Tõod sebre 2:1-37
2 “Rẽ poore, tõnd lebg n dɩka Mog-miuugã sor n kẽng we-raoogẽ wã, wa a Zeova sẽn yeel maamã.+ Tõnd yeeba Seyɩɩr tãngã sɛɛg n kaoos rasem wʋsgo.
2 A Zeova wa n yeela maam yaa:
3 ‘Yãmb sẽn yeeb tãngã sɛɛgã yaa n sekame. Masã, wẽnemd-y n tees-y rɩtgo.
4 Yeel nin-buiidã yaa: “Yãmb na n tɩ yɛga a Ezayu+ yagensã sẽn yaa yãmb saam-biis n be Seyɩɩrã+ toadgã. Bãmb na n zoee yãmba,+ la y segd n gũusa wʋsgo.
5 Ra bao-y b noor ye. Mam pa na n kõ yãmb b soolmã baa bilf sẽn sek naoor tabgr meng ye. Bala mam dɩka Seyɩɩr tãngã n kõ a Ezayu t’a sooge.+
6 Yãmb segd n kõ-b-la ligd rɩɩbã y sẽn na n dɩ wã yĩnga, la y yao koomã y sẽn na n yũ wã me yĩnga.+
7 Bala yãmb Wẽnnaam a Zeova ninga yãmb barka, bũmb nins fãa y sẽn maanã pʋgẽ. A mii yãmb sẽn kẽnd we-rao-kẽengã pʋgẽ wã sõma. Yãmb Wẽnnaam a Zeova zĩnda ne yãmb yʋʋm pis-naasã, la bũmb pa paoog-y ye.”’+
8 Dẽ, tõnd yɛga a Ezayu yagensã+ sẽn yaa d saam-biis n be Seyɩɩrã soolem, n pa rɩk Araba wã ne Elat la Eziyon-gebɛɛr+ sor ye.
“Rẽ poore, d wẽnemdame n dɩk Mowaab+ we-raoogã sore.
9 A Zeova yeela maam yaa: ‘Ra bao-y Mowaab nebã noor wall y zab ne-ba, tɩ m pa na n kõ yãmb b soolmã baa bilf tɩ y soog ye. Bala mam dɩka Aar n kõ a Lot+ yagensã tɩ b sooge.
10 (Emim nebã+ n da be be. B ra yaa neb sẽn tar pãnga, tɩ b sõorã yaa wʋsgo. B ra yaa wogd wa Anak nebã.
11 Refayim nebã+ me ra yaa wa Anak nebã,+ tɩ Mowaab nebã ra wae n boond-b tɩ Emim neba.
12 Pĩndã, Hoor nebã+ ra bee Seyɩɩre, la a Ezayu yagensã reega b soolmã, n menes-b la b zĩnd be,+ wa Israyɛll nebã sẽn na n maan soolem ning b sẽn so wã, rat n yeel tɩ soolem ning a Zeova sẽn na n kõ-bã.)
13 Kẽng-y n tɩ pasg-y Zerɛɛd longã.’* Dẽ, tõnd tɩ pasga Zerɛɛd+ longã.*
14 Tõnd sẽn yi Kadɛɛs-barneya wã n tãag d sẽn na n pasg Zerɛɛd longã* kaoosa yʋʋm pis-tã la a nii, hal tɩ zãmaanã rap nins sẽn da tõe n kẽng zabrã fãa ki, wa a Zeova sẽn da wẽen n yeelã.+
15 A Zeova zẽka a nug n sãam b fãa sik-zĩigẽ wã, hal tɩ b wa menem zãnga.+
16 “Rap nins sẽn da tõe n kẽng zabrã fãa sẽn wa n ki wã,+
17 a Zeova le goma ne maam n yeele:
18 ‘Rũndã, yãmb segd n yɛga Mowaab soolmã, rat n yeel tɩ Aare.
19 Yãmb sã n wa kolg Amon nebã, bɩ y ra yik zabr ne-b wall y bao b noore, tɩ m pa na n kõ yãmb Amon nebã soolmã baa bilf tɩ y soog ye. Bala mam dɩka soolem-kãng n kõ a Lot yagensã tɩ b sooge.+
20 B ra getame tɩ be me yaa Refayim nebã+ soolem. (Refayim nebã ra bee be, tɩ Amon nebã ra boond-b tɩ Zamzumim.
21 B ra yaa neb sẽn tar pãnga, tɩ b sõorã yaa wʋsgo. B ra yaa wogd wa Anak nebã.+ La a Zeova tõog-b-la Amon nebã taoore, tɩ Amon nebã rig-ba, n zĩnd be.
22 Yaa woto me la Wẽnnaam maan a Ezayu yagensã sẽn be Seyɩɩrã+ yĩnga, a sẽn wa n tõog Hoor nebã+ a Ezayu yagensã nifẽ, sẽn na yɩl tɩ b soog Hoor nebã soolmã n zĩnd be n tãag rũndã wã.
23 Sã n yaa ne Avim-dãmbã, b ra bee tẽn-bõones pʋsẽ n tãag Gaaza,+ hal tɩ Kaftorim+ nebã sẽn yi Kaftoorã* wa sãam-ba, la b zĩnd be.)
24 “‘Yik-y n dɩk-y sor n tɩ pasg Arno+ longã.* Ade! Mam dɩka Hɛsbon rĩm a Siyon+ sẽn yaa Amoor nedã n ning y nugẽ. Woto wã, sɩng-y-yã a soolmã reegre, la y zab ne-a.
25 Rũndã tɛka, mam na n kɩtame tɩ rabeem yõk nebã fãa sẽn be saasã tẽngrã sẽn na n wʋm yãmb kibarã. Bãmb na n yɛɛsa wʋsgo, la b rigd rabeem* yãmb yĩnga.’+
26 “Dẽ, mam tʋma koe-taasdb tɩ b yi Kedemot+ we-raoogẽ wã n kẽng Hɛsbon rĩm a Siyon nengẽ, n tɩ taas-a laafɩ koɛɛg+ n yeele:
27 ‘Bas-y tɩ m pasg yãmb soolmã. Mam na n kell n tũu sorã, n pa bʋdg n kẽng rɩtg wall goabg ye.+
28 Yaa rɩɩb la koom ning y sẽn na n koos ne maamã la m na n dɩ la m yũ. Yãmb we n bas maam tɩ m kẽn nao n pasg soolmã
29 (Yaa woto la a Ezayu yagensã sẽn be Seyɩɩrã, la Mowaab nebã sẽn be Aarã maan mam yĩnga.) hal tɩ m pasg Zʋrdẽ kʋɩlgã n kẽng soolem ning Wẽnnaam a Zeova sẽn dat n kõ tõndã.’
30 La Hɛsbon rĩm a Siyon pa bas tõnd tɩ d pasg a soolmã ye. Bala yãmb Wẽnnaam a Zeova basame t’a lebg tõata, t’a sũurã me riglme,+ sẽn na yɩl n dɩk-a n ning yãmb nugẽ, wa sẽn yaa to-to masã wã.+
31 “Dẽ, a Zeova yeela maam yaa: ‘Ade! Mam dɩka a Siyon ne a soolmã n ning yãmb nugẽ. Sɩng-y-yã a soolmã reegre.’+
32 A Siyon sẽn wa n yi ne a tãb-biisã fãa n seg tõnd Zahaaz+ n na n zabã,
33 tõnd Wẽnnaam a Zeova ning-a-la tõnd nugẽ, tɩ tõnd tõog yẽ ne a kom-dibli wã la a tãb-biisã fãa.
34 Wakat kãnga, tõnd reesa a tẽnsã fãa n sãam-b zãnga, la d kʋ rapã, pagbã, la kambã. D pa bas ned baa a ye t’a põs ye.+
35 Yaa rũmsã bal la d tall n looge, n paas teed tõnd sẽn wʋk tẽns nins d sẽn deesã pʋsẽ.
36 Sẽn sɩng Arowɛɛr+ sẽn be Arno longã* noorã (n paas tẽns nins fãa sẽn be longẽ wã), hal n tãag Galaade, tẽng kae tõnd sẽn pa tõog ye. Tõnd Wẽnnaam a Zeova ninga b fãa tõnd nugẽ.+
37 La yãmb pa kolg Amon nebã+ soolmã, rat n yeel tɩ Zabok+ longã* wogellã, la tẽns nins sẽn be tãensẽ wã, wall zĩig ning fãa tõnd Wẽnnaam a Zeova sẽn gɩdg tɩ d ra kẽngã ye.
Vẽnegr toor-toore
^ Bɩ, “kosoogã.”
^ Bɩ, “kosoogã.”
^ Bɩ, “kosoogã.”
^ Rat n yeel tɩ Kɛrɛte.
^ Bɩ, “Arno kosoogã.”
^ Bɩ, “la b paam toog sẽn wõnd rogem toog.”
^ Bɩ, “Arno kosoogã.”
^ Bɩ, “kosoogã.”
