Tõod sebre 10:1-22
10 “Wakat kãnga, a Zeova yeela maam yaa: ‘Pees kug-wals a yiib f meng yĩng tɩ b wõneg pipi rãmbã,+ la f rʋ tãngã n wa mam nengẽ. Sẽn paase, fo segd n maana raad koglg f meng yĩnga.
2 Mam na n gʋlsa goam nins sẽn da be pipi walsã fo sẽn wã wã zutã bãmb me zutu. Fo segd n ning-b-la koglgã pʋgẽ.’
3 Dẽ, mam maana koglg ne akasiya raado, la m pees kug-wals a yiib sẽn wõnd pipi rãmbã, n zã wals a yiibã n dʋ tãngã zugu.+
4 A gʋlsa goam nins a sẽn da gʋls pĩndã walsã zutu.+ Yaa Tõod piigã*+ a Zeova sẽn da kõ yãmb bugum pʋgẽ,+ tãngã zugu, daar ning y sẽn da tigim taabã.+ Rẽ poore, a Zeova kõo maam walsã.
5 Mam lebg n yii tãngã zug n sigi,+ n tɩ ning walsã koglg ning mam sẽn maanã pʋgẽ, wa a Zeova sẽn da yeel maamã. B ket n bee be.
6 “Rẽ poore, Israyɛll nebã yii Beerot-bene-zaakan n kẽng Mosera. A Aarõ kii beenẽ tɩ b mum-a,+ t’a biig a Eleazaar ledg-a n lebg maan-kʋʋda.+
7 B yii beenẽ n kẽng Gudgoda, n yi Gudgoda n kẽng Zotbata+ sẽn yaa tẽng sẽn tar kʋɩls wʋsgã.
8 “Wakat kãnga, a Zeova welga Levi buudã neb+ toor tɩ b na n dɩkd a Zeova kaoolã koglgã,+ n yalsd a Zeova taoor n tʋmd a tʋʋmã, la b ningd nebã bark ne Wẽnnaam yʋʋre,+ wa b sẽn ket n maand hal ne rũndã wã.
9 Rẽ n so tɩ b pa kõ a Levi pʋɩɩr a ba-biisã sʋk ye. Yaa a Zeova la a pʋɩɩre, wa yãmb Wẽnnaam a Zeova sẽn da yeel-a wã.+
10 Mam mengã paa tãngã zug rasem pis-naas wĩndg ne yʋng+ wa pipi wã, la a Zeova kelga maam wakat kãng me.+ A Zeova yãka yam n pa na n sãam yãmb ye.
11 Rẽ poore, a Zeova yeela maam yaa: ‘Segl f meng n dɩk sore, n lʋɩ nin-buiidã taoor tɩ b tɩ kẽ soolem ning mam sẽn pʋlem b yaab-rãmbã tɩ m na n kõ-b lame wã pʋgẽ,+ n soog-a.’
12 “Israyɛll neba, yaa bõe la yãmb Wẽnnaam a Zeova rat tɩ y maane?+ Ad a sẽn datã: Yaa y zoe yãmb Wẽnnaam a Zeova,+ n kẽn a soayã zutu,+ n nong-a, n tũ yãmb Wẽnnaam a Zeova ne y sũur fãa la ne y sɩɩgã* fãa,+
13 la y sak a Zeova goamã la a noyã mam sẽn togsd yãmb rũndã wã, y mens neer yĩnga.+
14 Ade! Yãmb Wẽnnaam a Zeova n so saasã la baa saasã zĩ-zãntsã, ne tẽngã la bũmb nins fãa sẽn be a pʋgẽ wã.+
15 Yaa yãmb yaab-rãmbã bal la a Zeova kolg-yã, n wilg-b a nonglem. La a yãka yãmb sẽn yaa b kamb la b yagensã+ buud a taabã sʋka, wa sẽn yaa to-to ne yãmb rũndã wã.
16 Yãmb segd n yɩlga y sũyã,*+ la y ra le riglim y sũyã ye.+
17 Bala yãmb Wẽnnaam a Zeova yaa wẽnnaam-dãmb Wẽnnaam+ la zu-sobend-dãmb Zu-soaba, Wẽnnaam ning sẽn yaa kãsengã, n tar pãnga, tɩ nebã segd n zoe-a la b waoog-a. A yaa Wẽnnaam sẽn pa tũusd neba,+ la sẽn pa sakd noor-madgr ye.
18 A pa basd tɩ b kao kɩɩb* ne pʋg-kõor bʋʋd kɛgr ye.+ A nonga sãana,+ n kõt-a rɩɩb la futu.
19 Yãmb me segd n nonga sãana, bala yãmb da yaa sãamb Ezɩpt soolmã pʋgẽ.+
20 “Yaa yãmb Wẽnnaam a Zeova la y segd n zoe, yẽ la yãmb segd n tũ.+ Yaa yẽ la yãmb segd n gãd kãn-kãe, la yaa ne yẽ yʋʋr la yãmb segd n wẽendẽ.
21 Yaa yẽ la Soab ning y sẽn segd n pẽgdã.+ A yaa yãmb Wẽnnaam, soab ning sẽn maan bõn-kãensã sẽn yaa kãsems la sẽn kẽesd rabeem yãmb yĩnga, tɩ yãmb mens nin yã wã.+
22 Yãmb yaab-rãmbã yɩɩ neb* pis-yopoe n kẽng Ezɩpt soolmẽ wã.+ La masã, yãmb Wẽnnaam a Zeova kɩtame tɩ yãmb sõorã lebg wʋsg wa ãdsã sẽn be saasẽ wã.+
Vẽnegr toor-toore
^ Ebre, “Goam piigã.”
^ Ges-y gom-biis võor bilgrã zĩigẽ.
^ Ebre, “kẽesa y sũyã bãongo.”
^ Ebre, “biig sẽn pa tar ba.”
^ Bɩ, “sɩɩs.”