Sɩngr sebre 27:1-46
27 A Izaak sẽn wa n kʋʋl t’a ninã pãng boog t’a pa le ne wã, a boola a bi-kãseng a Ezayu+ n yeel-a yaa: “M biiga!” T’a leok yaa: “Naaba!”
2 T’a Izaak paase: “Mam kʋʋlame masã. Mam pa mi m kũum daar ye.
3 Woto wã, m bõos tɩ f rɩk f tãoosgã teedo, rat n yeel tɩ f lokã ne f tãpã, n kẽng weoogẽ wã n tɩ tãoos weoog nemd n wa kõ-ma.+
4 Rẽ poor bɩ f segl rɩ-noog mam sẽn nonge, n tall n wa kõ maam. Dẽ, m na n dɩɩme la m* ning-f bark n yaool n ki.”
5 La a Rebeka ra kelgda a Izaak sẽn gomd ne a biig a Ezayu wã. A Ezayu yiime n loog weoog n na n tɩ tãoos weoog nemd n wa.+
6 La a Rebeka yeela a biig a Zakoob+ yaa: “M wʋma f ba wã sẽn gomd ne f kẽem a Ezayu mas-masã, n yetẽ:
7 ‘Tãoos weoog nemd n wa kõ-ma, la f segl rɩ-noog n kõ-ma. Dẽ, m na n dɩɩme la m ning-f bark a Zeova taoor la m yaool n ki.’+
8 Masã, m biiga, kelg neere, la f maan bũmb ning mam sẽn na n yeel-fã.+
9 M bõos tɩ f kẽng rũmsã sʋka, n tɩ yãk bʋ-poal a yiib bʋ-poal nins sẽn yaa sõma n yɩɩdã sʋk n wa kõ maam, tɩ m segl rɩ-noog n kõ f ba wã, wa a sẽn nong to-to wã.
10 Dẽ, f na n talla rɩɩbã n tɩ kõ f ba wã t’a rɩ, sẽn na yɩl t’a ning-f barka, la a yaool n ki.”
11 A Zakoob yeela a ma a Rebeka yaa: “La mam kẽem a Ezayu yaa yĩn-kõabneng soaba,+ tɩ mam yĩngã pa kõbd ye.
12 La m baaba sã n saag maam yẽ?+ Yaa vẽeneg t’a na n tagsame tɩ mam yaanda yẽ. Mam na n paama kãab-wẽng lakae, pa kãab-noog ye.”
13 Rẽ la a ma wã yeel-a yaa: “Bɩ kãab-wẽn-kãng zĩnd mam zugu, m biiga. Fo we n maan mam sẽn yeelã. Kẽng n tɩ yõg-b n wa kõ maam.”+
14 Dẽ, a tɩ yõg-b lame n wa kõ a ma wã, t’a ma wã segl rɩ-noog wa a ba wã sẽn nong to-to wã.
15 Rẽ poore, a Rebeka kẽe a roogẽ wã n dɩk a bi-kãseng a Ezayu fut nins sẽn yaa neeb n yɩɩdã, n yeelg a bi-yao a Zakoobe.+
16 A rɩka bʋ-poalã gãnd me n pil a nusã, ne a yublã.+
17 Rẽ poore, a kõo a biig a Zakoob rɩ-noogã a sẽn seglã, n paas burã a sẽn maanã.+
18 Dẽ, a kẽnga a ba wã nengẽ n yeele: “M baaba!” T’a leok yaa: “Naaba! Fo yaa ãnda, m biiga?”
19 A Zakoob yeela a ba wã yaa: “Yaa yãmb bi-kãseng a Ezayu.+ Mam maana wa yãmb sẽn yeel maamã. M bõos tɩ y yik n wãb m weoog nemdã, la y* ning-m barka.”+
20 La a Izaak soka a biigã yaa: “Fo maana wãn n paam weoog nemd tao-tao woto, m biiga?” T’a leok yaa: “Yaa yãmb Wẽnnaam a Zeova n sõng maam tɩ m paame.”
21 Dẽ, a Izaak yeela a Zakoob yaa: “M biiga, m bõos tɩ f kolg tɩ m saag-f n ges sã n sɩd yaa m biig a Ezayu.”+
22 A Zakoob kolga a ba a Izaak t’a saag-a, la a yeele: “Koɛɛgã yaa a Zakoob koɛɛga, la nusã yaa a Ezayu nusi.”+
23 A pa bãng-a ye. Bala a nusã ra tara yĩn-kõabneng wa a kẽem a Ezayu nusã. Dẽ, a ning-a-la barka.+
24 Rẽ poore, a sokame: “Fo sɩd yaa mam biig a Ezayu bɩ?” T’a leok yaa: “N-ye, yaa maam.”
25 Dẽ, a yeelame: “M biiga, yãk weoog nemdã n kõ-m tɩ m wãbe, la m* ning-f barka.” A yãkame n kõ-a t’a wãbe, la a tall divẽ me n wa kõ-a t’a yũ.
26 Rẽ poore, a ba a Izaak yeel-a lame yaa: “M biiga, kolg n mok-ma.”+
27 Dẽ, a kolgame n mok-a, t’a tõog n wʋm a futã yũugu.+ A ning-a-la bark n yeele:
“Ade! Mam biigã yũug yaa wa weoog a Zeova sẽn ning bark yũugu.
28 Bɩ Wẽnnaam kõ foo meenemã sẽn yit saasẽ wã,+ la tẽngã zĩis nins sẽn sakd koodã,+ la kood ne divẽ-paalg wʋsgo.+
29 Bɩ soolem toɛy-toɛy neb yɩ fo tʋm-tʋmdba, la bɩ buud toɛy-toɛy neb wõgemd fo taoore. Bɩ f soog f ba-biisã, la bɩ f ma wã kamb wõgemd f taoore.+ Kãab-wẽng bee ne ned ning fãa sẽn kãabd foom wẽnga, la bɩ ned ning fãa sẽn ningd foom bark paam barka.”+
30 A Izaak sẽn ning a Zakoob bark n sa, t’a yi a ba wã taoorã bal la a kẽem a Ezayu sẽn yi a tãoosgã n lebg n wa.+
31 Yẽ me segla rɩ-noog n tall n wa kõ a ba wã, la a yeel a ba wã yaa: “Bɩ m baaba yik n wãb a biigã weoog nemdã, la y* ning-m barka.”
32 Rẽ la a ba a Izaak sok-a: “Fo yaa ãnda?” T’a leok yaa: “Mam yaa yãmb biigã, y bi-kãseng a Ezayu.”+
33 T’a Izaak sɩng rigb wʋsgo. Dẽ, a sokame: “Sã n yaa rẽ, ãnda la sẽn tãoos weoog nemd n wa kõ maamã? Mam zoe n wãbame nand tɩ fo wa. Mam ninga a soabã barka, la sɩd-sɩda, a na n paama barka!”
34 A Ezayu sẽn wʋm a ba wã goamã, a zẽka a koɛɛgã wʋsg n yãb ne sũ-toogo, la a yeel a ba wã yaa: “Ning-y ma-me bark wɛ, m baaba!”+
35 La a Izaak yeelame: “Fo ba-biigã wa n belga maam sẽn na yɩl n deeg bark ning fo sẽn da segd n paamã.”
36 T’a Ezayu yeel yaa: “Pa zaalem la b sẽn pʋd-a t’a Zakoobã* ye. Naoor a yiib la woto a sẽn deeg mam zĩiga.+ A zoe n deega mam kãsengã,+ la masã, a reega mam barkã!”+ La a paase: “Yãmb pa bĩng maam bark la?”
37 La a Izaak leoka a Ezayu yaa: “Ade! Mam kɩtame t’a na n soog foom.+ Mam kõ-a-la a ba-biisã fãa tɩ b na n yɩ a tʋm-tʋmdba. Mam leb n kõ-a-la kood la divẽ-paalga.+ M biiga, bõe n ket m sẽn tõe n kõ foo?”
38 A Ezayu yeela a ba wã yaa: “M baaba, yaa bark a ye bal la yãmb tara? Ning-y ma-me bark wɛ, m baaba!” La a Ezayu zẽka a koɛɛg n yãbe, n daag nintãm.+
39 Dẽ, a ba a Izaak leok-a lame yaa:
“Gese! Fo yirã zĩig na n zãaga ne tẽngã zĩis nins sẽn sakd koodã, la ne meenemã sẽn yit saasẽ wã.+
40 Yaa fo sʋʋgã maasem yĩng la fo na n vɩɩmde.+ Fo na n lebga f yaoã yamba.+ La fo sã n wa pa le tõe n maan sũ-mare, f na n sɩd kaooga a yubl-balgdgã sẽn be fo yublẽ wã.”+
41 La a Ezayu kisga a Zakoobe, barkã a ba wã sẽn ning-a wã yĩnga.+ A Ezayu ra yeta a sũurẽ yaa: “Mam ba wã kũum kolgdame.+ Rẽ poore, mam na n kʋʋ m yao a Zakoobe.”
42 B sẽn wa n togs a Rebeka bũmb ning a bi-kãseng a Ezayu sẽn magd n na n maanã, zĩig pʋgẽ, a kɩtame tɩ b bool a bi-yao a Zakoob t’a yeel-a yaa: “Gese! Fo kẽem a Ezayu magdame n na n kʋ foo n dok a sũuri.*
43 M biiga, maan mam sẽn na n yeel-fã. Yik n zoe n kẽng mam ba-biig a Laban nengẽ, Haran+ soolmẽ wã.
44 Zĩnd ne-a wakat a wãna, hal tɩ f kẽemã sũ-puugrã wa booge,
45 hal t’a sũur sẽn yik ne foomã wa sigi, t’a yĩm bũmb ning fo sẽn maan-a wã. Dẽ, mam na n tʋmame tɩ b bool foo be. Bõe yĩng tɩ m na n bõn yãmb y yiibã fãa daar-n-yɛnga?”
46 Rẽ poore, a Rebeka ra yeta a Izaak yaa: “Mam yamã yii ne m vɩɩmã, Hɛt kom-pugli wã+ yĩnga. A Zakoob sã n saag n dɩk pag Hɛt kom-pugli wã sʋk sẽn yaa wa tẽngã kom-pugl-kãensã, mam vɩɩmã yõod yaa bõe?”+
Vẽnegr toor-toore
^ Bɩ, “mam sɩɩgã.”
^ Bɩ, “y sɩɩgã.”
^ Bɩ, “mam sɩɩgã.”
^ Bɩ, “y sɩɩgã.”
^ Rat n yeel tɩ “Sẽn gãt-a nao-kãsenkãare. Sẽn deegd-a a taab zĩiga.”
^ Bɩ, “tagsda fo kʋʋb yelle, n belsd a menga.”
