Ezekɩyɛll sebre 6:1-14
6 A Zeova le goma ne maam n yeele:
2 “Ninsaal biiga, wẽnemd f nengã n tees Israyɛll tãensã, n togs bãngr-goam b wɛɛngẽ.
3 Fo segd n yeelame yaa: ‘Yãmb a Israyɛll tãense, kelg-y-yã a Zeova sẽn yaa Zu-soab sẽn ka to wã goamã. Ad a Zeova sẽn yaa Zu-soab sẽn ka to wã sẽn yet tãensã, kunkubã, kʋɩlsã, la londã: “Kelg-y-yã! Mam na n kɩtame tɩ sʋʋg wa zab ne yãmba. M na n sãama y zĩ-zãntsã.
4 Mam na n sãama y tẽn-kugã. Mam na n wãa y wisd tẽn-kugã.+ M na n loba yãmb neb nins sẽn ki wã y bõn-naandsã sẽn yaa bõn-yoodã* taoore.+
5 Mam na n loba Israyɛll nebã kũ-rãmb b bõn-naandsã sẽn yaa bõn-yoodã taoore. M na n sãeega y kõabã n gilg y tẽn-kugã.+
6 Yãmb sẽn beẽ fãa, tẽnsã na n lebga raboodo,+ tɩ y zĩ-zãntsã me siig n lebg raboodo.+ B na n pãba yãmb tẽn-kugã n wã. Y bõn-naandsã sẽn yaa bõn-yoodã na n sãamame. Y wisd tẽn-kugã na n wãame. Y nusã tʋʋm na n menemame.
7 Neb nins b sẽn kʋ wã na n lʋɩɩ yãmb sʋka.+ Woto, y na n bãngame tɩ mam yaa a Zeova.+
8 “‘“La mam na n basame tɩ neb kelle, bala b sã n wa na n sãeeg yãmb tɩ y kẽ soolem toɛy-toɛyã, yãmb neb kẽer n na n põs sʋʋgã buud toɛy-toɛyã sʋka.+
9 Sẽn na n põs-bã na n tẽega mam yell buud nins b sẽn na n tall-b n kẽng yembdã sʋka.+ B na n bãngame tɩ b sẽn pa maan sɩd ne maam tɩ b sũyã zãag ne maamã, n paas b yamã sẽn kẽ b bõn-naandsã sẽn yaa bõn-yoodã,+ sãama mam sũurã wʋsgo.+ Yãnd na n yõk-b lame, tɩ b kisg wẽngã la tʋʋm-wẽns nins fãa b sẽn da maanã.+
10 B na n bãngame tɩ mam yaa a Zeova, la tɩ mam sẽn yeel tɩ m na n kɩtame tɩ yel-beed wa b zugã pa gom-vɩɩd ye.”’+
11 “Ad a Zeova sẽn yaa Zu-soab sẽn ka to wã sẽn yeele: ‘Wẽ nug-poak la f tĩng f naoorã tẽnga, la f yãb wẽngã la tʋʋm-wẽns nins fãa Israyɛll buudã sẽn maanã yĩnga. Bala sʋʋg ne kom la bã-loangdg n na n kʋ-ba.+
12 Bã-loangdg n na n kʋ sẽn be-a zĩ-zãrgẽ wã. Sʋʋg n na n kʋ sẽn pẽ-a wã, tɩ kom kʋ neb a taabã. Mam na n kiiga m sũ-puugrã fãa b zugu.+
13 B neb nins b sẽn kʋ wã sã n wa rʋr b bõn-naandsã sẽn yaa bõn-yoodã sʋk n gilg b tẽn-kugã,+ la b rʋr kunkubr sẽn zãnt fãa zugu, tãensã fãa zutu, tɩ-bedr sẽn tar vãad wʋsg fãa tẽngre, la tɩ-bɛdã wilã tẽngre, zĩis nins b sẽn da yõogd wisd n kõt b bõn-naandsã sẽn yaa bõn-yoodã+ sẽn na yɩl n sigs b sũyã, yãmb na n bãngame tɩ mam yaa a Zeova.+
14 Mam na n tẽega m nug n sɩbg-ba, la m kɩt tɩ b soolmã lebg raboogo. Zĩis nins fãa b sẽn be wã na n lebga zĩ-vɩɩd n yɩɩd we-raoog ning sẽn pẽ Dibla wã. Woto, b na n bãngame tɩ mam yaa a Zeova.’”
Vẽnegr toor-toore
^ Ebre gom-bilã tõe n dat n bilga “bĩndu.” B wae n pʋta gom-bi-kãng n na n paoog bũmb ning yell b sẽn gomdã.
