Ezekɩyɛll sebre 23:1-49
23 A Zeova le goma ne maam n yeele:
2 “Ninsaal biiga, pagb a yiib n da be n yaa pag a ye kamba.+
3 B lebga pʋg-yoaadb Ezɩpti.+ B sɩnga yoob hal b pʋg-sademdẽ. Yaa be la b wẽbs b bĩisã, la b salem b pʋg-sademdẽ yãadã.
4 Kãsmã yʋʋr la a Ohola,* t’a yaoã yʋʋr la a Oholiba.* B wa n lebga mam pagba, n dog kom-dibli la kom-pugli. A Ohola yaa Samari,+ t’a Oholiba yaa Zerizalɛm.
5 “A Ohola sɩnga yoob+ t’a ket n yaa mam paga. A yamã kẽe a rolsen-dãmbã,+ rat n yeel tɩ Asiiri+ nebã sẽn yaa a yagsã.
6 B ra yaa guvɛrneer-dãmb sẽn yer fut sẽn yaa kẽeg haoo* la kom-bɛɛmba. B fãa ra yaa kom-bɩɩs sẽn yaa rasãmba, n zao b wed-moose.
7 A kell n yoo ne Asiiri kom-dibli nins sẽn yaa rasãmb n yɩɩdã. A rẽgma a meng+ ne a yamã sẽn kẽ b rãmbã bõn-naandsã sẽn yaa bõn-yoodã.*
8 A pa bas yoob ning a sẽn sɩng Ezɩptã ye. Bala yaa hal a pʋg-sademdẽ la b gãand-a, n salem a pʋg-sademdẽ yãoogã, la b kẽ ne-a ne tʋlsem wʋsgo.+
9 Dẽ, mam ning-a-la a rolsen-dãmbã nusẽ, rat n yeel tɩ Asiiri+ nebã a yamã sẽn da kẽ wã.
10 B yeesa a futã n bas-a a zaala,+ n yõg a kom-dibli wã la a kom-pugli wã+ n tall n looge, la b kʋ-a ne sʋʋga. A yʋʋrã yii wʋsg pagbã sʋka. Asiiri nebã sɩbg-a lame.
11 “A yao a Oholiba sẽn yã rẽ wã, a ratmã maneg n paama pãnga, t’a yoobã wẽnem yɩɩg a kẽemã.+
12 A yamã kẽe Asiiri+ nebã sẽn yaa a yagsã. Yaa guvɛrneer-dãmb la kom-bɛɛmb sẽn yer fu-neeb n zao wed-moose. B fãa yaa kom-bɩɩs sẽn yaa rasãmba.
13 A sẽn dẽgem a mengã, mam yãame tɩ b yiibã fãa rɩka so-yɛnga.+
14 La a ra paasda a yoobã pãnga. A yãa rap naand b sẽn pees lalg zugu. Yaa Kalde neb naand b sẽn maan tɩ yaa miid-miidu,
15 tɩ b seesã ra sẽb ne sẽbdse, tɩ b zutã ra vil ne zu-vinds n kell tɩ luundẽ. B ra wõnda zabr gãndaado. B fãa ra makda Babilon neb sẽn dog Kalde nebã soolmẽ.
16 A sẽn yã-bã bala, a yamã kẽ-b lame, t’a tʋm koe-taasdb tɩ b kẽng b nengẽ Kalde.+
17 Dẽ, Babilon nebã ra wata a yoobã gãag zugu. B kẽe ne-a ne tʋlsem wʋsg n dẽgm-a. B sẽn dẽgm-a wã poore, a sɩɩgã lak-b lame t’a bas-ba.
18 “A sẽn kell n yo n pa zoe yãndã, la a sẽn da basd tɩ b get a yãndã yĩnga,+ mam yamã yi-a lame tɩ m bas-a, wa mam sɩɩgã sẽn lak ne a kẽemã tɩ m bas-a wã.+
19 A ra ket n paasda a yoobã pãnga,+ n tẽegd a pʋg-sademdẽ wakatã yelle, a sẽn da wa n yood Ezɩpt soolmẽ wã.+
20 A yamã kẽ-b-la wʋsgo, wa rao raoolem sẽn yaa wa bõang raoolem la wed-moaag raoolem pʋg-rɩkdse.*
21 Foom a Oholiba tʋlga f pʋg-sademdẽ tʋʋm-dẽgdã f sẽn da tʋmd Ezɩptã,+ b sẽn wa n salemd fo yãoogã, f pʋg-sademdẽ bĩisã.+
22 “Woto wã, foom a Oholiba, ad a Zeova sẽn yaa Zu-soab sẽn ka to wã sẽn yeele: ‘Mam na n pirsa sẽn nong-b foomã,+ fo sɩɩgã sẽn lak b rãmb tɩ f bas-bã. Mam na n kɩtame tɩ b yi ween-vɩɩsã fãa n wa zab ne foo.+
23 Yaa Babilon rapã+ la Kalde nebã fãa,+ Pekood+ la Sowa ne Kowa rapã, n paas Asiiri nebã fãa. B fãa yaa kom-bɩɩs sẽn yaa rasãmba, guvɛrneer-dãmba, kom-bɛɛmba, zabr gãndaad la neb b sẽn maag b yĩng n tũusi.* B fãa zaoo wed-moose.
24 B na n waa ne zabr saar-dãmb* wʋsgo, la tãb-biis kʋʋng sẽn zãad gãn-bɛd la gãn-bõonego,* la sẽn fõg kut pugli, n zab ne foo. B na n karg n gũbga foo, tɩ mam kõ-b sor tɩ b sɩbg-fo. B na n sɩbga foo wa b sẽn date.+
25 Mam na n wilgame tɩ m sũurã puuda ne-fo. B na n sɩbg-f-la ne sũ-puugri. B na n wõrsa fo yõorã la f tʋbã. B na n kʋʋ fo neb nins sẽn ketã ne sʋʋga. B na n yõga fo kom-dibli wã la f kom-pugli wã n looge. Bugum n na n dɩ fo neb nins sẽn ketã.+
26 B na n yeesa f futã+ la b rees f fan-te-neebã.*+
27 Mam na n kɩtame tɩ f tʋʋm-dẽgdã ne f yoobã+ sẽn sɩng Ezɩpt soolmẽ wã sa.+ Fo na n basa b gesgo. Fo pa na n le tẽeg Ezɩpt yell ye.’
28 “Bala ad a Zeova sẽn yaa Zu-soab sẽn ka to wã sẽn yeele: ‘Ka la bilfu, mam na n dɩka foo n ning neb nins fo sẽn kisã nusẽ, fo sɩɩgã sẽn lak b rãmb tɩ f bas-bã nusẽ.+
29 B na n sɩbga foo b sẽn kis-fã yĩnga, la b rees bũmb nins fãa fo sẽn kaag f tʋʋlg n paamã,+ n bas-f a zaal zãng fasɩ. Nebã fãa na n yãa fo yãndã. B na n yãa tʋʋm-wẽns nins fãa fo sẽn da wae n tʋmdẽ wã. B na n bãngame tɩ fo yaa pʋg-yoodre.+
30 B na n maana foo bõn-kãensã, fo sẽn zoe n pʋg buud toɛy-toɛyã wa pʋg-yoodrã yĩnga,+ bala fo rẽgma f meng ne b bõn-naandsã sẽn yaa bõn-yoodã.+
31 Fo rɩka f kẽemã togs-n-taare,+ tɩ mam na n ning a wũmblã f nugẽ.’+
32 “Ad a Zeova sẽn yaa Zu-soab sẽn ka to wã sẽn yeele:
‘Fo na n yũu bũmb ning sẽn be f kẽemã wũmblã sẽn yaa zulung la yalengã pʋgẽ wã.+Fo na n lebga bũmb b sẽn laad la b sẽn yaande, bala sẽn be wũmblã pʋgẽ wã yaa wʋsgo.+
33 Fo na n yũu f kẽem a Samari bõn-yũudlã tɩ sek-fo.Fo nengã na n yilmame, tɩ f sũurã me sãam wʋsgo.Fo na n lebga bũmb sẽn kẽesd rabeem, la raboogo.
34 Fo na n yũu bũmb ning sẽn be wũmblã pʋgẽ wã hal t’a sa+ zãnga. B na n wã-a lame, tɩ f wãb a peesã.Rẽ poore, fo na n taa f bĩisã n tõse.
“Bala yaa mam mengã n gome.” Yaa a Zeova sẽn yaa Zu-soab sẽn ka to wã n yeele.’
35 “Woto wã, ad a Zeova sẽn yaa Zu-soab sẽn ka to wã sẽn yeele: ‘Fo sẽn yĩm mam yell la f paoog maam wʋsgã,*+ fo tʋʋm-dẽgdã ne f yoobã biis na n wẽneg n waa fo zugu.’”
36 Rẽ poore, a Zeova yeela maam yaa: “Ninsaal biiga, fo na n kaoo a Ohola ne a Oholiba+ bʋʋdo, la f wilg-b b tʋʋm-yoodã bɩ?
37 B yoome,*+ tɩ zɩɩm be b nusẽ me. B pa yo ne b bõn-naandsã sẽn yaa bõn-yoodã bal ye. B rɩka b kom-dibli wã me b sẽn dog n kõ maamã n yõog bugum tɩ yɩ b bõn-naandsã rɩɩbo.+
38 Sẽn paase, ad bũmb ning b sẽn maan maamã: Daar-n-kãnga, b rẽgma mam doogã, la b rẽgem mam vʋʋsg rayã.
39 B sẽn kʋ b kom-dibli wã n maan maand n kõ b bõn-naandsã sẽn yaa bõn-yoodã daar bala,+ b waa mam doogẽ wã n na n dẽgm-a.+ Yaa woto la b maan mam doogã pʋgẽ.
40 B pʋd n tʋma koe-taasd t’a tɩ bool neb sẽn be yɩɩg tɩ b wa.+ B sẽn wa n watẽ wã, foom a Oholiba soo koom, n dẽes f ninã la f ning fan-teedo.+
41 Fo zĩnda gãag sẽn yaa neer zugu,+ tɩ taabl be a taoorã.+ Fo rogla mam wisdã+ ne m kaamã+ taablã zugu.
42 Be, b ra wʋmda neb kʋʋng sẽn pa maand yɩɩr dãamde. B talla rã-yũud-kãas n yi we-raoogẽ wã n wa, tɩ b be b sʋka. B ra pita pagbã nusã zũya, la b fõgend b zutã maanf-rãmb sẽn yaa neeba.
43 “Pag ning yoobã sẽn zarbã wɛɛngẽ, mam yeelame yaa: ‘Baasgo, a na n ket n yoodame.’
44 Dẽ, b ra ket n kẽngda a nengẽ, wa neb sẽn kẽngd pʋg-yoodr nengẽ. Yaa woto la b ra kẽngd a Ohola ne a Oholiba sẽn yaa pagb sẽn tʋmd tʋʋm-dẽgdã nengẽ.
45 La nin-tɩrs n na n sɩbg-a* wa sẽn zems a yoobã+ la a sẽn daag zɩɩmã.+ Bala b yaa pʋg-yoaadba, tɩ zɩɩm be b nusẽ+ me.
46 “Bala ad a Zeova sẽn yaa Zu-soab sẽn ka to wã sẽn yeele: ‘B na n kɩtame tɩ tãb-biis wa zab ne-ba, n kɩt tɩ b lebg bũmb sẽn kẽesd rabeem, la te-zɛɛdem.+
47 Tãb-biisã na n lob-b-la kuga,+ la b kɛ-b ne b sʋʋsã n kʋ. B na n kʋʋ b kom-dibli wã la b kom-pugli wã,+ la b yõog b rotã bugum.+
48 Mam na n kɩtame tɩ tʋʋm-dẽgd nins b sẽn tʋmd soolmã pʋgẽ wã sa. Pagbã fãa na n dɩka yam, n da tʋm tʋʋm-dẽgd wa bãmb ye.+
49 B na n kɩtame tɩ b tʋʋm-dẽgdã biisi, la yel-wẽn nins b sẽn maan ne b bõn-naandsã sẽn yaa bõn-yoodã biis wẽneg n wa b zutu. Woto, b na n bãngame tɩ mam yaa a Zeova sẽn yaa Zu-soab sẽn ka to wã.’”+
Vẽnegr toor-toore
^ Rat n yeel tɩ “Mam fu-roogã bee a pʋgẽ.”
^ Rat n yeel tɩ “Yẽ fu-roogo.”
^ bʋla.
^ Ebre gom-bilã tõe n dat n bilga “bĩndu.” B wae n pʋta gom-bi-kãng n na n paoog bũmb ning yell b sẽn gomdã.
^ Ges-y gom-biis võor bilgrã zĩigẽ.
^ Ebre, “la b sẽn bool b rãmbã.”
^ Yaa bũmb sẽn wõnd sarɛt tɩ wed-moos tatẽ.
^ Yaa sẽn tãood-b tãbdã n da wae n zãad gãn-bila.
^ Bɩ, “nag-te-neebã.”
^ Ebre, “lob maam f poorẽ wã.”
^ Rat n yeel tɩ b yoo ne bõn-naandse.
^ Tog n yaa a Oholiba yell la b gomda.
