Koɛɛg soab sebre 6:1-12
6 Mam yãa yel-beed a to tẽngã zug* ka sẽn wae ninsaalbã sʋka:
2 Wẽnnaam kõta nina arzɛgs ne paoong la ziiri, tɩ bũmb nins a sẽn datã baa a ye pa paoogd-a ye. La Wẽnnaam pa basd t’a rɩ b yõodo, tɩ sãan yaool n tõe n dɩ bõn-kãens yõodo. Yãoã me yaa zaalem, la yel-beed meng-menga.
3 Ned sã n dog kamb koabga, n vɩɩmd n kaoos hal n kʋʋle, la a pa rɩ a bõn-sõma wã yõod n yaool n ki, mam yetame tɩ biig sẽn dog kɩɩng são-a lame.+
4 Bala bi-kãng waa zaalem bal n lebg n loog lik pʋgẽ, t’a yʋʋrã menem lik pʋgẽ.
5 Baa a sẽn pa tol n yã wĩntoogã bɩ n pa bãng baa fʋɩ wã, a ket n sãoo* nin-kãnga.+
6 Ned sã n vɩɩmd yʋʋm tus a yiib n pa tall sũ-noogo, a yõod yaa bõe? Ninsaalbã fãa pa rabd zĩ-yɛng sɩda?+
7 Ninsaal tʋʋm-toogã fãa yaa sẽn na n kõ a noorã.+ La ne rẽ fãa, bũmb pa sekd-a ye.
8 Yam soab yɩɩda yalem ne bõe,+ wall naong soab sẽn mi a sẽn na n mao ne vɩɩmã yɛl* to-to wã yõod yaa bõe?
9 Ned sẽn na n maand sũ-noog ne bũmb ning a nifã sẽn ne wã n são a sẽn na n saad n pʋgd bũmb nins a sẽn tʋllã. Rẽ me yaa zaalem. Yaa wa f sẽn digd sobgo.
10 Bũmb ning fãa sẽn be zoe n tara yʋʋre, la b mii ninsaal sẽn yaa a soaba. A pa tõe n wẽ no-koeemd ne soab ning pãng sẽn yɩɩd-a wã ye.
11 Goam* sã n yaa wʋsgo, maneg n yaa zaalem. La goam wʋsg yõod yaa bõe ne ninsaala?
12 Ãnd n mi sẽn yaa sõma n yɩɩd ne ninsaal t’a maan a vɩɩmã sẽn ka yõodã la sẽn loogd wa sulunsukã wakate?+ Bala ãnd n tõe n togs ninsaal bũmb ning sẽn na n maan tẽngã zug ka a loogr poore?
Vẽnegr toor-toore
^ Ebre, “wĩntoogã tẽngr.”
^ Ebre, “tara vʋʋsg n yɩɩd.”
^ Ebre, “a sẽn na n kẽn nin-vɩɩsã taoor.”
^ Pa rẽ bɩ, “Teed.”
