Bʋ-kaoodbã sebre 6:1-40
6 La Israyɛll nebã leb n maana sẽn yaa wẽng a Zeova nifẽ,+ t’a Zeova bas-b Madiyã nebã nugẽ hal yʋʋm a yopoe.+
2 Madiyã nebã sɩnga Israyɛll nebã wõrbo.+ Madiyã nebã yĩnga, Israyɛll nebã maana zĩ-solgds b mens yĩng tãensã zutu, tãensã bogdẽ, la zĩis nins kẽngr sẽn pa nana wã.+
3 Israyɛll nebã sã n da bʋtẽ, Madiyã ne Amalɛk nebã,+ la Yaang nebã+ ra wat n zabda ne bãmba.
4 Bãmb da tilgda tãb-sik n zab ne Israyɛll nebã, la b sãam tẽngã koodã hal n tãag Gaaza. Bãmb da pa basd bũmb Israyɛll nebã sẽn na rɩ ye. Bãmb da pa basd pesgo, naaf wall bõang me ye.+
5 Bala bãmb da wata ne b rũmsã la ne b fu-rotã tɩ b sõorã yaa wʋsg wa sʋya,+ tɩ bãmb ne b yʋgma wã ra pa tõe n sõd n sa ye.+ B wata soolmã pʋgẽ n na n sãam-a.
6 Woto, Madiyã nebã kẽesa Israyɛll nebã naong wʋsg pʋgẽ, tɩ Israyɛll nebã bool a Zeova n kos sõngre.+
7 Israyɛll nebã sẽn bool a Zeova n kos sõngr Madiyã nebã yĩngã,+
8 a Zeova tʋma no-rɛɛs Israyɛll nebã nengẽ t’a tɩ yeel-b yaa: “Ad Israyɛll Wẽnnaam a Zeova sẽn yete: ‘Mam yiisa yãmb Ezɩpti, tẽng ning pʋgẽ y sẽn da yaa yembsã.+
9 Woto, mam fãaga yãmb Ezɩpt nebã nugẽ, la neb nins fãa sẽn da namsd yãmbã nugẽ, n dig-b n yiis yãmb taoore, la m deeg b tẽngã n kõ yãmba.+
10 La mam yeela yãmb yaa: “Mam yaa a Zeova, yãmb Wẽnnaamã.+ Yãmb pa segd n zoe Amoor nebã yãmb sẽn be b rãmb nins tẽngẽ wã+ wẽnnaam-dãmbã ye.” La yãmb pa kelg maam ye.’”*+
11 Kaoosg zugẽ, a Zeova malɛkã waame+ n tɩ zĩnd Ofra tɩ-bedrã tẽngre. Tɩɩgã yaa Abiyezɛɛr ned+ a Zowaas rẽnda. A bi-ribl a Zedeyõ+ ra pãbda bɩle vẽ wẽkr bok pʋgẽ, n solg-a sẽn na yɩl tɩ Madiyã nebã ra yã ye.
12 A Zeova malɛkã vẽnega a meng ne-a n yeele: “Tãb-biig sẽn yaa gãndaoogo, a Zeova bee ne foo.”+
13 Rẽ la a Zedeyõ leok-a n yeele: “Y kabre, m zu-soaba. A Zeova sã n bee ne tõndo, bõe yĩng tɩ bõn-kãensã fãa paamd tõndo?+ Yẽ tʋʋm-kãsemsã bee yɛ? Tʋʋm-kãsems nins yell d ba-rãmbã sẽn gom ne tõndã.+ Bãmb da yeelame: ‘A Zeova yiisa tõnd Ezɩpti.’+ La masã, a Zeova basa tõndo.+ A ninga tõnd Madiyã nebã nugẽ.”
14 A Zeova gesa yẽ n yeele: “Kẽng ne pãng ning fo sẽn tarã, tɩ fo na n fãaga Israyɛll Madiyã nebã nugẽ.+ Pa maam n tʋm foom la?”
15 A Zedeyõ leoka yẽ yaa: “Y kabre, Zeova. Mam na n maana wãn n fãag Israyɛlle? Ade! Tõnd roogã* rãmb n yaa bilf n yɩɩd Manase buudã sʋka, la maam n yaa m ba wã zakã rãmb yao-zʋʋga.”
16 La a Zeova yeel-a lame: “Fo na n tõoga Madiyã nebã wa nin-yende, bala mam na n zĩnda ne foom.”+
17 La a Zedeyõ leok-a lame yaa: “Yãmb sũur sã n nooma ne maam, bɩ y maan bãnd sẽn wilgd tɩ yãmb n gomd ne maam.
18 M bõos tɩ y ra looge, hal tɩ mam lebg n wa ne kũun n dɩgl yãmb taoore.”+ Tɩ malɛkã leoke: “Mam na n yalsa ka hal tɩ fo lebg n wa.”
19 A Zedeyõ kẽngame n tɩ kʋ bull n segle, la a maan bur sẽn pa ning rabɩll ne zom+ efa* a yembre. A ninga nemdã peoog pʋgẽ la bɩɩmã rʋk pʋgẽ. Rẽ poore, a talla rẽ fãa n wa kõ malɛkã tɩ-bedrã tẽngre.
20 Wẽnnaam malɛkã yeela yẽ yaa: “Rɩk nemdã ne bur sẽn pa ning rabɩllã n dɩgl pĩig kug-bedrã zug ka, la f kiig bɩɩmã.” La a Zedeyõ maana a sẽn yeelã.
21 Dẽ, a Zeova malɛkã tẽega rasaarã sẽn da be a nugẽ wã, n sɩɩs nemdã ne bur sẽn pa ning rabɩllã, tɩ bugum yi pĩigẽ wã n dɩ nemdã ne bur sẽn pa ning rabɩllã.+ La a Zeova malɛkã menema yẽ nifẽ.
22 Rẽ la a Zedeyõ bãng masã tɩ ra yaa a Zeova malɛka.+
Rẽ n so t’a Zedeyõ yeele: “Kayto, Zu-soab sẽn ka to a Zeova! Mam yãa a Zeova malɛkã neng ne nenga!”+
23 La a Zeova yeel-a lame yaa: “Bɩ laafɩ zĩnd ne foom. Da maan rabeem+ tɩ f pa na n ki ye.”
24 Rẽ la a Zedeyõ me tẽn-kugr be a Zeova yĩnga, la b boonda tẽn-kugrã tɩ Zeova-salom*+ hal n tãag rũndã. A ket n bee Ofra Abiyezɛɛr nebã soolmẽ.
25 Baraar yʋngo, a Zeova yeela a Zedeyõ yaa: “Yõk f ba wã loalgã, a loalg a yiib-n-soabã sẽn tar yʋʋm a yopoe wã, la f lub a Baal tẽn-kugrã fo ba wã sẽn so wã, la f kɛ ra-lukã b sẽn lugl n pʋʋsdẽ* wã sẽn be a sɛɛgẽ wã.+
26 La fo sã n me tẽn-kugr fo Wẽnnaam a Zeova yĩng pĩigã zug ne kugã sõma n sa, bɩ f yõk loalg a yiib-n-soabã n maan maoong sẽn yõogd bugum, ra-lukã b sẽn lugl n pʋʋsdẽ* wã fo sẽn kɛ wã ra-pees zugu.”
27 Dẽ, a Zedeyõ yãka rap piig a tʋm-tʋmdbã sʋka, la a maana wa a Zeova sẽn yeelã. La a sẽn da zoet a ba wã zakã rãmb la tẽngã nebã wʋsgã yĩnga, a pa maan dẽ ne wĩntoog ye. A maana ne yʋngo.
28 Tẽngã nebã sẽn yik vẽkembeoogã yibeoog pĩnda, b yãame tɩ b luba a Baal tẽn-kugrã, tɩ b kɛɛga ra-lukã b sẽn lugl n pʋʋsdẽ* wã sẽn da be a sɛɛgẽ wã, la tɩ b rɩka loalg a yiib-n-soabã n maan maoong tẽn-kugr ning b sẽn me wã zugu.
29 Bãmb ra sokda taab yaa: “Ãnd n maan bõn-kãngã?” La bãmb sẽn maan vaeesg poore, b yeelame: “Yaa a Zowaas biig a Zedeyõ n tʋm tʋʋm-kãngã.”
30 Rẽ la tẽngã nebã yeel a Zowaas yaa: “Yiis f biigã tɩ d kʋ-a. Bala a luba a Baal tẽn-kugrã, la a kɛ ra-lukã b sẽn lugl n pʋʋsdẽ* wã sẽn da be a sɛɛgẽ wã.”
31 T’a Zowaas+ yeel neb nins fãa sẽn dat n zab ne-a wã yaa: “Yãmb n segd n zab n sõng a Baal la? Yãmb n segd n fãag yẽ la? Ned ning fãa sẽn na n zab n sõng-a, b na n kʋ-a-la yibeo-kãngã.+ A Baal sã n yaa wẽnnaam, bɩ a zab n sõng a menga.+ Bala ned n lub a tẽn-kugrã.”
32 Baraare, a pʋda a Zedeyõ yʋʋr t’a Zerubaalle,* n yeele: “Bɩ a Baal zab n sõng a menga, bala ned n lub a tẽn-kugrã.”
33 Madiyã+ ne Amalɛk nebã+ fãa, la Yaang nebã naaga taab+ n dʋʋg kʋɩlgã n wa Zizreyɛll tẽn-nabrẽ wã, n tilg b sika.
34 Wakat kãnga, a Zeova vʋʋsmã siga a Zedeyõ+ zug t’a peeb baorgo,+ tɩ Abiyezɛɛr nebã+ wa n na n sõng-a.
35 A tʋma koe-taasdb Manase soolmã tõre, la bãmb me waame n na n sõng-a. A leb n tʋma koe-taasdb Asɛɛre, Zabulõ la Naftali soolmã tõre, tɩ bãmb yi n na n seg-a.
36 Dẽ, a Zedeyõ yeela Wẽnnaam yaa: “Yãmb sã n na n tũnuga ne maam n fãag Israyɛll wa y sẽn pʋlmã,+
37 ad mam sẽn yɛdgd pe-kõbd zɛɛgẽ wã. Meenemã sã n madg pe-kõbdã bala, tɩ zĩigã sẽn karg n gũbg-a wã yaa koɛɛnga, mam na n bãngame tɩ yãmb na n tũnuga ne maam n fãag Israyɛll wa y sẽn pʋlmã.”
38 La yɩɩ woto. A Zedeyõ sẽn yik vẽkembeoogã yibeoog pĩnd n wẽk pe-kõbdã, meenemã sẽn yi pe-kõbdã pʋgẽ wã yɩɩ wʋsg tɩ sek a na n pids la-bedr ne koom.
39 La a Zedeyõ yeela Wẽnnaam yaa: “Da bas-y tɩ y sũur puug ne maam ye. Bas-y tɩ m kos bũmb a to yɛsa. M bõos n le tall pe-kõbdã n mak n ges y sã n na n zĩnda ne maam. M bõos tɩ y kɩt tɩ pe-kõbdã bal yɩ koɛɛnga, tɩ zĩigã fãa madg ne meenem.”
40 Baraar yʋngo, Wẽnnaam kɩtame t’a Zedeyõ sẽn kosã pidsi. Pe-kõbdã bal n yɩ koɛɛnga, tɩ meenemã madg zĩigã fãa.
Vẽnegr toor-toore
^ Ebre, “kelg mam koɛɛgã ye.”
^ Ebre, “tusrã.” Bɩ, “sullã.”
^ Efa zemsa litr 22. Ges-y vẽnegr ning sẽn yaa B14.
^ Rat n yeel tɩ, “A Zeova yaa laafɩ.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Rat n yeel tɩ “Bɩ a Baal gom n sõng a menga.”