Ezekɩyɛll sebre 29:1-21
29 Yʋʋm piig soabã, kiuug piig soabã rasem piig la a yiibã daare, a Zeova goma ne maam n yeele:
2 “Ninsaal biiga, wẽnemd f neng n tees Ezɩpt rĩm a Farawõ, n togs bãngr-gomd n ning yẽ ne Ezɩpt nebã fãa taale.+
3 Yeel yaa: ‘Ad a Zeova sẽn yaa Zu-soab sẽn ka to wã sẽn yeele:
“Foom a Ezɩpt rĩm a Farawõ, mam na n zaba ne foo.+Fo yaa mogrã bõn-bãn-kãseng sẽn gãe f Nill* kʋɩlgã ko-soayã sʋka,+n yetẽ yaa: ‘Nill kʋɩlgã yaa maam n so.
Mam maan-a-la m meng yĩnga.’+
4 Mam na n gaaga fo yɛyã ne leoose, la m kɩt tɩ f Nill kʋɩlgã zĩmã tabend fo pagdã.
Mam na n zẽka foo ne Nill kʋɩlgã zĩmã fãa sẽn tab fo pagdã n yiis f Nill kʋɩlgẽ wã.
5 Mam na n loba foo ne f Nill kʋɩlgã zĩmã fãa we-rasempʋɩɩgẽ wã.
Fo na n lʋɩɩ weoogẽ wã n weel tɩ ned baa a ye pa tigs foo n mum ye.+
Mam na n dɩka foo n kõ tẽngã we-rũmsã la liuuli wã sẽn yɩgd yĩngrã tɩ yɩ b rɩɩbo.+
6 Woto, Ezɩpt nebã fãa na n bãngame tɩ mam yaa a Zeova,bala b yɩɩ bũmb Israyɛll nebã sẽn da teege, t’a pãngã yaool n pa ta tãnwĩig ye.+
7 Israyɛll nebã sẽn wa n gãd fo nugã, fo bedsame,n kɩt tɩ b bãokã rãmbe.
B sẽn wa n tik foomã, fo kaoome,n kɩt tɩ b karsã* rigi.”+
8 “‘Woto wã, ad a Zeova sẽn yaa Zu-soab sẽn ka to wã sẽn yeele: “Mam na n kɩtame tɩ b wa zab ne foo ne sʋʋse.+ Mam na n kʋʋ ninsaalbã ne rũmsã fãa sẽn be fo pʋgẽ wã.
9 Ezɩpt soolmã na n lebga zĩ-vɩʋʋg la raboogo.+ Woto, nebã na n bãngame tɩ mam yaa a Zeova, bala fo yeelame* yaa: ‘Nill kʋɩlgã yaa maam n so. Yaa maam n maan-a.’+
10 Rẽ wã, mam na n zaba ne foo la ne f Nill kʋɩlgã. Mam na n kɩtame tɩ Ezɩpt soolmã lebg raboogo, tẽn-koɛɛng la zĩ-vɩʋʋgo,+ sẽn sɩng ne Migdoll+ n tãag Sɩyɛn la Etiyopi toadgã.+
11 Ninsaal wall yir dũng pa na n kẽn ne nao n pasg be ye.+ A na n kell n paa vɩʋʋg yʋʋm pis-naase.
12 Mam na n kɩtame tɩ Ezɩpt soolmã lebg zĩ-vɩʋʋg n yɩɩg soolem a taabã. A galʋ-tẽnsã na n lebga zĩ-vɩɩd n yɩɩd b taabã n kaoos yʋʋm pis-naase.+ Mam na n sãeega Ezɩpt nebã buud toɛy-toɛyã sʋka, la m sãeeg-b soolem toor-toorã sʋka.”+
13 “‘Bala ad a Zeova sẽn yaa Zu-soab sẽn ka to wã sẽn yeele: “Yʋʋm pis-naas poore, mam na n tigma Ezɩpt nebã buud toɛy-toɛyã pʋsẽ b sẽn da sãeegã, n tall-b n lebg n wa.+
14 Mam na n talla Ezɩpt neb nins sẽn da be yembdã n lebg n wa Patroos+ soolmẽ wã, soolem ning pʋgẽ b sẽn yitã. Be, b na n lebga rĩung sẽn pa zem baa fʋɩ.
15 Ezɩpt pãngã pa na n le ta rĩung a taabã ye. A pa na n le soog buud a taabã ye.+ Mam na n kɩtame t’a lebg bilfu, hal n pa le tõe n soog buud a to ye.+
16 A pa na n tol n le yɩ bũmb Israyɛll buudã neb sẽn teeg ye.+ A na n yɩɩ bũmb sẽn tẽegd-b b kongrã, b sẽn tɩ kos Ezɩpt nebã sõngrã. Woto, b na n bãngame tɩ mam yaa a Zeova sẽn yaa Zu-soab sẽn ka to wã.”’”
17 Yʋʋm pisi la a yopoe-n-soabã, pipi kiuugã pipi daarã, a Zeova goma ne maam n yeele:
18 “Ninsaal biiga, Babilon rĩm a Nebukadnezaar*+ kɩtame t’a tãb-biisã tʋm wʋsgo, sẽn na yɩl n zab ne Tɩɩre.+ B ned kam fãa zug kõogame, tɩ ned kam fãa bãgd meede. La yẽ ne a tãb-biisã pa paam yaoodo, tʋʋmd ning b sẽn tʋm n na n zab ne Tɩɩrã yĩng ye.
19 “Woto wã, ad a Zeova sẽn yaa Zu-soab sẽn ka to wã sẽn yeele: ‘Mam na n dɩka Ezɩpt soolmã n kõ Babilon rĩm a Nebukadnezaare.*+ A na n wʋka a arzɛkã la a zɛ teed wʋsg a pʋgẽ. Rẽ na n yɩɩ a tãb-biisã yaoodo.’
20 “‘Mam na n dɩka Ezɩpt soolmã n kõ-a, n dol tʋʋmd ning a sẽn tʋm n na n zab ne-a wã,* bala yẽ ne a tãb-biisã tʋma mam yĩnga.’+ Yaa a Zeova sẽn yaa Zu-soab sẽn ka to wã n yeele.
21 “Baraare, mam n kɩtame tɩ yɩɩll pusg n yi Israyɛll buudã neb yĩnga,*+ la m kõ foo weer tɩ f gom b sʋka. Woto, b na n bãngame tɩ mam yaa a Zeova.”
Vẽnegr toor-toore
^ Vɛrse-kãngã ne vɛrse nins sẽn pʋgdã pʋgẽ, b sã n gomd “Nill” yelle, yaa kʋɩlgã ne a ko-soayã b sẽn tu n tar n zãgsd zẽedã.
^ Ebre, “seesã.”
^ Ebre, “a yeelame.”
^ Ebre, “Nebukadrezaar.” Yaa yʋʋrã boolg a to.
^ Ebre, “Nebukadrezaare.” Yaa yʋʋrã boolg a to.
^ Rat n yeel tɩ n zab ne Tɩɩre.
^ Bɩ, “n kõ Israyɛll buudã neb pãnga.”
