Tõod sebre 1:1-46
1 A Moyiiz goma ne Israyɛll nebã fãa we-raoogẽ wã, Zʋrdẽ kʋɩlgã sẽnese. Yɩɩ we-rasempʋɩɩg ning sẽn tees Suf n yaa tẽn-nabre, n be Paaran, Tofɛlle, Laban, Hazerot la Dizahaab sʋkã.
2 Fo sã n dɩk Seyɩɩr tãngã sore, n yi Horɛɛb n dabd Kadɛɛs-barneya,+ yaa rasem piig la a ye kẽnde.
3 Yʋʋm pis-naas soabã+ kiuug piig la a ye soabã pipi daare, a Moyiiz goma ne Israyɛll nebã* wa sẽn zems bũmb ning fãa a Zeova sẽn yeel-a t’a togs-bã.
4 Yɩɩ a sẽn zab n tõog Amoor nebã rĩm a Siyon+ sẽn da be Hɛsbonnã, la a tɩ zab Edreyi+ ne Basan rĩm a Oog+ sẽn da be Astarotã* n tõog-a wã poore.
5 A Moyiiz sɩngame n na n wilg nebã Tõogã võor+ Mowaab soolmẽ wã, Zʋrdẽ kʋɩlgã sẽnes n yeele:
6 “Horɛɛb soolmẽ wã, tõnd Wẽnnaam a Zeova yeela tõnd yaa: ‘Yãmb zĩnda soolem-kãngã sẽn be tãensẽ wã+ n kaoose.
7 Yik-y n kẽng-y Amoor nebã+ soolmã zĩig ning sẽn yaa tãensã, la b tẽn-yagsã fãa pʋsẽ: Yaa Araba wã,+ soolem nins sẽn yaa tãensã, Sefela wã, Negɛɛbã, ne mogrã noor tẽngã.+ Kẽng-y Kanaã nebã soolmẽ. Kẽng-y n tãag Libã,*+ la kʋɩl-kãsengã, rat n yeel tɩ Efrat kʋɩlgã.+
8 Mam ninga soolmã yãmb taoore. Kẽng-y n tɩ soog-y soolem ning a Zeova sẽn wẽen n yeel t’a na n kõo a Abrahaam, a Izaak+ la a Zakoob+ sẽn yaa y yaab-rãmbã, la b yagensã sẽn na n pʋgl bãmbã.’+
9 “Wakat kãnga, mam yeela yãmb yaa: ‘Maam m ye pa tõe n zã yãmb ye.+
10 Yãmb Wẽnnaam a Zeova kɩtame tɩ y lebg wʋsgo. Rũndã, yãmb sõorã yaa wʋsg wa ãdsã sẽn be saasẽ wã.+
11 Bɩ yãmb yaab-rãmbã Wẽnnaam a Zeova kɩt tɩ y sõorã paas+ naoor tusri, la a ning yãmb bark wa a sẽn da pʋlem yãmbã.+
12 Mam na n yɩɩ wãn n tõog n zã yãmb m yembre, n tʋk yãmb zɩɩbã la m get y zabã yelle?+
13 Yãk-y rap sẽn tar yam, bãngr la minim y buud toor-toorã sʋka, tɩ m na n kɩtame tɩ b lebg yãmb taoor dãmba.’+
14 La yãmb leoka maam yaa: ‘Yãmb sẽn yeel tõnd tɩ d maan bũmb ningã yaa sõma.’
15 Dẽ, mam kɩtame tɩ yãmb buud toor-toorã taoor dãmb sẽn yaa yam dãmba, la neb sẽn tar minimã lʋɩt yãmb taoore: Yaa neb tusr-tusr nanambse, neb koabg-koabg nanambse, neb pis-nu-nu nanambse, neb piig-piig nanambse, la buud toor-toorã sõangdba.+
16 “Wakat kãnga, mam yeela yãmb bʋ-kaoodbã yaa: ‘Yãmb sã n wa wʋm tɩ yell n be y saam-biisã sʋka, yãmb segd n kaoo bʋʋdã tɩrga,+ tɩ yaa ned ne a ba-biiga, wall ne sãan sʋka.+
17 Yãmb pa segd n bak ned n sõng bʋʋd sasa ye.+ Yãmb segd n kelga sẽn yaa-a bilfã wa y sẽn na n kelg sẽn yaa-a kãsengã.+ Yãmb pa segd n bas tɩ ned kẽes-y rabeem ye.+ Bala yaa Wẽnnaam n so bʋʋdã.+ Yell sã n yaa toog wʋsg ne-yã, yãmb segd n tall n waa mam nengẽ, tɩ m kelge.’+
18 Wakat kãnga, mam wilga yãmb bũmb nins fãa yãmb sẽn segd n maanã.
19 “Rẽ poore, tõnd yii Horɛɛb n pasg we-rao-kẽengã sẽn kẽesd rabeemã,+ wa tõnd Wẽnnaam a Zeova sẽn yeel tõndã. Yaa we-raoog ning yãmb sẽn yã d sẽn wa n teesd Amoor nebã+ soolmã sẽn yaa tãensã sẽnesã. Tõnd wa n taa Kadɛɛs-barneya.+
20 La mam yeela yãmba: ‘Yãmb taa Amoor nebã soolmã sẽn yaa tãensẽ wã, soolem ning tõnd Wẽnnaam a Zeova sẽn na n kõ-dã.
21 Yãmb Wẽnnaam a Zeova ninga soolmã yãmb nugẽ. Kẽng-y n tɩ soog-y-yã-a, wa y yaab-rãmbã Wẽnnaam a Zeova sẽn yeel yãmbã.+ Da zoe-y rabeem ye.’
22 “La yãmb fãa kolga maam n yeele: ‘Bɩ d tʋm rap tɩ b reng tõnd taoor n tɩ gilg n ges soolmã tõnd yĩnga, la b lebg n wa togs tõnd sor ning d sẽn segd n dɩke, la tẽns nins d sẽn na n yã wã.’+
23 Mam yãame tɩ yãmb sẽn yeel maam bũmb ningã yaa sõma. Dẽ, mam yãka rap piig la a yiib yãmb sʋkã, rao a ye buud fãa pʋgẽ.+
24 B yikame n tees soolmã zĩig ning sẽn yaa tãensã+ n ta Ɛskoll longẽ wã,* n tɩ soos n ges soolmã.
25 B yãka soolmã tɩɩs biis kẽer n zã n wa, la b yeel tõnd yaa: ‘Soolem ning tõnd Wẽnnaam a Zeova sẽn na n kõ tõndã yaa sõma.’+
26 La y zãgsame tɩ y pa na n kẽng ye. Yãmb kɩɩsa y Wẽnnaam a Zeova noorã.+
27 Yãmb da yẽgemda y fu-rotã pʋsẽ, n yetẽ yaa: ‘Yaa a Zeova sẽn kis tõndã yĩng la a sẽn yiis tõnd Ezɩpt soolmẽ wã n na n kõ Amoor nebã tɩ b sãamã.
28 Bõe yĩng tɩ d segd n kẽng zĩig a woto pʋgẽ? Tõnd saam-biisã komsa tõnd raoodo.+ B yeelame: “Soolmã neb yaa bɛd la wogd n yɩɩd tõndo. Sẽn paase, b tẽnsã yaa bɛda, tɩ b lalsã zẽk n kuil saasẽ.+ Tõnd yãa Anak nebã+ be.”’
29 “Dẽ, mam yeela yãmb yaa: ‘Ra zoe-y rabeem wall y bas tɩ b yɛɛs-y ye.+
30 Yãmb Wẽnnaam a Zeova na n lʋɩɩ yãmb taoor n zab n sõng yãmba,+ wa a sẽn maan Ezɩpt soolmẽ wã yãmb mensã nifẽ wã.+
31 Sẽn paase, yãmb yãa yãmb Wẽnnaam a Zeova sẽn zã yãmb we-raoogẽ wã, wa rao sẽn zãad a biig to-to wã. Yɩɩ woto zĩig ning fãa y sẽn kẽnge, n tãag zĩ-kãngã.’
32 Baa ne bõn-kãensã fãa, yãmb pa tẽ yãmb Wẽnnaam a Zeova,+
33 soab ning sẽn da lʋɩt yãmb taoor sorã zugu, n baood zĩis n kõt yãmb tɩ y tilgd y sik-zĩigã ye. A ra vẽnegda a meng ne bugum yʋngo, la ne sawadg wĩndga, n wilgd yãmb sor ning y sẽn segd n dɩkã.+
34 “Wakat kãng fãa, a Zeova wʋma bũmb ning yãmb sẽn da yetã, t’a sũurã puug t’a wẽen+ n yeele:
35 ‘Zãmaan-kãngã nebã sẽn yaa wẽnsã baa a ye pa na n yã tẽn-noogã mam sẽn wẽen tɩ m na n kõo y yaab-rãmbã ye.+
36 Yaa a Yefune biig a Kalɛɛb bal n na n yã-a. Mam na n dɩka soolem ning pʋgẽ a sẽn kẽnã n kõ yẽ ne a kambã, bala a tũu a Zeova ne a sũur fãa.*+
37 (Yãmb yĩnga, a Zeova sũur pʋd n yika ne maam, t’a yeele: “Fo-me pa na n kẽ tẽn-kãng pʋgẽ ye.+
38 A Nun biig a Zozuwe sẽn yaa fo sõangdã*+ n na n kẽ soolmã pʋgẽ.+ Keng a raoodo,*+ bala yẽ n na n lʋɩ Israyɛll nebã taoor tɩ b soog soolmã.”)
39 Sẽn paase, yãmb kambã y sẽn yeel tɩ b na n wa yõg n loogame wã,+ y kom-dibli nins sẽn pa mi sõma ne wẽng n bak rũndã wã n na n kẽ soolmã pʋgẽ. Mam na n kõ-b-la soolmã tɩ b sooge.+
40 La yãmba, lebg-y n dɩk-y Mog-miuugã sor+ n kẽng we-raoogẽ wã.’
41 “Rẽ la yãmb yeel maam yaa: ‘Tõnd beega a Zeova. Tõnd na n kẽng n tɩ zaba wa d Wẽnnaam a Zeova sẽn yeel tõndã!’ Dẽ, yãmb ned kam fãa boba a zab-teedo, n tagsdẽ tɩ tãngã zug rʋʋb na n yɩɩ nana.+
42 La a Zeova yeela maam yaa: ‘Yeel-ba: “Yãmb pa segd n tɩ zab ye. Bala mam pa na n zĩnd ne yãmb ye.+ Y sã n kẽnge, y bɛɛbã na n tõog-y lame.”’
43 Mam togsa yãmba, la yãmb pa kelg ye. Yãmb kɩɩsa a Zeova noorã, n wuk y mense, n mak n na n dʋ tãngã.
44 Dẽ, Amoor nebã sẽn da be tãngẽ wã yiime n seg yãmba, n dig yãmb wa sĩ sẽn digd neda, tɩ y sãeeg Seyɩɩr hal n tãag Horma.
45 Yãmb lebgame n wa yãb a Zeova taoore, la a Zeova pa kelg yãmb wall a ges-y ye.
46 Yaa rẽ yĩng la yãmb sẽn kell n zĩnd Kadɛɛs n kaoos woto wã.
Vẽnegr toor-toore
^ Ebre, “a Israyɛll kom-dibli wã.”
^ Pa rẽ bɩ, “Basan rĩm a Oog sẽn da be Astarot ne Edreyi wã.”
^ Tog n yaa Libã tãensã sẽn tong taabã.
^ Bɩ, “kosoogẽ wã.”
^ Ebre, “tõre, zãnga.”
^ Ebre, “sẽn yas fo taoorã.”
^ Pa rẽ bɩ, “Wẽnnaam kõ-a-la pãnga.”