Tõod sebre 31:1-30
31 Rẽ poore, a Moyiiz yiime n gom ne Israyɛll nebã fãa,
2 n yeel-b yaa: “Rũndã, mam tara yʋʋm koabg la pisi.+ Mam pa le tõe n lʋɩ yãmb taoor ye.* Bala a Zeova yeela maam yaa: ‘Fo pa na n dʋʋg Zʋrdẽ kʋɩlgã ye.’+
3 Yãmb Wẽnnaam a Zeova n yaa soab ning sẽn na n lʋɩ y taoor n dʋʋg kʋɩlgã, la yaa yẽ mengã n na n sãam bu-kãensã fãa y taoore, tɩ y reeg b soolmã n sooge.+ Yaa a Zozuwe n na n lʋɩ yãmb taoor tɩ y rʋʋg kʋɩlgã,+ wa a Zeova sẽn da yeelã.
4 A Zeova na n sãam-b-la zãng wa a sẽn sãam a Siyon+ ne a Oog+ sẽn yaa Amoor nebã rĩm-dãmbã ne b soolmã.+
5 A Zeova na n sõnga yãmb tɩ y zab n tõog-ba. La yãmb segd n maan-b-la wa sẽn zems noy nins mam sẽn kõ yãmbã zãnga.+
6 Keng-y y sũy la y tall raoodo.+ Ra yɛɛs-y wall y zoe rabeem bãmb taoor ye.+ Bala yãmb Wẽnnaam a Zeova n yaa soab ning sẽn be yãmb taoorã. A pa na n tol n bas n pa sõng yãmba, wall a raag-y n bas ye.”+
7 A Moyiiz boola a Zozuwe n yeel-a Israyɛll nebã fãa nifẽ yaa: “Keng f sũur la f tall raoodo,+ bala yaa foo n na n tall nin-buiidã n tɩ kẽes soolem ning a Zeova sẽn pʋlem b yaab-rãmbã t’a na n kõ-b lame wã pʋgẽ. Fo na n kõ-b-la soolmã tɩ yɩ b pʋɩɩre.+
8 A Zeova n yaa soab ning sẽn be fo taoorã. A na n kell n zĩnda ne foo.+ A pa na n tol n bas n pa sõng foo, wall a raag-f n bas ye. Ra zoe rabeem wall f yɛɛs ye.”+
9 Dẽ, a Moyiiz gʋlsa Tõogã,+ n kõ maan-kʋʋdbã, Levi buudã neb sẽn zãad a Zeova kaoolã koglgã, la Israyɛll kãsem-dãmbã fãa.
10 A Moyiiz goma ne-b n yeel yaa: “Yʋʋm a yopoe fãa baasgẽ, rat n yeel tɩ wakat ning b sẽn yãk bas-taal yʋʋmdã pʋgẽ,+ sẽn yaa Zãn tigrã sasa,+
11 Israyɛll nebã fãa sã n wa tigim yãmb Wẽnnaam a Zeova taoor+ zĩig ning a sẽn na n yãkã, yãmb segd n karma Tõ-kãngã tɩ Israyɛll nebã fãa kelge.+
12 Tigm-y nin-buiidã fãa,+ rapã, pagbã, kambã,* la sãambã sẽn be yãmb tẽnsã pʋsẽ wã* tɩ b kelge, n bao n bãng yãmb Wẽnnaam a Zeova, n zoe-a, la b gũus n tũ Tõ-kãngã goamã fãa.
13 Woto, b kamb nins sẽn pa mi Tõ-kãnga wã na n kelgame,+ n zãms yãmb Wẽnnaam a Zeova zoees wakat ning fãa yãmb sẽn na n zĩnd soolem ning y sẽn na n dʋʋg Zʋrdẽ kʋɩlgã n tɩ kẽ n soogã pʋgẽ.”+
14 A Zeova yeela a Moyiiz yaa: “Ade! Fo kũumã wakat kolgame.+ Bool a Zozuwe tɩ y wa sɛk-roogẽ wã, tɩ m kɩt t’a lebg taoor soaba.”+ Dẽ, a Moyiiz ne a Zozuwe kẽng n tɩ yalsa sɛk-roogẽ wã.
15 La a Zeova vẽnega a meng sawadg pʋgẽ sɛk-roogẽ wã. La sawadgã yalsa sɛk-roogã rignoorẽ.+
16 A Zeova yeela a Moyiiz yaa: “Ade! Fo na n kii ka la bilfu. La nin-buiidã na n sɩnga wẽn-sãams tũubu,* soolem ning bãmb sẽn na n tɩ kẽ wã pʋgẽ.+ B na n daaga maam n base,+ n sãam kaool ning mam sẽn maan ne bãmbã.+
17 Wakat kãnga, mam sũurã na n puuga wʋsg ne-ba,+ tɩ m daag-b n base,+ n solg m neng ne-b+ hal n tãag b sẽn na n wa sãame. Yel-beed la sũ-sãams wʋsg sã n wa paam-b poore,+ b na n sokame yaa: ‘Pa tõnd Wẽnnaamã sẽn pa le be tõnd sʋkã la yel-beedã sẽn paamd tõndã sɩda?’+
18 La baraare, mam na n kell n solga m nengã, wẽng ning fãa b sẽn maane, b sẽn bas maam n tɩ tũ wẽnnaam-dãmb a taabã yĩnga.+
19 “Masã, gʋls yɩɩn-kãngã yãmb yĩnga,+ la y zãms-a Israyɛll nebã.+ Kɩt tɩ b zãms-a,* tɩ yɩɩn-kãngã yɩ kaset maam ne Israyɛll nin-buiidã sʋka.+
20 Mam sã n wa tall-b n tɩ kẽes tẽng ning mam sẽn pʋlem b yaab-rãmbã pʋgẽ,+ sẽn yaa tẽng sẽn pid ne bĩisim la sɩɩdã,+ tɩ b rɩ n tɩge, tɩ bũmb fãa yaa sõma ne-ba,+ b na n wẽnemdame n tɩ tũ wẽnnaam-dãmb a taaba, n waoog-ba, n paoog maam la b sãam mam kaoolã.+
21 Yel-beed la sũ-sãams wʋsg sã n wa paam-ba,+ yɩɩn-kãngã na n yɩɩ kaset bãmb yĩnga (bala b yagensã pa segd n yĩm-a ye.) Mam zoe n mii b sũurã tagsg sẽn na n yɩ a soaba,+ nand meng tɩ m tall-b n tɩ kẽes soolem ning mam sẽn pʋlm-bã pʋgẽ.”
22 Dẽ, a Moyiiz gʋlsa yɩɩllã baraare, n zãms-a Israyɛll nebã.
23 A* kɩtame t’a Nun biig a Zozuwe lebg taoor soaba,+ n yeel-a yaa: “Keng f sũur la f tall raoodo,+ bala yaa foo n na n tall Israyɛll nebã n tɩ kẽes soolem ning mam sẽn pʋlm-bã pʋgẽ.+ La mam na n kell n zĩnda ne foo.”
24 A Moyiiz sẽn gʋls Tõ-kãngã goamã zãng sebr zug n sa wã bala,+
25 a goma ne Levi buudã neb sẽn zãad a Zeova kaoolã koglgã, n yeel yaa:
26 “Reeg-y Tõ-kãngã sebrã+ n dɩgl yãmb Wẽnnaam a Zeova kaoolã koglgã sɛɛga,+ tɩ yɩ kaset yãmb yĩnga.
27 Bala mam mengã mii yãmb kɩɩsgã+ la y sũyã sẽn diglim to-to wã.+ Yãmb sã n kɩɩs a Zeova woto fãa mam sẽn ket n vɩ n be ne yãmbã, yãmb kõn kɩɩs-a mam kaalmã poor n yɩɩd sɩda?
28 Tigm-y yãmb buud toɛy-toɛyã kãsem-dãmbã fãa, ne y taoor dãmbã mam taoore, tɩ m togs-b gom-kãensã tɩ b wʋme, la tɩ saasã ne tẽngã yɩ mam kaset dãmb bãmb yĩnga.+
29 Bala mam mengã mii vẽeneg tɩ mam kũumã poore, yãmb na n maana sẽn yaa wẽnga,+ n bʋdg n bas sor ning mam sẽn wilg yãmb tɩ y tũ wã. La yel-beed n na n paam yãmb+ wakat sẽn wate, bala yãmb na n maana sẽn yaa wẽng a Zeova nifẽ, n beeg-a ne y nusã tʋʋma.”
30 Dẽ, a Moyiiz lebs n dɩka yɩɩllã goam hal sɩngrẽ n tɩ tãag a baasgẽ, tɩ Israyɛll nin-buiidã fãa wʋme.+
Vẽnegr toor-toore
^ Ebre, “n yit la m kẽedẽ ye.”
^ Ebre, “kom-kɩdsã.”
^ Ebre, “rignoyẽ wã.”
^ Bɩ, “sɩnga yoob ne wẽnnaam-dãmb a taaba.”
^ Ebre, “ning-a b noyẽ wã.”
^ Tog n yaa Wẽnnaam.
