Tõod sebre 11:1-32
11 “Yãmb segd n nonga yãmb Wẽnnaam a Zeova,+ n kell n maan bũmb nins a sẽn yeel yãmbã, la y tũ a noyã, a tõodã, la a goamã.
2 Yãmb miime tɩ rũndã, mam gomda ne yãmba. Pa ne yãmb kambã sẽn pa bãng bɩ n yã yãmb Wẽnnaam a Zeova sẽn kibl yãmbã,+ a pãngã,+ a nug sẽn tar pãngã,+ la a kang sẽn tar pãngã ye.
3 B pa yã Wẽnnaam bãnã, la bũmb nins a sẽn maan Ezɩpt rĩm a Farawõ la a soolmã fãa wã,+
4 wall bũmb ning a sẽn maan Ezɩpt tãb-biisã, a Farawõ wed-moosã, ne a zabr saar-dãmbã* Mog-miuugã koom sẽn limã, b sẽn wa n digd yãmb t’a Zeova sãam-b wakat fãa yĩngã ye.*+
5 B pa yã bũmb ning Wẽnnaam sẽn maan yãmb yĩng we-raoogẽ wã n tãag zĩ-kãnga wã,
6 wall bũmb ning a sẽn maan a Rubɛn biig a Eliyaab kom-dibli a Datã ne a Abirammã, tẽngã sẽn yaag a noor n vel-b ne b zagsã rãmba, b fu-rotã la bõn-vɩɩs nins fãa sẽn da be ne-bã ye. A maana rẽ Israyɛll nebã nifẽ.+
7 Yãmb mensã nin yãa bõn-kãsems nins fãa a Zeova sẽn maanã.
8 “Yãmb segd n tũu noy nins fãa mam sẽn taasd yãmb rũndã wã, n paam pãng n dʋʋg kʋɩlgã n tɩ kẽ soolmã pʋgẽ n soog-a,
9 la y kell n vɩɩmd n kaoos+ soolem ning a Zeova sẽn pʋlem t’a na n kõo y yaab-rãmbã ne b kambã la b yagensã pʋgẽ,+ tẽng sẽn pid ne bĩisim la sɩɩdã.+
10 “Soolem ning yãmb sẽn dabd n na n tɩ soogã pa wa Ezɩpt soolmã yãmb sẽn yiẽ wã, zĩig ning yãmb sẽn da bʋt y bõn-buudã la y tʋmd wʋsg n zãgsd pʋtã koom* wa zẽed sẽn be zẽed zĩigẽ wã ye.
11 Soolem ning yãmb sẽn na n dʋʋg kʋɩlgã n tɩ kẽ n soogã yaa soolem sẽn tar tãense, la tẽn-naba.+ A yũuda saagã sẽn yit yĩngrã koom.+
12 Yaa soolem yãmb Wẽnnaam a Zeova sẽn get a yelle. Yãmb Wẽnnaam a Zeova nin bee a zug wakat fãa, sẽn sɩng ne yʋʋmdã sɩngr n tãag a baasgo.
13 “Yãmb sã n sak mam noyã mam sẽn taasd yãmb rũndã wã neere, n nong y Wẽnnaam a Zeova, la y tũ-a ne y sũurã fãa la ne y sɩɩgã* fãa,+
14 ma-me na n kõo yãmb saag a wakate, dẽenem saag la yaoolem saaga. Yãmb na n paama koodo, divẽ-paalga, la kaam.+
15 Mam na n kɩtame tɩ mood yi y pʋtẽ wã y rũmsã yĩnga. Yãmb na n dɩɩme n tɩge.+
16 Gũus-y mense, tɩ b ra wa belg yãmb tɩ y bʋdg n tũ wẽnnaam-dãmb a taab la y wõgemd b taoor ye.+
17 Sã n pa rẽ, a Zeova sũurã na n puuga wʋsg ne yãmb t’a pag saasã, sẽn na yɩl tɩ saag ra le ni,+ tɩ tẽngã bõn-koaadlã me ra wom ye. La yãmb na n menema tao-tao tẽn-noog ning a Zeova sẽn na n kõ yãmbã pʋgẽ.+
18 “Yãmb segd n bĩnga mam gom-kãensã yãmb sũyã pʋsẽ la y yamẽ wã. La y loe bãmb y nugẽ tɩ yɩ tẽegr y yĩnga. B segd n yɩɩ wa bãnd* y rĩyẽ wã.*+
19 Zãms-y y kambã gom-kãense, la y gom b yell ne-ba, y sã n wa zĩ y zakẽ, y sã n wa kẽnd sor zugu, y gãand wakate, la y yikr wakate.+
20 Gʋls-y bãmb y kʋɩlensã lugã zutu, la y rignoyã zutu,
21 tɩ saasã sã n ket n be yĩngr fãa, bɩ yãmb ne y kambã tõog n vɩɩmd n kaoos+ tẽng ning a Zeova sẽn pʋlem t’a na n kõo y yaab-rãmbã pʋgẽ.+
22 “Yãmb sã n sak no-kãensã mam sẽn kõt yãmbã ne y sũy fãa, n tũ-b la y nong yãmb Wẽnnaam a Zeova,+ n kẽn a soayã fãa zut la y gãd-a kãn-kãe,+
23 a Zeova na n diga bu-kãensã fãa yãmb taoore,+ la yãmb na n tõoga buud sẽn yaa kãsems la sẽn tar neb wʋsg n yɩɩd yãmba.+
24 Zĩig ning fãa yãmb nao sẽn na n tabã na n lebga yãmb rẽnda.+ Sẽn sɩng ne we-raoogã n tãag Libã, la sẽn sɩng ne Kʋɩlgã, rat n yeel tɩ Efrat kʋɩlgã n tɩ tãag nin-taoor mogrã* na n lebga yãmb tẽngã toadga.+
25 Ned baa a ye kõn tõog n yals yãmb taoor ye.+ Yãmb Wẽnnaam a Zeova na n kɩtame tɩ soolem ning pʋgẽ y sẽn na n kẽnã+ neb fãa zoe yãmba, wa a sẽn da pʋlmã.
26 “Ade! Rũndã, mam ningda bark la kãab-wẽng yãmb taoore:+
27 Yãmb sã n sak yãmb Wẽnnaam a Zeova noyã mam sẽn togsd yãmb rũndã wã,+ yãmb na n paama barka.
28 La yãmb sã n pa sak yãmb Wẽnnaam a Zeova noyã,+ n bʋdg n bas sor ning mam sẽn wilgd yãmb rũndã tɩ y tũ wã, n tɩ tũ wẽnnaam-dãmb y sẽn pa mi, kãab-wẽng na n zĩnda yãmb zugu.
29 “Yãmb Wẽnnaam a Zeova sã n tall yãmb n tɩ kẽes soolem ning yãmb sẽn na n soogã pʋgẽ, yãmb segd n ningda bark Gerizim tãngẽ wã, la y kãabd wẽng Eball+ tãngẽ wã.
30 Tãn-kãensã bee Zʋrdẽ kʋɩlgã rʋʋnde, nin-taoor sẽnese,* Kanaã nebã sẽn be Araba wã soolmẽ wã, n tees Gilgalle, Moore tɩ-bɛdã+ sɛɛgẽ.
31 Bala yãmb rʋʋgda Zʋrdẽ kʋɩlgã n na n tɩ kẽ soolem ning yãmb Wẽnnaam a Zeova sẽn na n kõ yãmbã pʋgẽ, n soog-a.+ Yãmb sã n wa reeg soolmã n soog n be a pʋgẽ,
32 yãmb segd n gũusa neer n tũ noy la tõod nins fãa mam sẽn taasd yãmb rũndã wã.+
Vẽnegr toor-toore
^ Yaa bũmb sẽn wõnd sarɛt tɩ wed-moos tatẽ.
^ Bɩ, “hal n tãag rũndã wã ye.”
^ Ebre, “zãgsd pʋtã koom ne nao.” Tõe tɩ ra yaa bũmb la b tar n tabd tɩ fõogd koomã n zãgsd koodã, wall b ra pakda ko-soayã ne b naoã, la b pagdẽ.
^ Ges-y gom-biis võor bilgrã zĩigẽ.
^ Ebre, “yãmb ninã sʋka.”
^ Bɩ, “zu-vindg.”
^ Rat n yeel tɩ Mog-kãsengã sẽn yaa Mediterane mogrã.
^ Bɩ, “wĩndg sẽn lʋɩtẽ sẽnese.”
