Ezekɩyɛll sebre 5:1-17
5 “Sã n yaa ne foom a ninsaal biiga, rɩk sʋʋg sẽn dɩte, tɩ yɩ wa barga. Põng f zugã la f toɛɛngã, la f rɩk zɩslem makdg n mak zoobdã n pʋɩ zĩis toor-toore.
2 Tẽngã gũbgrã ray sõor sã n wa pidi,+ fo na n yõoga zoobdã pʋɩɩr a ye pʋɩ a tãab zug tẽngã pʋgẽ. Rẽ poore, fo na n dɩka pʋɩɩr a ye pʋɩ a tãab zug me n kɛ ne sʋʋg n gilg tẽngã.+ La pʋɩɩr a ye pʋɩ a tãab zug ning sẽn ketã, fo na n yelg-b lame tɩ sobgã rɩke. Mam na n fooga sʋʋg n dig-ba.+
3 “Fo segd n yãka zoobdã bilf me, n ning f fuugẽ wã n põdemde.
4 Yãk zoobdã bilf yɛs n los bugmẽ wã tɩ rɩ. Bugmã na n yãngame n ta Israyɛll buudã fãa.+
5 “Ad a Zeova sẽn yaa Zu-soab sẽn ka to wã sẽn yeele: ‘Ad Zerizalɛm. Mam kɩtame t’a zĩnd buud toɛy-toɛy sʋka, tɩ soolem toor-toor karg n gũbg-a.
6 La a zãgsame t’a kõn tũ mam tõodã ne m noyã ye. A maana sẽn yaa wẽng n yɩɩd buud toɛy-toɛyã la soolem nins sẽn karg n gũbg-a wã.+ Bala a nebã kɩɩsa mam tõodã, n pa tũ mam noyã ye.’
7 “Woto wã, ad a Zeova sẽn yaa Zu-soab sẽn ka to wã sẽn yeele: ‘Yãmb sẽn maan wẽng n yɩɩd buud toɛy-toɛyã sẽn karg n gũbg yãmbã yĩnga, n pa tũ mam noyã wall y sak mam tõodã, n bas n tũud buud toɛy-toɛyã sẽn karg n gũbg yãmbã tõodã yĩnga,+
8 ad a Zeova sẽn yaa Zu-soab sẽn ka to wã sẽn yeele: “Foom a tẽnga, mam na n zaba ne foo.+ Mam menga n na n sɩbg foo buud toɛy-toɛyã nifẽ.+
9 Bõn-wẽns nins fãa fo sẽn maanã yĩnga, mam na n maana foo bũmb m sẽn zɩ n maane, la m sẽn pa na n le maan a buudu.+
10 “‘“Ba-rãmb nins sẽn be fo pʋgẽ wã na n wãba b kamba,+ tɩ kambã wãb b ba-rãmba. Mam na n sɩbga foo, la m sãeeg fo neb nins sẽn ketã ween-vɩɩsã fãa.”’*+
11 “A Zeova sẽn yaa Zu-soab sẽn ka to wã yeelame: ‘Mam wẽenda ne m meng tɩ sẽn yaa mam doogã la yãmb rẽgem ne y bõn-naandsã fãa sẽn yaa bõn-yoodã, la ne y tʋʋm-wẽnsã fãa wã,+ ma-me na n daaga yãmb n base.* Mam pa na n sãam m sũur y yĩnga, wall m zoe y nimbãaneg ye.+
12 Fo ned a ye neb a tãab sʋk na n kii ne bã-loangdg* wall ne kom fo pʋgẽ. B na n kʋʋ fo ned a ye neb a tãab sʋk me ne sʋʋg fo kɩremsã fãa.+ Mam na n sãeega ned a ye neb a tãab sʋk ning sẽn ketã ween-vɩɩsã fãa.* Mam na n fooga sʋʋg n dig-ba.+
13 Yaa rẽ poor la m sũ-puugrã na n sa, tɩ m sũurã sẽn da yik ne-bã sigi. Rẽ la m sũurã na n yɩ noogo.+ Mam sã n wa sik m sũ-puugrã b zut n sa, na n yɩɩ tɩlɛ tɩ b bãng tɩ yaa maam a Zeova n gome, mam sẽn dat tɩ b waoog maam m ye tãa balã+ yĩnga.
14 “‘Mam na n kɩtame tɩ fo lebg zĩ-vɩʋʋgo, la bũmb b sẽn na n paoogd buud toɛy-toɛyã sẽn gũbg foomã sʋka, la ned ning fãa sẽn loogd fo sɛɛgẽ wã nifẽ.+
15 Mam sã n wa sɩbg foo ne sũ-yikri, ne sũ-pu-kãsenga, la ne sɩbg-toaaga, fo na n lebga bũmb b sẽn paoogd la b sẽn yaande.+ Bũmb ning sẽn na n paam foomã na n yɩɩ keoogr buud toɛy-toɛyã sẽn gũbg foomã yĩnga, la kẽes-b rabeem. Yaa maam a Zeova n gome.
16 “‘Mam na n kɩtame tɩ komã pɛɛmã sẽn kʋʋdã sãam fo nebã. Pɛɛm nins mam sẽn na n tʋmã na n sãama yãmba.+ Mam na n kɩtame tɩ rɩɩb ra le wa yãmb nengẽ,* tɩ y komã paam pãnga.+
17 Mam na n tʋma kom la we-rũms sẽn yaa toos yãmb nengẽ.+ B na n kɩtame tɩ f kong kamba. Bã-loangdgã ne zɩɩmã raagr na n yɩɩga f pãnga. Mam na n kɩtame tɩ b zab ne foo ne sʋʋse.+ Yaa maam a Zeova n gome.’”
Vẽnegr toor-toore
^ Ebre, “sobdã fãa.”
^ Bɩ, “booga yãmb sõorã.”
^ Bɩ, “bãag.”
^ Ebre, “sobdã fãa.”
^ Ebre, “kaoo yãmb burã raado.” Tõe tɩ yaa raad nins b sẽn da tar n tuiid bur n bĩngdẽ wã.
