Tõod sebre 14:1-29
14 “Yãmb yaa y Wẽnnaam a Zeova kamba. Ra bog-y y yĩnsã+ wall y põng y nin-kõbdã,* ned sẽn ki yĩng ye.+
2 Bala yãmb yaa buud sẽn welg toor+ yãmb Wẽnnaam a Zeova yĩnga. A Zeova yãka yãmb tɩ y lebg a nin-buiidu, buud sẽn yaa toor zall buud toɛy-toɛyã fãa sẽn be tẽngã zugã sʋka.+
3 “Yãmb pa segd n wãb bũmb Wẽnnaam sẽn kis ye.+
4 Ad rũms nins y sẽn tõe n wãbe:+ Yaa naafo, pesgo, bʋʋga,
5 walga, yãka, molfo, we-bʋʋga, beoko, piis sẽn be weoogẽ, la piis sẽn be tãens zutu.
6 Yãmb tõe n wãba rũng ning fãa sẽn tar nao-bend sẽn bog zĩis a yiibu, la sẽn bɩɩsd yamdo.
7 La ad rũms nins sẽn bɩɩsd yamd wall sẽn tar nao-bend sẽn yaa boag y sẽn pa segd n wãbe: Yaa yʋgemde, soaamb la seere. Bala b bɩɩsda yamd la b pa tar nao-bend sẽn yaa boag ye. B na n yɩɩ rẽgd yãmb nifẽ.+
8 Ne kurkuri, bala a tara nao-bend sẽn yaa boaga, la a pa bɩɩsd yamd ye. A na n yɩɩ rẽgd yãmb nifẽ. Yãmb pa segd n wãb rũm-kãens nemdo, wall y sɩɩs b kũum ye.
9 “Ad koomẽ bũmb nins y sẽn tõe n wãbe: Yãmb tõe n wãba bũmb nins fãa sẽn tar gɛd la pagdo.+
10 La yãmb pa segd n wãb bũmb sẽn pa tar gɛd la pagd ye. A na n yɩɩ rẽgd yãmb nifẽ.
11 “Yãmb tõe n wãba liuul buud fãa sẽn yaa yɩlemde.
12 La ad yãmb sẽn pa segd n wãbã: Yaa pa-nand-tugri, kʋɩl-sɩlga, yɩbren-sablga,+
13 kosenkonde, sɩl-faoogo, la sɩlg buud fãa,
14 gãabg buud fãa,
15 naneoongo, viuugu, bulyẽoog buudu, wɩbg buud fãa,
16 viuug-liuula, viuug sẽn tar tʋb-wogdo, koomẽ lade,
17 pelikã,* yɩbrengo, koom daoogo,
18 kʋl-yaadga, raong buud fãa, nakomsugr la zãnkita.
19 Bõn-yɩgdɩ nins sẽn tũud taab wʋsgã me na n yɩɩ rẽgd yãmb nifẽ. Yãmb pa segd n wã-b ye.
20 Yãmb tõe n wãba bõn-yɩgdɩ buud fãa sẽn yaa yɩlemde.
21 “Yãmb pa segd n wãb rũng buud baa a ye sẽn ki a toor ye.+ Yãmb tõe n kõ-a-la sãan sẽn be yãmb tẽngẽ wã* t’a wãbe, wall y koos-a ne sãana. Bala yãmb yaa buud sẽn welg toor yãmb Wẽnnaam a Zeova yĩnga.
“Yãmb pa segd n dʋg bull a ma bĩisim pʋgẽ ye.+
22 “Yʋʋmd fãa, yãmb segd n kõo koodã y pʋtã sẽn womdã pʋɩɩr a ye pʋɩ piig zugu.+
23 Yãmb na n dɩɩ y koodã, y divẽ-paalgã ne y kaamã pʋɩɩr a ye pʋɩ piig zugã, la y wãb y rũm-bɛdã ne y rũm-bõonegã kom-dẽemsã yãmb Wẽnnaam a Zeova taoore, zĩig ning a sẽn na n yãk n ning a yʋʋrã,+ sẽn na yɩl tɩ y zãms yãmb Wẽnnaam a Zeova zoees wakat fãa.+
24 “La sorã sã n yaa wok wʋsg ne yãmba, tɩ y pa tõe n zã rẽ n kẽng zĩig ning yãmb Wẽnnaam a Zeova sẽn na n yãk a yʋʋrã yĩngã,+ zĩigã sẽn zãr wʋsg ne yãmbã yĩnga (bala yãmb Wẽnnaam a Zeova na n ninga yãmb barka,)
25 y tõe n koosame, n zã ligdã n kẽng zĩig ning yãmb Wẽnnaam a Zeova sẽn na n yãkã.
26 Yãmb tõe n dɩka ligdã n da bũmb ning fãa y* sẽn date: Yaa niisi, piisi, bʋʋse, divẽ, rãam buud a taaba, la bũmb ning fãa sẽn noom yãmba. Yãmb na n dɩɩ yãmb Wẽnnaam a Zeova taoor be, n kɩdem sũ-noogo, yãmb ne y zakã rãmba.+
27 Ra yĩm-y Levi buudã neb sẽn be yãmb tẽnsẽ wã yell ye.+ Bala b pa kõ-b pʋɩɩr yãmb sʋk ye.+
28 “Yʋʋm a tãab fãa, yãmb segd n waa ne yʋʋmdã koodã pʋɩɩr a ye pʋɩ piig zugã fãa n bĩng y tẽnsã pʋsẽ.+
29 Woto, Levi buudã nebã b sẽn pa kõ pʋɩɩr yãmb sʋkã, sãambã, kɩɩbsã,* ne pʋg-kõap nins sẽn be yãmb tẽnsã pʋsẽ wã na n wa rɩɩme n tɩge,+ tɩ yãmb Wẽnnaam a Zeova ning-y barka, bũmb nins y sẽn maandã fãa pʋgẽ.+
Vẽnegr toor-toore
^ Ebre, “y ninã sʋka.” Bɩ, “n põng y rĩyã.”
^ Yaa liuul buudu.
^ Ebre, “rignoyẽ wã.”
^ Bɩ, “yãmb sɩɩgã.”
^ Ebre, “kamb sẽn pa tar ba-rãmbã.”
