Maan-kʋʋr sebre 14:1-57
14 A Zeova kell n goma ne a Moyiiz n yeele:
2 “Ad noy nins wãoor sẽn segd n tũ daar ning b sẽn na n wilg t’a lebga yɩlemdã, b sẽn na n tall-a n wa maan-kʋʋdã nengẽ daar ningã.+
3 Maan-kʋʋdã na n yii sik-zĩigã kɩreng n maag a yĩng n ges-a. Sã n mik tɩ wãoodã saame,
4 maan-kʋʋdã na n yeel-a lame t’a wa ne liuun-vɩɩs a yiib sẽn yaa yɩlma, sɛɛdr daoogo, peen-miuug la izop* a yɩlgrã yĩnga.+
5 Maan-kʋʋdã na n yeelame tɩ b kʋ liuul a ye wã tãnd laok pʋgẽ, tãnd laok sẽn tar koom b sẽn yãk ko-zoetem zĩigẽ.
6 La maan-kʋʋdã segd n dɩka liuun-vɩɩgã n paas sɛɛdr daoogã, peen-miuugã la izopã n suk-b fãa liuul ning b sẽn kʋ ko-zoetmã pʋgẽ wã zɩɩmẽ wã.
7 Rẽ poore, a na n mesa zɩɩmã naoor a yopoe ned ning sẽn yɩlgd a meng ne wãoodã zugu, la a yeel t’a yaa yɩlemde. A na n basa liuun-vɩɩgã t’a yɩk n kẽ weoogã.+
8 “Ned ning sẽn yɩlgd a mengã segd n pegsa a futã, n põng a zugã ne a yĩngã kõbdã fãa la a so koom. A na n lebga yɩlemde. Rẽ poore, a tõe n waa sik-zĩigẽ wã, la rasem a yopoe pʋgẽ, a pa segd n kẽ a fu-roogã pʋgẽ ye.
9 Rasem a yopoe-n-soabã, a segd n põnga a zugã zoobdo, a lemdã la a nin-kõbdã fãa. A sã n põng a kõbdã fãa poore, a na n pegsa a futã la a so koom n yɩ yɩlemde.
10 “Rasem a nii-n-soabã, a na n waa ne pe-ra-poal a yiib sẽn pa tar zanga, pe-sadg sẽn pa yɩɩd yʋʋmd n pa tar zanga,+ zom-bãaneg efa pʋɩ a tãab pʋɩ piig zug* sẽn kalem ne kaam, kood biis kũun+ yĩnga, la kaam log* a yembre.+
11 Maan-kʋʋd ning sẽn yeel tɩ ned ning sẽn yɩlgd a mengã yaa yɩlemdã na n tall-a-la ne maandã, n wa a Zeova taoore, sɛk-roogã rignoorẽ.
12 Maan-kʋʋdã na n yõka pe-raoog a ye n kõ tɩ yɩ taal maoongo,+ ne kaam log a yembrã. A na n yuum-b-la poorẽ la taoor tɩ yɩ maoong b sẽn yuumd a Zeova taoore.+
13 Rẽ poore, a na n kodga pe-ra-pollã zĩig ning b sẽn wae n koot yel-wẽnd maoongã ne maoong sẽn yõogd bugmã,+ rat n yeel tɩ zĩ-sõng pʋgẽ. Bala taal maoongã yaa maan-kʋʋdã rẽnda,+ wa yel-wẽnd maoongã. Yaa bũmb sẽn yaa sõng wʋsgo.+
14 “Maan-kʋʋdã na n yãka taal maoongã zɩɩmã, n tẽk ned ning sẽn yɩlgd a mengã rɩtg tʋbrã, a rɩtg nug-raoogã, la a rɩtg na-raoogã.
15 Maan-kʋʋdã na n dɩka kaam log a yembrã+ n pʋdg bilf a meng goabg nug-pʋgẽ wã.
16 Maan-kʋʋdã na n suka a rɩtg nug-bilã kaamã sẽn be a goabg nug-pʋgẽ wã, n yãk kaamã ne a nug-bilã n mes a Zeova taoor naoor a yopoe.
17 Rẽ poore, a na n yãka kaamã sẽn ket a nug-pʋgẽ wã n tẽk ned ning sẽn yɩlgd a mengã rɩtg tʋbrã, a rɩtg nug-raoogã, la a rɩtg na-raoogã, taal maoongã zɩɩm zugu.
18 Maan-kʋʋdã na n kiiga kaamã sẽn ket a nug-pʋgẽ wã ned ning sẽn yɩlgd a mengã zugẽ, n maan paasg* a yĩng a Zeova taoore.+
19 “Maan-kʋʋdã na n kʋʋ yel-wẽnd maoongã,+ n maan paasg ned ning sẽn yɩlgd a meng a rẽgdã yĩngã yĩnga. Rẽ poore, a na n kodga maoong sẽn yõogd bugmã.
20 Maan-kʋʋdã na n yõoga maoong sẽn yõogd bugmã ne kood biis kũunã+ tẽn-kugrã zugu, n maan paasg a yĩnga,+ t’a yɩ yɩlemde.+
21 “La a sã n yaa naong soab n pa tõe n paam bõn-kãense, a na n waa ne pe-ra-poll a ye tɩ yɩ taal maoongo, maoong b sẽn yuumd yĩnga, sẽn na yɩl n maan paasg a meng yĩnga, n paas zom-bãaneg efa pʋɩɩr a yembr pʋɩ piig zug* sẽn kalem ne kaam, kood biis kũun yĩnga, la kaam log a yembre,
22 ne wal a yiib bɩ marwan-bi a yiib wa sẽn zems a tarem. A yembr na n yɩɩ yel-wẽnd maoongo, t’a to wã yɩ maoong sẽn yõogd bugum.+
23 Rasem a nii-n-soabã,+ a na n tall-b lame n wa kõ maan-kʋʋdã sɛk-roogã rignoorẽ, a Zeova taoore, sẽn na yɩl tɩ b yeel t’a yaa yɩlemde.+
24 “Maan-kʋʋdã na n deega taal maoongã pe-ra-pollã+ ne kaam log a yembrã, n yuum poorẽ la taoor tɩ yɩ maoong b sẽn yuumd a Zeova taoore.+
25 Rẽ poore, a na n kodga taal maoongã pe-ra-pollã, n yãk taal maoongã zɩɩmã n tẽk ned ning sẽn yɩlgd a mengã rɩtg tʋbrã, a rɩtg nug-raoogã la a rɩtg na-raoogã.+
26 Maan-kʋʋdã na n pʋdga kaamã bilf a meng goabg nug-pʋgẽ wã,+
27 la a yãk kaamã sẽn be a goabg nug-pʋgẽ wã ne a rɩtg nug-bilã n mes a Zeova taoor naoor a yopoe.
28 Rẽ poore, maan-kʋʋdã na n yãka kaamã sẽn be a nug-pʋgẽ wã n tẽk ned ning sẽn yɩlgd a mengã rɩtg tʋbrã, a rɩtg nug-raoogã la a rɩtg na-raoogã, zĩis nins a sẽn tẽgs taal maoongã zɩɩmã.
29 Maan-kʋʋdã na n kiiga kaamã sẽn ket a nug-pʋgẽ wã ned ning sẽn yɩlgd a mengã zugẽ, sẽn na yɩl n maan paasg a yĩng a Zeova taoore.
30 “A na n kõo wall a ye wã bɩ marwan-bil a ye wã wa sẽn zems a tarmã,+
31 a sẽn tõe n da a soabã tɩ yɩ yel-wẽnd maoongo, la a kõ a to wã tɩ yɩ maoong sẽn yõogd bugum,+ n naag kood biis kũunã. Maan-kʋʋdã na n maana paasg ned ning sẽn yɩlgd a mengã yĩng a Zeova taoore.+
32 “Woto yaa tõog b sẽn kõ ned wãood sẽn da yõk wɛɛngẽ, t’a yaool n pa tar paoong wakat ning b sẽn na n yeel t’a yaa yɩlemdã ye.”
33 Rẽ poore, a Zeova yeela a Moyiiz ne a Aarõ yaa:
34 “Yãmb sã n wa kẽ Kanaã soolmẽ wã,+ soolem ning mam sẽn na n kõ yãmb tɩ y soogã+ pʋgẽ, tɩ mam kɩt tɩ wãood+ yõk roog yãmb tẽngã pʋgẽ,
35 ned ning sẽn so roogã segd n wa yeela maan-kʋʋdã yaa: ‘Bãag buud n puk mam doogã pʋgẽ.’
36 Maan-kʋʋdã na n kɩtame tɩ b yiis roogã teed fãa nand t’a wa maag a yĩng n ges bãagã, sẽn na yɩl t’a ra wa yeel tɩ bũmb nins fãa sẽn be roogẽ wã yaa rẽgd ye. Rẽ poore, maan-kʋʋdã na n wa kẽeme n ges roogã.
37 A sã n maag a yĩng n ges bãagã, n mik tɩ bãagã bee roogã lalg zugu, n tẽgs kõodr-kõodr la miid-miidu, la tɩ wõnda sẽn tẽgsẽ wã võd n kẽe lalgã pʋgẽ,
38 a na n yii roogã pʋgẽ n yaas rignoorẽ wã, n yeel tɩ b pag roogã rasem a yopoe.+
39 “Maan-kʋʋdã na n lebg n wa gesa roogã rasem a yopoe-n-soabã. Sã n mik tɩ bãagã taa zĩis a taab roogã lalg zugu,
40 a na n kɩtame tɩ b yãgs kug nins bãagã sẽn ta wã, n yi tẽngã kɩreng n tɩ lob zĩig sẽn yaa rẽgdẽ.
41 Rẽ poore, a na n kɩtame tɩ b kẽ roogã pʋg n pẽeg lalgã zãnga, la b wʋk boalgã ne tãndã b sẽn pẽegã n yi tẽngã kɩreng n tɩ lob zĩig sẽn yaa rẽgdẽ.
42 B na n baoo kug a taab n ledg kug nins b sẽn yãgsã. B segd n me-b-la ne tãnd a to, la b bol roogã yɛsa.
43 “La b sẽn yãgs kugã, n pẽeg roogã la b lebs n bol-a wã poore, bãagã sã n le puk roogã zĩis a taaba,
44 maan-kʋʋdã na n le kẽeme n ges-a. Sã n mik tɩ bãagã taa zĩis a taab roogã pʋgẽ, yaa wãood sẽn yaa toaag+ n yõk roogã. Roogã yaa rẽgdo.
45 A na n kɩtame tɩ b lub roogã, n wʋk a kugã, a raadã, a boalgã la a tãndã fãa n yi tẽngã kɩreng n tɩ lob zĩig sẽn yaa rẽgdẽ.+
46 La wakat ning b sẽn kɩt tɩ b pag roogã,+ ned sã n kẽ a pʋgẽ, a na n yɩɩ rẽgd n tãag zaabre.+
47 Ned sã n gãand a pʋgẽ, a segd n pegsa a futã. Ned sã n zĩnd a pʋgẽ n dɩ, a segd n pegsa a futã.
48 “La b sẽn lebs n bol roogã poore, maan-kʋʋdã sã n wa, n mik tɩ bãagã pa ta zĩis a taab roogã pʋgẽ, a na n yeelame tɩ roogã yaa yɩlemde, bala bãagã saame.
49 Sẽn na yɩl n yɩlg roogã n yiis rẽgdã,* a na n dɩka liuuli a yiibu, sɛɛdr daoogo, peen-miuugu, la izope.+
50 A segd n kʋʋ liuul a ye wã tãnd laok pʋgẽ, tãnd laok sẽn tar koom b sẽn yãk ko-zoetem zĩigẽ.
51 Rẽ poore, a na n dɩka sɛɛdr daoogã, izopã, peen-miuugã la liuun-vɩɩgã, n suk-b fãa liuul ning b sẽn kʋ wã zɩɩmẽ wã, la ko-zoetmã pʋgẽ. A segd n teesa roogã n mes naoor a yopoe.+
52 A na n talla liuulã zɩɩmã, ko-zoetmã, liuun-vɩɩgã, sɛɛdr daoogã, izopã ne peen-miuugã n yɩlg roogã n yiis rẽgdã.*
53 Rẽ poore, a na n talla liuun-vɩɩgã n yi tẽngã kɩreng n bas-a t’a yɩk n kẽ weoogã. Woto, a na n yiisa rẽgdã* roogã zugu, t’a yɩ yɩlemde.
54 “Woto yaa tõog wãood buud fãa wɛɛngẽ, zug wall toɛɛng bãaga,+
55 fuug+ wall roog+ wãood wɛɛngẽ,
56 ned yĩn-gãong sẽn wa n yãk zĩig n mode, sẽn tar yãmd wall sẽn tẽgs+ wɛɛngẽ,
57 sẽn na yɩl n wilg bũmb sã n yaa rẽgd wall bũmb sã n yaa yɩlemde.+ Woto yaa tõog wãoodã wɛɛngẽ.”+
Vẽnegr toor-toore
^ Ges-y gom-biis võor bilgrã zĩigẽ.
^ Efa pʋɩ a tãab pʋɩ piig zug zemsa litr a 6,6. Ges-y vẽnegr ning sẽn yaa B14.
^ Log zemsa litr 0,31. Ges-y vẽnegr ning sẽn yaa B14.
^ Ges-y gom-biis võor bilgrã zĩigẽ.
^ Efa pʋɩɩr a yembr pʋɩ piig zug zemsa litr a 2,2. Ges-y vẽnegr ning sẽn yaa B14.
^ Ebre, “yel-wẽndã.”
^ Ebre, “yel-wẽndã.”
^ Ebre, “maana paasg.”
