Tõod sebre 3:1-29
3 “Tõnd lebg n dɩka Basan sore. La Basan rĩm a Oog yii ne a tãb-biisã fãa n wa seg tõnd Edreyi+ n na n zabe.
2 Rẽ la a Zeova yeel maam yaa: ‘Ra zoe-y-yã-a ye. Bala mam na n ninga yẽ ne a tãb-biisã fãa la a soolmã yãmb nugẽ. Yãmb na n maana yẽ wa yãmb sẽn maan Amoor nebã rĩm a Siyon sẽn da be Hɛsbonnã.’
3 Dẽ, tõnd Wẽnnaam a Zeova ninga Basan rĩm a Oog ne a tãb-biisã fãa tõnd nugẽ, tɩ tõnd kʋ-b fãa hal tɩ b ned baa a ye pa kell ye.
4 Tõnd deesa a tẽnsã fãa. Tẽng pa be tõnd sẽn pa reeg b nengẽ ye. Tẽns nins tõnd sẽn deesã fãa yɩɩ pis-yoobe. Yaa Argoob soolmã fãa, rat n yeel tɩ rĩm a Oog rĩungã sẽn be Basannã.+
5 Galʋ-tẽn-kãens fãa ra gũbga ne lal-wogdo, n tar rignoy la sogdse. Tõnd deesa tẽn-bõoneg wʋsg me.
6 Tõnd sãam-b-la+ wa d sẽn sãam Hɛsbon rĩm a Siyon tẽnsã fãa wã, la d kʋ rapã, pagbã la kambã.+
7 D yõga rũmsã fãa n looge, la d wʋk teed nins fãa sẽn da be tẽnsẽ wã.
8 “Wakat kãnga, tõnd deega Amoor rĩm-dãmb a yiibã+ sẽn da be Zʋrdẽ kʋɩlgã sẽnesã soolem, sẽn sɩng ne Arno longã* n tall n tãag Hɛrmo tãngã.+
9 (Yaa tãng ning Sɩdõ nebã sẽn da boond tɩ Siriyõ, tɩ Amoor nebã boondẽ tɩ Seniirã.)
10 Yɩɩ tẽns nins fãa sẽn be tẽn-laagẽ wã, Galaad tẽnsã fãa, la Basan soolmã fãa hal n tãag Salka ne Edreyi,+ sẽn yaa Basan rĩm a Oog rĩungã tẽnsã.
11 Refayim nebã sʋka, yaa Basan rĩm a Oog bal n da kete. A kũum-koglgã ra maana ne kutu,* n ket n be Raba sẽn yaa Amon nebã tẽngẽ wã. A woglmã yaa kãntɩɩg* a wɛ, t’a yalmã yaa kãntɩɩg a naas wa sẽn zems kãntɩɩg ning nebã fãa sẽn tar n magdã.
12 Ad soolem ning tõnd sẽn deeg wakat kãngã: Yaa Arowɛɛr+ sẽn be Arno longã* noorã, la Galaad soolmã sẽn be tãensẽ wã pʋɩ-sʋka. La m dɩka soolmã tẽnsã n kõ a Rubɛn yagensã ne a Gaad yagensã.+
13 Mam dɩka Galaad soolmã sẽn ketã, ne Basan fãa sẽn yaa rĩm a Oog rĩungã n kõ Manase buudã pʋɩ-sʋkã.+ B ra boonda Argoob soolmã fãa sẽn be Basannã tɩ Refayim nebã soolem.
14 “A Manase yageng a Zayɩɩr+ reega Argoob+ soolmã n tãag Gesʋʋr nebã ne Maakat nebã+ toadgã, n dɩk a meng yʋʋr n pʋd Basan tẽn-bõon-kãensã tɩ Havot-zayɩɩre,*+ hal n tãag rũndã.
15 La mam dɩka Galaad soolmã n kõ a Makɩɩre.+
16 Mam kõo a Rubɛn yagensã la a Gaad yagensã+ soolem ning sẽn sɩng ne Galaad n tall n tãag Arno longã,* tɩ b toadgã yaa longã tẽn-sʋk n tãag Zaboke, long ning sẽn yaa Amon nebã toadgã,
17 n paas Araba wã la Zʋrdẽ kʋɩlgã ne a wogellã, sẽn sɩng ne Kinerɛt n tãag Araba wã mogrã, rat n yeel tɩ Yamsem mogrã* sẽn be Pisga tãngã sigdgẽ n teesd yaangã.+
18 “Rẽ poore, mam yeela yãmb yaa: ‘Yãmb Wẽnnaam a Zeova kõo yãmb soolmã tɩ y sooge. Yãmb gãndaadã fãa na n boba zab-teedo, n lʋɩ Israyɛll nebã+ sẽn yaa y saam-biisã taoore, n dʋʋg Zʋrdẽ kʋɩlgã.
19 Yaa y pagbã, y kambã la y rũmsã bal n na n pa tẽns nins mam sẽn kõ yãmbã pʋsẽ. (Mam mii vẽeneg tɩ yãmb tara rũms wʋsgo.)
20 Na n yɩɩ woto n tãag a Zeova sẽn na n kɩt tɩ y saam-biisã vʋʋs wa a sẽn maan yãmb yĩngã, la b reeg soolem ning yãmb Wẽnnaam a Zeova sẽn na n kõ-b Zʋrdẽ kʋɩlgã rʋʋndã. Rẽ poore, yãmb ned kam fãa na n lebg n wa zĩnda zĩig ning mam sẽn kõ-a wã.’+
21 “Wakat kãnga, mam yeela a Zozuwe+ yaa: ‘Fo mengã nif yãa bũmb nins yãmb Wẽnnaam a Zeova sẽn maan rĩm-kãensã b yiibã. A Zeova na n maana soolem nins fãa yãmb sẽn na n dʋʋg kʋɩlgã n kẽ wã woto.+
22 Yãmb pa segd n zoe-b ye. Bala yaa yãmb Wẽnnaam a Zeova n zabd n sõngd yãmba.’+
23 “Wakat kãnga, mam yõka a Zeova sɛɛg n yeel yaa:
24 ‘Zu-soab sẽn ka to a Zeova, fo sɩngame n na n wilg f tʋm-tʋmdã f ziirã la f pãngã,*+ bala wẽnnaam a to ka be saasẽ wall tẽngã zugu, n tʋmd tʋʋm-kãsems a woto wa foo ye.+
25 M kotame tɩ f bas tɩ m tɩ ges tẽn-noogã sẽn be Zʋrdẽ kʋɩlgã rʋʋndã, tẽn-noogã sẽn be tãensẽ wã, n paas Libã.’+
26 La a Zeova sũur da ket n puuda ne maam yãmb yĩnga,+ t’a pa kelg maam ye. A Zeova pʋd n yeela maam yaa: ‘Seka woto! Da le saag n gom rẽ yell ne maam ye.
27 Kẽng n tɩ rʋ Pisga tãngã,+ n ges soolmã nin-taoore, rɩtgo, goabga, la yaanga. Bala fo pa na n dʋʋg Zʋrdẽ kʋɩlgã ye.+
28 Yãk a Zozuwe+ t’a yɩ taoor soaba, la f keng a raoodo, tɩ yaa yẽ n na n lʋɩ nin-buiidã taoor tɩ b rʋʋg Zʋrdẽ kʋɩlgã.+ Leb n yaa yẽ n na n kɩt tɩ b soog soolem ning fo sẽn na n yã wã.’
29 Woto fãa maana wakat ning tõnd sẽn da be long ning sẽn be Bɛt-pewoor+ noorã.
Vẽnegr toor-toore
^ Bɩ, “Arno kosoogã.”
^ Pa rẽ bɩ, “kug-sablga.”
^ Kãntɩɩg zemsa sãntimetr 44,5. Ges-y vẽnegr ning sẽn yaa B14.
^ Bɩ, “Arno kosoogã.”
^ Rat n yeel t’a “Zayɩɩr tẽn-bõoneg b sẽn tilg ne fu-roto.”
^ Bɩ, “Arno kosoogã.”
^ Rat n yeel tɩ Mog-kɩɩngã.
^ Ebre, “nugã sẽn tar pãngã.”