Tõod sebre 26:1-19
26 “Yãmb sã n wa kẽ soolem ning y Wẽnnaam a Zeova sẽn na n kõ-y tɩ yɩ y pʋɩɩrã pʋgẽ, n soog-a la y be beenẽ,
2 yãmb segd n yãka tẽngã bõn-koaadlã fãa dẽenem biisã yãmb sẽn na n tigs soolem ning yãmb Wẽnnaam a Zeova sẽn na n kõ yãmbã pʋgẽ wã, n ning peoog pʋgẽ n kẽng zĩig ning yãmb Wẽnnaam a Zeova sẽn na n yãk n ning a yʋʋrã.+
3 Yãmb segd n kẽnga maan-kʋʋd ning sẽn na n tʋmd wakat kãngã nengẽ n yeel-a yaa: ‘Rũndã, mam wilgda yãmb Wẽnnaam a Zeova tɩ mam waa soolem ning a Zeova sẽn pʋlem d yaab-rãmbã t’a na n kõo tõndã pʋgẽ.’+
4 “Maan-kʋʋdã na n deega peoogã yãmb nugẽ, n dɩgl yãmb Wẽnnaam a Zeova tẽn-kugrã taoore.
5 La yãmb segd n yeela y Wẽnnaam a Zeova taoor yaa: ‘Tõnd yaabã ra yaa Aram ned+ sẽn yeebde.* A kẽnga Ezɩpt+ n tɩ zĩnd sãand be ne a zakã neb sẽn da yaa bilfã.+ Beenẽ, a yagensã wa n lebga bu-kãseng sẽn tar pãnga, tɩ d sõorã yaa wʋsgo.+
6 La Ezɩpt nebã namsa tõndo, n weoog tõnd la b kɩt tɩ d lebg yembse, n tʋmd tʋʋm-kɛgemse.+
7 Tõnd sɩngame n kelemd n boond a Zeova sẽn yaa tõnd yaab-rãmbã Wẽnnaamã, la a Zeova wʋma d koeesã, n yã d namsgã, d toogã, la b sẽn weoogd tõndã.+
8 A Zeova wa n tũnuga ne nug sẽn tar pãnga, ne kang sẽn tar pãnga,+ la ne tʋʋm-kãsems sẽn kẽesd rabeem, ne bãna, la ne yel-soalem+ n yiis tõnd Ezɩpt soolmẽ wã.
9 Rẽ poore, a talla tõnd n wa zĩ-kãngã, n kõ tõnd soolem-kãngã sẽn yaa tẽng sẽn pid ne bĩisim la sɩɩdã.+
10 Ade! Tõnd talla tẽng ning a Zeova sẽn kõ tõndã bõn-koaadlã dẽenem biis n wa.’+
“Yãmb segd n dɩgl-a-la y Wẽnnaam a Zeova taoore, la y wõgemd y Wẽnnaam a Zeova taoore.
11 Rẽ poore, yãmb ne Levi buudã neb n paas sãambã sẽn be y sʋkã na n kɩdma sũ-noogo, bõn-sõma nins fãa yãmb Wẽnnaam a Zeova sẽn kõ yãmb ne y zagsã rãmbã yĩnga.+
12 “Yãmb sã n wa yãk y koodã pʋɩɩr a ye pʋɩ piig zug fãa n sa+ yʋʋm a tãab-n-soabã sẽn yaa pʋɩɩr a ye pʋɩ piig zug yʋʋmdã, yãmb na n dɩk-a lame n kõ Levi buudã nebã, sãambã, kɩɩbsã* ne pʋg-kõapã tɩ b zĩnd yãmb tẽnsã pʋsẽ* n dɩ n tɩge.+
13 Rẽ poore, yãmb na n yeela y Wẽnnaam a Zeova taoor yaa: ‘Tõnd yiisa pʋɩɩr sẽn yaa sõngã fãa d zagsẽ wã n kõ Levi buudã nebã, sãambã, kɩɩbsã la pʋg-kõapã+ wa yãmb sẽn yeel tõndã. Tõnd pa kɩɩs yãmb noyã, bɩ n maan d toog kae ne rẽ ye.
14 Tõnd pa yãk-b n dɩ d sũ-sãang sasa, bɩ d sẽn wa n yaa rẽgd sasa, wall d yãk-b n kõ kũ-rãmb yĩng ye. Tõnd saka d Wẽnnaam a Zeova koɛɛgã, n maan bũmb nins fãa a sẽn yeel tõndã.
15 Masã, zĩnd-y y zĩ-sõngẽ wã saasẽ, n sulg n ges Israyɛll nebã sẽn yaa y nin-buiidã n ning-b barka,+ la y ning soolem ning y sẽn kõ tõndã barka, tẽng sẽn pid ne bĩisim la sɩɩdã,+ wa y sẽn da pʋlem d yaab-rãmbã.’+
16 “Rũndã, yãmb Wẽnnaam a Zeova yeta yãmb tɩ y tũ no-kãensã la tõ-kãensã. Yãmb segd n sak-b lame la y tũ-b ne y sũurã fãa+ la ne y sɩɩgã* fãa.
17 Rũndã, yãmb paamame t’a Zeova yeel t’a na n lebga yãmb Wẽnnaam, yãmb sã n kẽn a soayã zutu, la y sak a tõodã,+ a goamã la a noyã fãa,+ la y kelg a koɛɛgã.
18 Rũndã, a Zeova wʋmame me tɩ yãmb yeel tɩ y na n lebga a nin-buiidu, yẽ buud sẽn yaa toor zalle,+ wa a sẽn da pʋlem yãmbã, la tɩ yãmb na n tũu a noyã fãa.
19 A na n zẽka yãmb n yɩɩg buud a taabã a sẽn maanã,+ n kɩt tɩ y paam pẽgre, tɩ y yʋʋrã yi, la tɩ y paam ziir wa a sẽn da pʋlmã, yãmb sã n wilg tɩ y yaa buud sẽn welg toor yãmb Wẽnnaam a Zeova yĩnga.”+
Vẽnegr toor-toore
^ Pa rẽ bɩ, “t’a vɩɩmã be yell pʋgẽ.”
^ Ebre, “rignoyẽ wã.”
^ Ebre, “kamb sẽn pa tar ba-rãmbã.”
^ Ges-y gom-biis võor bilgrã zĩigẽ.
