Tõod sebre 29:1-29
29 Ad kaool ning a Zeova sẽn yeel a Moyiiz t’a maan ne Israyɛll nebã Mowaab soolmẽ wã goama, kaool ning a sẽn da maan ne-b Horɛɛbã sẽn yãk a toogo.+
2 A Moyiiz boola Israyɛll nebã fãa n tigim n yeel-b yaa: “Yãmb yãa bũmb nins fãa a Zeova sẽn maan yãmb nifẽ Ezɩpt soolmẽ wã, bũmb ning a sẽn maan a Farawõ ne a tʋm-tʋmdbã fãa la a soolmã fãa wã,+
3 sɩbg-kãsemsã yãmb sẽn yã wã, bõn-bãn-kãsems ne yel-soalmã.+
4 La hal n tãag rũndã, a Zeova pa kõ yãmb tõog tɩ y tõe n wʋm* yɛlã võor ye. A pa kõ-y nin tɩ y tõe n yã, la tʋb tɩ y tõe n wʋm ye.+
5 ‘Mam sẽn kell n yãag yãmb we-raoogẽ wã yʋʋm pis-naasã,+ futã y sẽn yerã pa ki, neooda wã y sẽn pidã me pa sãam ye.+
6 Yãmb pa wãb buri, y pa yũ divẽ wall rãam buud a to ye. Yaa sẽn na yɩl tɩ y bãng tɩ mam yaa yãmb Wẽnnaam a Zeova.’
7 Yãmb wa n taa zĩ-kãngã, tɩ Hɛsbon+ rĩm a Siyon ne Basan rĩm a Oog+ wa n na n zab ne tõndo, la tõnd tõog-b lame.+
8 Rẽ poore, tõnd dɩka b soolmã n kõ Rubɛn buudã, ne Gaad buudã la Manase buudã pʋɩ-sʋka,+ tɩ yɩ b pʋɩɩre.
9 Woto yĩnga, sak-y kaool-kãngã goamã la y tũ-ba, tɩ y sẽn maand fãa yɩ sõma.+
10 “Yãmb fãa yasa yãmb Wẽnnaam a Zeova taoor rũndã. Yaa y buud toor-toorã taoor dãmba, y kãsem-dãmbã, y nanambsã, Israyɛll rapã fãa,
11 y kambã, y pagbã,+ la y sãambã+ sẽn be y sik-zĩigẽ wã, sẽn sɩng ne ned ning sẽn wʋkd y raadã n tãag ned ning sẽn yãkd koom n kõt yãmbã.
12 Yãmb bee ka n na n wẽene, n kẽ yãmb Wẽnnaam a Zeova kaoolã pʋgẽ, kaool ning yãmb Wẽnnaam a Zeova sẽn maand ne yãmb rũndã,+
13 n na n kɩt tɩ y lebg a nin-buiidu,+ la t’a lebg yãmb Wẽnnaam+ wa a sẽn da pʋlem yãmbã, la wa a sẽn da pʋlem a Abrahaam,+ a Izaak+ ne a Zakoob+ sẽn yaa yãmb yaab-rãmbã.
14 “Pa ne yãmb bal la mam maand kaool-kãngã n na n kɩt tɩ y wẽen ye.
15 Yaa ne neb nins sẽn yas tõnd Wẽnnaam a Zeova taoor ka ne tõnd rũndã wã, la ne neb nins sẽn pa be ka ne tõnd rũndã wã.
16 (Bala yãmb meng mii tõnd vɩɩmã sẽn da yaa to-to Ezɩpt soolmẽ wã, la d sẽn pasg buud toɛy-toɛy soolem to-to d so-toakã sasa wã.+
17 La yãmb da nee b bũmb nins Wẽnnaam sẽn kisã, b bõn-naandsã sẽn yaa bõn-yoodã*+ b sẽn maan ne raado, kuga, wanzuri la ne sãnem tɩ ra be b sʋkã.)
18 Gũus-y tɩ rao bɩ paga, zak rãmb wall buud ra zĩnd yãmb sʋkã rũndã, tɩ b sũyã wa wẽnemd n bas tõnd Wẽnnaam a Zeova, tɩ b tɩ tũ bu-kãensã wẽnnaam-dãmba,+ la tɩ yẽgr ra wa tob yãmb sʋkã, n wom biis sẽn tar zẽnem, la absẽnt* ye.+
19 “La ned sã n wʋm wẽenegã goamã, n wuk a meng n yet a sũurẽ yaa: ‘Mam na n zĩnda bãane, baa mam sã n ket n kẽnd wa mam mengã sũurã sẽn datã.’ Rẽ sẽn na n wã neb nins fãa sẽn pẽ yẽ wã yĩnga,
20 a Zeova pa na n sak n kõ-a sugr ye.+ A Zeova sũurã na n puuga wʋsg ne nin-kãnga. La kãab-wẽnsã fãa b sẽn togs seb-kãngã pʋgẽ wã na n zĩnda a zugu.+ La a Zeova na n kɩtame t’a yʋʋrã menem saasã tẽngre.
21 A Zeova na n bak-a-la toor Israyɛll buudã fãa sʋka, n sɩbg-a tɩ zems ne kaoolã kãab-wẽns nins fãa b sẽn gʋls Tõogã seb-kãngã pʋgẽ wã.
22 “Yãmb yagensã zãmaan ning sẽn na n pʋglã, ne sãambã sẽn yi zĩ-zãrg n wa wã sã n yã yel-beed nins sẽn paam soolmã, bãas nins a Zeova sẽn kɩt tɩ kẽ soolmẽ wã,
23 la b yã a sẽn sãam soolmã tõr ne kidbri, yamsem, la bugum, tɩ ned pa le tõe n bʋde, tɩ bũmb pa tõe n tobe, tɩ mood me pa le tõe n yi a zugã, tɩ soolmã lebg wa Sodom la Gomoore,+ ne Adma la Zeboyim+ sẽn yaa tẽns a Zeova sũur sẽn puug wʋsg t’a sãam-bã,
24 bãmb ne buud toɛy-toɛyã fãa na n sokame yaa: ‘Bõe yĩng t’a Zeova maan soolmã woto?+ Yaa bõe n kɩt t’a sũurã puug wʋsg woto?’
25 Dẽ, b na n yeelame yaa: ‘Yaa bãmb sẽn bas a Zeova sẽn yaa bãmb yaab-rãmbã Wẽnnaamã kaoolã,+ kaool ning a sẽn maan ne-b a sẽn wa n yiis-b Ezɩpt soolmẽ wã.+
26 La b tɩ tũu wẽnnaam-dãmb a taaba, n wõgemd b taoore. Yaa wẽnnaam-dãmb b sẽn da pa mi, tɩ Wẽnnaam me pa kõ-b sor tɩ b waoog-b ye.+
27 Rẽ la a Zeova sũurã puug wʋsg ne soolmã, t’a kɩt tɩ kãab-wẽn-kãensã fãa sẽn gʋls seb-kãngã pʋgẽ wã kẽ soolmẽ wã.+
28 Rẽ n so t’a Zeova yiis-b b soolmã pʋgẽ ne sũ-pu-kãseng+ la ne sũ-kãbr wʋsgo, n tall-b n kẽng soolem a to pʋgẽ, zĩig ning b sẽn be rũndã wã.’+
29 “Bũmb nins sẽn solgã yaa tõnd Wẽnnaam a Zeova rẽnda,+ la bũmb nins sẽn vẽnegã yaa tõnd ne d yagensã rẽnd wakat fãa yĩnga, sẽn na yɩl tɩ d tũ Tõ-kãngã goamã fãa.+
Vẽnegr toor-toore
^ Ebre, “sũur tɩ y tõe n bãng.”
^ Ebre gom-bilã tõe n dat n bilga “bĩndu.” B wae n pʋta gom-bi-kãng n na n paoog bũmb ning yell b sẽn gomdã.
^ Absẽnt yaa tɩɩga, t’a sũmã yaa toog liga n le yaa zẽnem.
