Koɛɛg soab sebre 12:1-14
12 Dẽ wã, tẽeg f Naandã sẽn yaa kãsengã yell f bi-bɩɩlem wakate,+ tɩ f toogã* wakat nan pa ta,+ la tɩ yʋʋm nins f sẽn na n yeel tɩ vɩɩmã pa le noom foomã nan pa ta ye.
2 Nand tɩ wĩntoogã, vẽenemã la kiuugã n paas ãdsã lebg lika,+ la tɩ sawatã lebg n wa saagã niib poore,*
3 la nand tɩ roogã gũudb sɩng rigbu, tɩ rap nins sẽn tar pãngã zõonde, tɩ pagbã bas werb b sõorã sẽn paoodã yĩnga, tɩ zĩigã lebg lik ne pagb nins sẽn da be fenetaẽ wã n lɩkdẽ wã,+
4 nand tɩ kʋɩlensã sẽn tees sorã page, tɩ neerã bʋʋr booge, tɩ liuul bʋrg nekd neda, la tɩ kom-pugli nins sẽn da yɩɩndã fãa koees pãng boogã+ wakat pa ta ye.
5 Sẽn paase, f zoeta zĩ-zãntse, la f yɛɛsdẽ tɩ sorã pida ne rabeem. Amand tɩɩgã ningda puudu,+ sʋʋr vũnumdame, kapr tɩɩg pusgdame, bala ninsaal dɩka sor n dabd a yir ning a sẽn na n zĩnd n kaoosã,+ tɩ kʋ-yãbdbã kẽnd sorã zugu.+
6 Tẽeg f Naandã sẽn yaa kãsengã yell nand tɩ wanzuri wĩirã kaooge, tɩ sãnem laagã wã, tɩ yʋʋrã sẽn be ko-bundgã zĩigẽ wã wãage, la tɩ kud-gilg ning b sẽn palg wĩir n takd koom bulgẽ wã wesge.
7 Dẽ, tomã lebda tẽngã tomẽ+ wa a sẽn da yaa to-to wã, tɩ vʋʋsmã* leb Wẽnnaam sẽn yaa soab ning sẽn da kõ-a wã nengẽ.+
8 Sẽn tigimd-a nebã+ yeelame yaa: “Yaa zaalem fasɩ! Bũmb fãa yaa zaalem!”+
9 Sẽn tigimd-a nebã pa paam yam bal ye. A ra zãmsda nebã bũmb ning a sẽn mi wã me,+ la a tags neere, n vaees n zulg n na n gʋls yel-bũn wʋsg pʋgd-pʋgdga.+
10 Sẽn tigimd-a nebã maaga a yĩng n bao gom-noodo,+ la a gʋls goam sẽn yaa sɩd la sẽn zems kɛpɩ.
11 Yam dãmbã goam yaa wa bãn-sɩlems b sẽn tar n lekd niisi.+ La b goamã b sẽn tigmã yaa wa põent-rãmb b sẽn ka sõma. Gom-kãens fãa yita pe-kɩɩm-yɛng nengẽ.
12 La sẽn zʋʋg bõn-kãensã, m biiga, mam keoogda foo: Bãng tɩ sɛb wʋsg maaneg pa tar tɛk ye. La f sã n dɩkd sẽk wʋsg n karemd-ba, wata ne yaamse.+
13 D sẽn wʋm bũmba fãa wã, ad koɛɛgã baasgo: Zoe Wẽnnaam+ la f sak a noyã.+ Yaa ninsaal sẽn segd n maanã la woto.+
14 Bala Wẽnnaam na n bʋʋ ãdem-biisã b tʋʋmã fãa poorẽ, baa bũmb ning fãa sẽn solge, n wilg sã n yaa sõma bɩ wẽnga.+
