nagsd yãmb futã ne sãnemã.
25 Ges-y yãmb gãndaadã sẽn ki to-to zabrẽ wã!
B kʋʋ a Zonatã yãmb zĩ-zãntsẽ wã!+
26 M sũur sãama wʋsg fo poorẽ, m ba-biig a Zonatã.Mam da nonga foo wʋsgo.+
Fo sẽn da nong maam to-to wã yɩɩda pagbã nonglem.+
27 Ges-y yãmb gãndaadã sẽn ki to-to zabrẽ wã,la zab-teedã sẽn sãam to-to!”
Vẽnegr toor-toore
^ Bɩ, “kʋʋ.”
^ Yaa bũmb sẽn wõnd sarɛt tɩ wed-moos tatẽ.
^ Ebre, “zaeyã.” Ges-y gom-biis võor bilgrã zĩigẽ.
^ Bɩ, “kʋʋr yɩɩll.”
