Koɛɛg soab sebre 2:1-26
2 Dẽ, mam yeela m sũurẽ yaa: “Mam na n nooga m yõor n bãng bõn-yõod sã n bee yõ-noogr pʋgẽ.” La gese, rẽ me yaa zaalem.
2 Mam yeelame yaa: “Laad yaa gãeemdo!”
La m sok yaa: “Yõ-noogr yõod yaa bõe?”
3 Mam yãka yam n na n yũ divẽ n bãng a yõodo,+ la m da ket n tara m yamã. Mam pʋd n tʋma yalemd n na n bãng bũmb ning sẽn yaa sõma n yɩɩd ne ninsaalbã tɩ b maan tẽngã zugu, b vɩɩmã wakat sẽn yaa bilfã sasa.
4 Mam tʋma tʋʋm-kãsemse.+ Mam mee roto,+ la m sel viyn tɩɩs m meng yĩnga.+
5 Mam tuka zẽed zĩisi, b bɛd la b bõonego, n sel tɩɩs buud toor-toor sẽn womd biis b pʋsẽ.
6 Mam maana bãgs n na n zãgsd tɩ-poalã m tɩɩsã zĩigẽ.
7 Mam paama tʋm-tʋmdba, pagb la rapa.+ Mam talla tʋm-tʋmdb sẽn dog mam yirã.* Mam paama rũms wʋsg me, niis la rũm-bõonego,+ n yɩɩd neb nins fãa sẽn deng maam Zerizalɛmmã.
8 Mam paama wanzuri ne sãnem wʋsgo,+ rĩm-dãmb la soolem toɛy-toɛy laogo.+ Mam baoo yɩɩn-yɩɩndb wʋsg m meng yĩnga, pagb la rapa, n paas bũmb ning sẽn kõt ninsaalbã kom-dibli sũ-noog wʋsgã: Paga, n-ye, pagb wʋsgo.
9 Woto, mam yɩɩ kãseng n yɩɩg neb nins fãa sẽn deng maam Zerizalɛmmã.+ La mam yamã kell n paa ne-ma.
10 Mam pa mong m meng bũmb baa a ye mam sẽn tʋlg ye.*+ Mam pa mong m sũurã bũmb baa a ye sẽn noogd sũuri, bala mam sũurã ra nooma ne m tʋʋm-toogã fãa, la rẽnda n yɩ mam tʋʋm-toogã fãa keoore.*+
11 La mam sẽn wa n tags tʋʋm nins fãa mam nugã sẽn tʋmã, la tʋʋm-toog ning fãa mam sẽn nams n tʋmã yellã,+ mam mikame tɩ bũmba fãa yaa zaalem. Yaa wa ned sẽn digd sobgo.+ Baa fʋɩ kae tẽngã zug* ka n sɩd tar yõod ye.+
12 Rẽ n so, tɩ mam maag m yĩng n tags yam la gãeemd ne yalemd yelle.+ (Bala bõe la ned ning sẽn na n pʋgl rĩmã na n maane? Yaa bũmb ning b sẽn zoe n maanã bala.)
13 La mam mikame tɩ yam yõod yɩɩda yalemdo,+ wa vẽenem yõod sẽn yɩɩd likã.
14 Yam soab nin pukame,*+ la yalem kẽnda lik pʋgẽ.+ Mam wa n bãngame me tɩ b fãa baasg yaa yembre.+
15 Dẽ, mam yeela m sũurẽ yaa: “Bũmb ning sẽn paamd yalmã n na n paam ma-me.”+ Rẽ wã, mam sẽn bao yam wʋsgã yõod yaa bõe? Woto, mam yeela m sũurẽ yaa: “Yãoã me yaa zaalem.”
16 Bala b pa na n tẽeg yam soab yell n yɩɩg yalem ye.+ Wakat n wat tɩ b na n yĩm bãmb fãa yelle. La wãn to la yam soab na n ki? Wa yalem bala.+
17 Woto, mam wa n kisga vɩɩmã.+ Bala ne maam, bũmb ning fãa sẽn maand tẽngã zug ka wã yaa naongo. Bala bũmba fãa yaa zaalem.+ Yaa wa ned sẽn digd sobgo.+
18 Mam wa n kisga tʋʋm-toog ning fãa mam sẽn tʋm tẽng zug ka wã,+ bala mam na n loog n basa rẽ tɩ sẽn na n ledg-a maamã sooge.+
19 La ãnd n mi a sã n na n yɩɩ yam soab bɩ yalma?+ La baasgo, yẽ n na n soog bũmb nins fãa mam sẽn dɩk m pãngã la yam wʋsg n bao tẽngã zug ka wã. Yãoã me yaa zaalem.
20 Woto yĩnga, mam sũur sɩnga sãoong wʋsg ne tʋʋm-toogã fãa m sẽn nams n tʋm tẽngã zug ka wã.
21 Bala ninsaal tõe n tʋma wʋsg ne yam, bãngr la minim, la a na n basa a sẽn paamã fãa* ne ned sẽn pa tʋm n paame.+ Rẽ me yaa zaalem, la yel-beed meng-menga.
22 Bõe yõod la ned paamda, tʋʋm-toog ning fãa a tʋlsmã* sẽn kɩtd t’a tʋmd wʋsg tẽngã zug ka wã yĩnga?+
23 Bala a vɩɩmã tõre, a tʋʋmã kõt-a-la toog ne sũ-sãamse,+ la baa yʋngo, a sũurã pa vʋʋsd ye.+ Yãoã me yaa zaalem.
24 Bũmb ka be n são ne ninsaal n yɩɩd a sẽn na n dɩ la a yũ, n noog a sũur a tʋʋm-toogã yĩng ye.+ Mam yãame tɩ rẽ me yaa Wẽnnaam kũuni.+
25 Bala ãnd n dɩt la a yũud sõma n yɩɩd maam?+
26 Ned sã n tat Wẽnnaam yam, a kõt-a-la yam ne bãngr la sũ-noogo.+ La a kɩtdame tɩ yel-wẽn-maand tʋmdẽ la a tigsd n na n kõ ned ning sẽn tat Wẽnnaam yamã.+ Rẽ me yaa zaalem. Yaa wa ned sẽn digd sobgo.
Vẽnegr toor-toore
^ Ebre, “zak kom-dibli.”
^ Bɩ, “pʋɩɩre.”
^ Ebre, “mam ninã sẽn kos ye.”
^ Ebre, “wĩntoogã tẽngr.”
^ Ebre, “bee a zugẽ.”
^ Bɩ, “a pʋɩɩrã.”
^ Ebre, “a sũurã modgrã.”