Bʋ-kaoodbã sebre 2:1-23
2 A Zeova malɛkã+ yii Gilgall+ n kẽng Bokim n tɩ yeel Israyɛll nebã yaa: “Mam yiisa yãmb Ezɩpt n tall n tɩ kẽes tẽng ning mam sẽn da wẽen tɩ m na n kõo y yaab-rãmbã pʋgẽ.+ Sẽn paase, mam yeelame: ‘Mam pa na n tol n sãam kaool ning mam sẽn maan ne yãmbã ye.+
2 La yãmb me pa segd n maan kaool ne tẽn-kãngã nebã ye.+ Y segd n sãama bãmb tẽn-kugã.’+ La yãmb pa kelg maam ye.+ Bõe yĩng tɩ y maan woto?
3 Rẽ n so tɩ mam yeele: ‘Mam pa na n dig-b yãmb taoor ye.+ Bãmb na n yɩɩ bẽdg yãmb yĩnga,+ la b wẽnnaam-dãmbã na n kẽesa yãmb moogo.’”+
4 A Zeova malɛkã sẽn togs Israyɛll nebã gom-kãensa wã poore, nin-buiidã fãa zẽka b koees n yãbe.
5 Dẽ, bãmb pʋda zĩ-kãng yʋʋr tɩ Bokim,* la b maana maand be n kõ a Zeova.
6 A Zozuwe sẽn kuils nin-buiidã, Israyɛll ned fãa leba a pʋɩɩrẽ n tɩ zĩnd a soolmẽ.+
7 Israyɛll nebã kell n tũu a Zeova a Zozuwe vɩɩmã tõre, la kãsem-dãmb nins a sẽn ki n basã vɩɩmã tõre. Kãsem-dãmb-kãens ra yãa bõn-kãsems nins fãa a Zeova sẽn maan Israyɛll nebã neer yĩngã.+
8 Dẽ, a Nun biig a Zozuwe sẽn yaa a Zeova tʋm-tʋmdã kiime. A yʋʋm da yaa koabg la piiga.+
9 Bãmb mum-a-la a tẽngẽ wã Timnat-herɛs+ sẽn be Efrayim soolmã zĩig ning sẽn yaa tãensã, Gaas tãngã nug-rɩtgo.+
10 Zãmaan-kãng nebã fãa kiime, tɩ zãmaan a to pʋgle. Zãmaan-kãng pa bãng a Zeova bɩ bũmb nins a sẽn maan Israyɛll nebã yĩngã ye.
11 Woto, Israyɛll nebã maana sẽn yaa wẽng a Zeova nifẽ. B pʋʋsa* Baal-dãmbã.+
12 Bãmb basa b ba-rãmbã Wẽnnaam a Zeova sẽn yiis bãmb Ezɩptã.+ B tũu wẽnnaam-dãmb a taaba, bu-zẽmsã sẽn da gũbg bãmbã wẽnnaam-dãmba.+ La bãmb wõgemda b taoor n beeg a Zeova.+
13 B basa a Zeova n pʋʋs a Baal ne a Astarte bõn-naandse.+
14 Dẽ, a Zeova sũur puuga ne Israyɛll nebã hal wʋsgo, t’a bas-b fãadb nusẽ tɩ b fã-ba.+ Yẽ ning-b-la* b bɛɛbã sẽn gũbg-bã nusẽ,+ la b ra pa le tõe n yals b bɛɛbã taoor ye.+
15 B sẽn kẽngẽ fãa, a Zeova ra zabda ne bãmb n kɩt tɩ yel-beed paamd-ba,+ wa a Zeova sẽn da yeelã, la wa a Zeova sẽn da wẽen n yeel bãmbã.+ Bãmb toogã ra yaa wʋsgo.+
16 Dẽ, a Zeova ra kõt-b-la bʋ-kaoodb sẽn fãagd bãmb b fãadbã nusẽ.+
17 La bãmb pʋd n zãgsame tɩ b pa na n kelg bʋ-kaoodbã, n tũ* wẽnnaam-dãmb a taab n wõgemd bãmb taoore. Tao-tao bala, bãmb wẽnemdame n bas sor ning b yaab-rãmbã sẽn tũ wã. B yaab-rãmbã tũu a Zeova noyã+ la bãmb pa maan rẽ ye.
18 A Zeova sã n da kõ-b bʋ-kaooda,+ a Zeova ra bee ne-a n fãagd-b b bɛɛbã nusẽ bʋ-kaoodã vɩɩmã tõre. Bala b sã n da wõosd b sẽn maand bãmb pãng+ la b namsd-bã yĩnga, a Zeova ra zoeta b nimbãanega.*+
19 La bʋ-kaoodã sã n da ki, bãmb manegd n maana wẽng n yɩɩg b ba-rãmbã, n tũ wẽnnaam-dãmb a taaba, n pʋʋs bãmb la b wõgemd b taoore.+ B pa bas b tʋʋm-wẽnsã ne b kɩɩsgã ye.
20 A Zeova sũur wa n baas n puuga wʋsg ne Israyɛll nebã+ t’a yeel yaa: “Bu-kãngã sẽn sãam mam kaoolã+ mam sẽn kõ bãmb yaab-rãmbã la b kɩɩs maamã,+
21 ma-me pa na n dig bu-zẽms nins a Zozuwe sẽn ki n basã baa a ye bãmb taoor ye.+
22 Rẽ yaa sẽn na n mak Israyɛll nebã n ges b sã n na n kell n tũu a Zeova sorã+ n kẽn a zug wa b ba-rãmbã sẽn maanã.”
23 Dẽ, a Zeova kell n basa bu-kãensã, n pa rig-b tao-tao ye. A pa ning-b a Zozuwe nugẽ ye.
Vẽnegr toor-toore
^ Rat n yeel tɩ “Yãbdba.”
^ Bɩ, “tũu.”
^ Ebre, “koos-b-la.”
^ Bɩ, “yo ne.”
^ Bɩ, “maanda a bãngẽ.”
