Sebr b sẽn tool Rom dãmbã 12:1-21
12 Woto yĩnga, m saam-biisi, mam bõosda yãmb Wẽnnaam nimbãan-zoeerã yĩnga, tɩ y kõ y yĩnsã+ tɩ yɩ maoong sẽn vɩ, sẽn yaa sõngo,+ sẽn tat Wẽnnaam yam, rat n yeel tɩ y tʋm Wẽnnaam tʋʋmdã ne y yamã.+
2 Bɩ y ra le bas tɩ dũni-kãngã* neb kɩt tɩ y yɩ wa bãmb ye. Bɩ y maneg y yamã tɩ kɩt tɩ y toeeme,+ n tõog n kɩs sɩd+ tɩ Wẽnnaam daabã yaa sõma, tɩ sakda ne-a, la tɩ zemsa zãnga.
3 Wẽnnaam barkã* b sẽn kõ maamã maasem yĩnga, mam yeta yãmb ned kam fãa t’a ra tags t’a tara yõod wʋsg ye.+ La bɩ a tagsa wã yɩ tagsa sẽn wilgd t’a tara yam-sõngo, wa sẽn zems tẽeb ning Wẽnnaam sẽn kõ-a wã.*+
4 Yaa wa tõnd yĩngã sẽn tar wil wʋsgo,+ tɩ wilã fãa tʋʋm yaa toor-toorã.
5 Woto me, baa tõnd sẽn yaa wʋsgã d yaa yĩng a yembr Kirist pʋgẽ, la tõnd ned kam fãa yaa will sẽn so a to.+
6 Rẽnd tõnd tara kũun sẽn yaa toor-toore, wa sẽn zems Wẽnnaam barkã* b sẽn kõ tõndã. Woto wã, sã n yaa bãngr-goam togsg kũun la b kõ tõndo,+ bɩ d togs bãngr-goamã wa sẽn zems tõnd tẽebã sẽn yaa to-to.
7 Sã n yaa tʋʋmd la b kõ-do, bɩ d wɩng ne tʋʋm-kãnga. Bɩ ned ning sẽn zãmsd a taab wɩng ne a zãmsgã.+
8 Bɩ ned ning sẽn kengd a taab raood* wɩng ne raood kengre.*+ Bɩ ned ning sẽn kõt* kõ ne yamleoogo,+ tɩ ned ning sẽn lʋɩt taoor maan rẽ sõma,*+ tɩ ned ning sẽn zoet a taab nimbãaneg maan dẽ ne sũ-noogo.+
9 Bɩ yãmb nonglmã yɩ nonglem sẽn pa naag ne pʋ-lika.+ Kisg-y sẽn yaa wẽnga,+ la y gãd sẽn yaa sõma kãn-kãe.
10 Nong-y taab wʋsg wa zag-yɛng neba. Yɩt-y pipi n waoogd taaba.+
11 Bɩ y yɩ neb sẽn tʋmd wʋsgo,* la y ra yɩ kʋɩɩmb ye.*+ Bɩ y bas tɩ vʋʋsem sõngã kɩt tɩ y tall yẽesem.+ Tʋm-y-yã a Zeova* tʋʋmdã wa yembse.+
12 Maan-y sũ-noog ne bũmb ning y sẽn saagd n na n wa paamã. Tõog-y toog namsg sasa.+ Wɩng-y ne pʋʋsgo.+
13 Pʋɩ-y y sẽn tarã ne nin-sõamyã wã tɩ ned kam fãa paam sẽn yaa tɩlɛ ne-a.+ Kɩt-y tɩ sãamb-reegr lebg y minungu.+
14 Ningd-y neb nins sẽn namsd yãmbã zut barka.+ Ning-y barka, la y ra kãab wẽng ye.+
15 Maan-y sũ-noog ne neb nins sẽn maand sũ-noogã, la y yãb ne neb nins sẽn yãbdã.
16 Ges-y neb a taabã wa y sẽn get y meng to-to wã. Ra tagsd-y bõn-kãsems yell ye.* Bas-y tɩ y yamã kẽ bũmb nins sẽn pa bõn-kãsemsã.+ Ra tags-y tɩ y tara yam wʋsg ye.+
17 Ra maan-y ned baa a ye wẽng n lebs ye.+ Tagsd-y bũmb nins sẽn yaa sõma nebã fãa nifẽ wã yelle.
18 Sã n tõeyã, la sã n bee ne yãmb bɩ y kɩt tɩ laafɩ zĩnd yãmb ne nebã fãa sʋka.+
19 M nin-nongdse, da rok-y y sũur y toor ye. Bas-y weer n kõ sũ-puugrã.*+ Bala b gʋlsame: “A Zeova* yeelame yaa: ‘Sũ-dokr yaa maam n so. Maam n na n keo.’”+
20 La “kom sã n tar f bɛ bɩ f kõ-a rɩɩb t’a rɩ. Ko-yũud sã n tar-a, bɩ f kõ-a koom t’a yũ. Bala fo sã n maand woto, yaa wa fo samda bug-saal a zugẽ.”*+
21 Da bas tɩ wẽng tõog foom ye. Bɩ f kell n maan neer n tõog wẽnga.+
Vẽnegr toor-toore
^ Ges-y gom-biis võor bilgrã zĩigẽ, zĩig ning b sẽn gʋls tɩ “Dũniyã.”
^ Bɩ, “lohorem d sẽn pa segd ne wã.”
^ Bɩ, “sẽn pʋɩ n kõ-a wã.”
^ Bɩ, “lohorem d sẽn pa segd ne wã.”
^ Bɩ, “sagend.”
^ Bɩ, “saglgo.”
^ Bɩ, “pʋɩt.”
^ Bɩ, “ne a sũur fãa.”
^ Bɩ, “sẽn tar yẽesem.”
^ Bɩ, “ra maan-y laas-laas y tʋʋmã pʋgẽ ye.”
^ Ges-y vẽnegr ning sẽn yaa A5.
^ Bɩ, “Ra mag-y mag-bɛd ye.”
^ Rat n yeel tɩ Wẽnnaam sũ-puugrã.
^ Ges-y vẽnegr ning sẽn yaa A5.
^ Rat n yeel tɩ bʋk a soabã, n kɩt t’a toolmã sa, wa bugum sẽn yẽneg kut boaag pʋgẽ.
