Koɛɛg soab sebre 10:1-20
10 Yalemd bilf sãamda yam la ziiri,+ wa zõ-kɩɩms sẽn sãamd parfẽ-maand kaam tɩ lebg yũugã.
2 Yam soab sũur tar-a lame n dabd zĩ-sõngẽ,* la yalem sũur tar-a lame n dabd wẽng zĩigẽ.*+
3 Yalem sẽn dɩk sor ning fãa, a pa na n tʋm ne yam ye.+ La a kɩtdame tɩ nebã fãa bãng t’a yaa yalma.+
4 Naab sũur sã n puug ne foom bɩ f ra serg ye.+ Bala bʋgsem boogda yel-wẽn-kãsemse.+
5 Bũmb sẽn sãamd sũur la mam yã tẽngã zug* ka. Yaa kongr nins zu-soben-dãmbã sẽn kongdã.+
6 B zĩniga yalemb naam zĩisẽ, la b zĩnig arzɛgs rãmb* zĩ-zaalsẽ.
7 Mam yãa tʋm-tʋmdb sẽn zao wed-moose, tɩ nanambs kẽnd nao wa tʋm-tʋmdba.+
8 Ned sẽn tuud bok tõe n wẽneg n lʋɩɩ a pʋgẽ,+ la ned sã n poogd kug lalga, waaf n tõe n kɛ-a.
9 Ned sã n peesd kuga, tõe n pogl-a lame. La ned sã n wesd raoodo, yell n yɛgd-a.
10 Lar noor sã n mud tɩ b pa saas-a, yaa tɩlɛ tɩ ned ning sẽn tar-a n tʋmdẽ wã wɩsg a menga. La yam sõngda ned t’a tõogd a sẽn maande.
11 Waaf sã n kɛ ned tɩ b nan pa saool-a, sẽn mi-a waaf saoolg sõma tʋʋmd pa le tar yõod ye.
12 Yam soab no-goam wata ne barka,+ la yalem no-goam n wat ne a sãoongo.+
13 Goam nins sẽn yit a noorẽ pipi wã yaa yalemdo,+ la a yaoolem goamã yaa gãeemd sẽn wat ne sãoongo.
14 La yalem gomdame n pa sĩndidẽ ye.+
Ninsaal pa mi bũmb ning sẽn na n maan ye. Ãnd n tõe n togs-a bũmb ning sẽn na n maan a loogr poore?+
15 Yalem tʋʋm-toogã yaamsd-a lame, bala a pʋd n pa mi a sẽn na n tũ sor ning n ta tẽngã pʋg ye.
16 Tẽng naab sã n yaa biiga,+ tɩ nanambsã sɩngd tigr maaneg yibeoogo, yaa kayto!
17 La na-biig sã n yaa tẽng naaba, t’a nanambsã rɩt wakat sẽn zems n na n paam pãng la pa sẽn na n yũ rãam n tɩge,+ ad tẽn-kãng nebã sɩd tara sũ-noogo!
18 Kʋɩɩng sẽn loog noor yĩnga, roogã zug nargame. La nus sẽn pa tʋmd yĩnga, roogã yũndame.+
19 Rɩɩb maana laad yĩnga, tɩ divẽ paasd vɩɩm noosem.+ La ligd kɩtdame tɩ f paam f sẽn dat fãa.+
20 Baa f tagsg pʋgẽ* bɩ f ra tʋʋs rĩmã,+ la f ra tʋʋs arzɛk soab f ro-gãagẽ ye. Bala liuul* tõe n dɩka koɛɛgã n tɩ taase, wall bõn-yɩgdg tõe n tɩ togsa goamã.
Vẽnegr toor-toore
^ Ebre, “bee a nug-rɩtgo.”
^ Ebre, “bee a nug-goabga.”
^ Ebre, “wĩntoogã tẽngr.”
^ Bɩ, “sẽn tar-b minimã.”
^ Pa rẽ bɩ, “f gãagẽ.”
^ Ebre, “saasẽ bõn-yɩgdg.”
