Ezekɩyɛll sebre 24:1-27
24 A Zeova le goma ne maam yʋʋm a wɛ soabã kiuug piig soabã rasem piigã daare, n yeele:
2 “Ninsaal biiga, gʋls rũndã sẽn yaa daar ningã* sebr zugu. Yaa rũndã la Babilon rĩmã sɩng n na n zab ne Zerizalɛm.+
3 Wẽ yel-bũnd buud ning neb sẽn yaa tõatbã wɛɛngẽ n yeel-b yaa:
“‘Ad a Zeova sẽn yaa Zu-soab sẽn ka to wã sẽn yeele:
“Rʋgl rʋko.* Rogl-a bugmã zugu, n kiig koom a pʋgẽ.+
4 Sag nemd b sẽn bees a pʋgẽ,+ nemd buud fãa sẽn yaa sõma,gerã la bãokã. Pids-a ne kõab nins sẽn yaa sõma n yɩɩdã.
5 Yãk piis nins sẽn yaa sõma n yɩɩd rũmsã sʋkã.+ Tui ra-giis n gilg rʋkã tẽngre.
Kaeeg nemdã b sẽn beesã la f rʋg kõabã sẽn be a pʋgẽ wã.”’
6 “Woto wã, ad a Zeova sẽn yaa Zu-soab sẽn ka to wã sẽn yeele:
‘Toog bee ne galʋ-tẽng ning sẽn daagd zɩɩmã,+ rʋkã sẽn kẽ tẽngempiisim tɩ b pa wur a tẽngempiismã!
Yaas nemdã b sẽn beesã yembr-yembre.+ Ra maan bãnd b yĩng ye.
7 Bala zɩɩm ning a sẽn daagã bee a pʋgẽ.+ A raag-a-la kug-bɩlemdã zug tɩ nebã fãa tõe n yã.
A pa raag-a tẽng n lud ne tom ye.+
8 Sẽn na yɩl tɩ m sũurã yik tɩ m dok m sũuri,mam ninga zɩɩm ning a sẽn daagã kug-bɩlemdã sẽn pɩndã zugu,sẽn na yɩl tɩ b ra tõog n lud-a ye.’+
9 “Woto wã, ad a Zeova sẽn yaa Zu-soab sẽn ka to wã sẽn yeele:
‘Toog bee ne galʋ-tẽng ning sẽn daagd zɩɩmã!+
Mam na n sama raadã tɩ zẽke.
10 Sam ra-giisã, la f widg bugmã.Rʋg nemdã tɩ bɩ sõma, n sɩlg bɩɩmã, la f bas kõabã tɩ kãbe.
11 Rogl rʋg-vɩʋʋgã bug-saalã zug sẽn na yɩl t’a wɩnge,hal t’a zũudã moog wʋsgo.
A rẽgdã na n yẽnega a pʋgẽ,+ t’a tẽngempiismã rɩ bugum.
12 Yaa bũmb sẽn yikd sũur la sẽn wat ne yaamse,bala tẽngempiismã sẽn yaa wʋsgã pa na n yi ye.+
Lob rʋkã ne a tẽngempiismã fãa bugmẽ wã!’
13 “‘Yaa fo tʋʋm-dẽgdã n kɩt tɩ f yaa rẽgdã.+ Mam makame n na n yɩlg foo, la fo rẽgdã ra pa yit sẽn na yɩl tɩ f lebg yɩlemd ye. Fo pa na n lebg yɩlemde, hal tɩ mam sũurã sẽn puud ne foomã wa sigi.+
14 Yaa maam a Zeova meng n gome. Na n pidsame. Mam na n maana foo bũmb ning fãa mam sẽn yeel tɩ m na n maan-f lame wã, tɩ pa sãam m sũur ye. M pa na n maan m bãngẽ me ye.+ Mam na n kaoo fo bʋʋd wa sẽn zems f manesmã la f tʋʋm-tʋmdɩ wã.’ Yaa a Zeova sẽn yaa Zu-soab sẽn ka to wã n yeele.”
15 A Zeova le goma ne maam n yeele:
16 “Ka la bilfu mam na n deega fo sẽn nong a soabã zĩig pʋgẽ n bas-fo.+ Fo pa segd n maan sũ-sãanga,* n yãb wall f raag nintãm ye.
17 Sidg f sũurẽ. Ra maan bũmb nins b sẽn wae n maand ned kũum yĩng n na n wilg b sũ-sãangã ye.+ Vil f zu-vindgã,+ la f pid f neooda wã.+ Fo pa segd n lud f no-kõbdã* ye.+ Fo pa segd me n dɩ rɩɩb neb a taabã sẽn na n tall n wa kõ foomã ye.”*+
18 Mam goma ne nin-buiidã yibeoogo, tɩ mam pagã ki baraar zaabre. Dẽ, vẽkembeoogã yibeoogo, mam maana wa b sẽn yeel maamã.
19 Nin-buiidã ra sokda maam yaa: “Fo pa na n togs tõnd bũmb nins fo sẽn maandã võor ne tõnd sɩda?”
20 Mam leok-b lame yaa: “A Zeova goma ne maam n yeele:
21 ‘Togs Israyɛll buudã neb yaa: “Ad a Zeova sẽn yaa Zu-soab sẽn ka to wã sẽn yeele: ‘Ka la bilfu, mam na n dẽgma m doogã+ sẽn yaa bũmb ning yãmb sẽn tik n wukd y mens wʋsgã, bũmb ning y sẽn nong wʋsgo, la bũmb ning y sũyã sẽn datã. B na n kʋʋ yãmb kom-dibli wã ne y kom-pugli wã y sẽn bas poorẽ wã ne sʋʋse.+
22 Dẽ, na n yɩɩ tɩlɛ tɩ y maan wa mam sẽn maanã. Y pa na n lud y no-kõbdã ye. Yãmb pa na n dɩ rɩɩb* neb a taabã sẽn na n tall n wa kõ-yã ye.+
23 Yãmb zu-vindsã na n zĩnda y zutẽ wã, tɩ y neooda wã be y naoẽ wã. Yãmb pa na n maan sũ-sãang wall y yãb ye. Yãmb na n põoga y kongrã pʋgẽ.+ Y na n sidgda ne taaba.
24 A Ezekɩyɛll lebga bãnd yãmb yĩnga.+ Y na n maana wa a sẽn maanã. Bõn-kãng sã n wa maane, yãmb na n bãngame tɩ mam yaa a Zeova sẽn yaa Zu-soab sẽn ka to wã.’”’”
25 “Sã n yaa ne foom a ninsaal biiga, daar ning mam sẽn na n deeg b pãng zĩigã n bas-bã, rat n yeel tɩ bõn-neerã sẽn kõt-b sũ-noogã, bũmb ning b sẽn nong wʋsgã, bũmb ning b sũyã* sẽn datã, la m deeg b kom-dibli wã ne kom-pugli wã,+
26 ned sẽn na n põs n na n wa togs foo kibarã.+
27 Daar-n-kãnga, fo na n yaaga f noor n gom ne sẽn põs-a wã, la fo pa na n le yɩ muk ye.+ Fo na n lebga bãnd b yĩnga. Woto, b na n bãngame tɩ mam yaa a Zeova.”
Vẽnegr toor-toore
^ Ebre, “daarã yʋʋr.”
^ Bɩ, “rʋk b sẽn tar n segendẽ t’a noorã yaa yalenga.”
^ Bɩ, “pãb f yãoogã.”
^ Bɩ, “yĩngr no-bɩngã.”
^ Ebre, “n wãb nebã bur ye.”
^ Ebre, “bur.”
^ Bɩ, “sɩɩsã.”
