Tõod sebre 4:1-49
4 “Masã, Israyɛll nebã, kelg-y noy la tõod nins mam sẽn kõt yãmb tɩ y tũ wã, sẽn na yɩl n tõog n vɩɩmde,+ la y tɩ kẽ soolem ning yãmb yaab-rãmbã Wẽnnaam a Zeova sẽn na n kõ yãmbã pʋgẽ, n soog-a.
2 Goam nins mam sẽn togsd yãmbã sʋka, yãmb pa segd n paas gomd wall y yãk gomd ye.+ Yaa sẽn na yɩl tɩ y kell n sak yãmb Wẽnnaam a Zeova goamã mam sẽn taasd yãmbã.
3 “Yãmb mens nin yãa a Zeova sẽn maan bũmb ning Pewoor Baallã poorẽ. Yãmb Wẽnnaam a Zeova sãama yãmb sʋkã neb nins fãa sẽn tũ Pewoor Baallã.+
4 La yãmb a neb nins sẽn kell n tũ yãmb Wẽnnaam a Zeova n pa bas-a wã, y fãa ket n vɩɩ rũndã.
5 Ade! Mam wilga yãmb noy la tõodo,+ wa mam Wẽnnaam a Zeova sẽn yeel maamã, sẽn na yɩl tɩ y tũ-b soolem ning yãmb sẽn na n tɩ soogã pʋgẽ.
6 Yãmb segd n tũ-b-la neere,+ bala rẽ na n kɩtame tɩ buud nins sẽn na n wʋm no-kãens kibarã bãng tɩ yãmb yaa nin-buiid sẽn tar yam la bãngre,+ n yeel yaa: ‘Hakɩɩka, bu-kãsen-kãngã yaa nin-buiid sẽn tar yam la bãngre.’+
7 Buud sẽn yaa kãseng beeme n tar wẽnnaam-dãmb sẽn pẽ b nin-buiidã, wa tõnd Wẽnnaam a Zeova sẽn pẽ tõnd wakat ning fãa d sẽn pʋʋsd-a wã sɩda?+
8 Buud sẽn yaa kãseng beeme n tar noy sẽn yaa tɩrse, la tõod sẽn yaa wa Tõ-kãensã fãa mam sẽn kõt yãmb rũndã wã sɩda?+
9 “Gũus-y y mens neere, n da wa yĩm bũmb nins yãmb nin sẽn yã wã, la tɩ b ra wa yi yãmb sũyã pʋsẽ y vɩɩmã tõr fãa ye. Sẽn paase, yãmb segd n wilga y kambã ne y yagensã bõn-kãense.+
10 Daar ning yãmb sẽn yals y Wẽnnaam a Zeova taoor Horɛɛbã, a Zeova yeela maam yaa: ‘Tigim nin-buiidã fãa mam taoore, tɩ m gom ne-ba,+ sẽn na yɩl tɩ b zãms mam zoees+ b vɩɩmã tõre, la b zãms b kambã.’+
11 “Dẽ, yãmb kolgame n yals tãngã sɛɛgẽ, la tãngã ra wita bugum n zẽkd n dʋʋd saasẽ. Lik bida ne sawad-taok sẽn yaa sablg n da be be.+
12 A Zeova koɛɛg yii bugmã pʋgẽ n gomd ne yãmba.+ Yãmb wʋma goamã, la yãmb pa yã baa fʋɩ ye.+ Yaa koɛɛg bal la yãmb wʋm-yã.+
13 Wẽnnaam wilga yãmb a kaoolã,+ n yeel yãmb tɩ y tũ. Yaa Tõod piigã.*+ Rẽ poore, a gʋls-b-la kug-wals+ a yiib zutu.
14 Wakat kãnga, a Zeova yeela maam tɩ m zãms yãmb noyã la tõodã, tɩ yãmb segd n tũ rẽ soolem ning yãmb sẽn na n tɩ kẽ n soogã pʋgẽ.
15 “Sẽn mik tɩ yãmb pa yã baa fʋɩ daar ning a Zeova sẽn gom ne yãmb bugum pʋgẽ Horɛɛbã, bɩ y gũus y mens neere,
16 n da wa tall manesem sẽn na n wã yãmba, yãmb sẽn na n pees bõn-naandg n maan bũmb wõneg yĩnga, bũmb sẽn wõnd pag wall raoa,+
17 rũng sẽn be tẽngã zugu, bɩ liuul sẽn yɩgd yĩngri,+
18 bõn-vuuds sẽn vuud tẽngã zugu, wall zĩnf sẽn be koomã pʋgẽ yĩng ye.+
19 Yãmb sã n zẽk y neng n ges saasã, n yã wĩndgã, kiuugã la ãdsã, rat n yeel tɩ bũmb nins fãa sẽn be saasẽ wã, bɩ y ra bas tɩ y yam kẽ-ba, tɩ y wõgemd n waoog-b ye.+ Yãmb Wẽnnaam a Zeova rɩka bõn-kãens n kõ buud toɛy-toɛyã fãa sẽn be tẽngã zugã.
20 La yaa yãmb la a Zeova yiis wʋng b sẽn tar n yẽnegd kutã pʋgẽ, rat n yeel tɩ Ezɩpt soolmẽ wã, tɩ y lebg nin-buiid yẽ mengã sẽn so,*+ wa yãmb sẽn yaa to-to rũndã wã.
21 “A Zeova sũur yika ne maam yãmb yĩnga,+ t’a wẽen tɩ mam pa na n dʋʋg Zʋrdẽ kʋɩlgã, wall m kẽ tẽn-noog ning yãmb Wẽnnaam a Zeova sẽn kõ yãmb tɩ na n yɩ y pʋɩɩrã pʋgẽ ye.+
22 Bala mam na n kii soolem-kãngã pʋgẽ. Mam pa na n dʋʋg Zʋrdẽ kʋɩlgã ye.+ La yãmb na n dʋʋga kʋɩlgã, n tɩ soog tẽn-noogã.
23 Gũus-y y mens neere, n da wa yĩm kaool ning yãmb Wẽnnaam a Zeova sẽn maan ne yãmbã ye.+ Sẽn paase, da pees-y bõn-naandg sẽn wõnd bũmb ning fãa yãmb Wẽnnaam a Zeova sẽn gɩdgã ye.+
24 Bala yãmb Wẽnnaam a Zeova yaa wa bugum sẽn dɩte.+ A yaa Wẽnnaam sẽn dat tɩ b tũ yẽ a ye tãa bala.+
25 “Yãmb sã n wa paam kamb la yagense, n vɩɩmd n kaoos soolmã pʋgẽ, n wa maan bũmb sẽn na n wã yãmba, y sã n pees bõn-naandg+ sẽn wõnd bũmb n maan sẽn yaa wẽng yãmb Wẽnnaam a Zeova nifẽ n beeg-a,+
26 saasã la tẽngã yaa mam kaset tɩ hakɩɩka, yãmb na n menema soolem ning yãmb sẽn na n dʋʋg Zʋrdẽ kʋɩlgã n tɩ soogã pʋgẽ tao-tao. Yãmb pa na n vɩɩmd be n kaoos ye. Yãmb na n menema gilli.+
27 A Zeova na n sãeega yãmb buud toɛy-toɛyã sʋka.+ Yãmb neb bilf bal n na n põs+ buud nins a Zeova sẽn na n tall yãmb n kẽngã pʋgẽ.
28 Beenẽ, yãmb na n waoogda wẽnnaam-dãmb ninsaalb sẽn maan ne raad la kuga.+ Yaa wẽnnaam-dãmb sẽn pa tõe n yã, sẽn pa tõe n wʋme, wall sẽn pa tõe n dɩ bɩ n wʋm yũug ye.
29 “Yãmb sã n bao y Wẽnnaam a Zeova beenẽ, y sã n bao-a ne y sũur fãa la ne y sɩɩg* fãa,+ y na n yãa-a lame.+
30 Bõn-kãensã fãa sã n wa paam yãmb kaoosg zugẽ, tɩ y sũy sãam wʋsgo, yãmb na n lebg n waa y Wẽnnaam a Zeova nengẽ, n kelg a koɛɛgã.+
31 Bala yãmb Wẽnnaam a Zeova yaa Wẽnnaam sẽn yaa nimbãan-zoɛta.+ A pa na n tol n bas yãmba, bɩ n sãam yãmb zãnga, wall a yĩm kaool ning a sẽn maan ne yãmb yaab-rãmbã ye.+
32 “Masã, sok-y n bãng-y bũmb nins sẽn maan sẽn deng yãmb wakatã, sẽn sɩng wakat ning Wẽnnaam sẽn naan ninsaal tẽngã zugã. Ges-y tẽngã kɩreng a ye n tãag a to wã. Bũmb sẽn yaa kãseng woto zoe n zĩndame, wall y zoe n wʋma bũmb a woto yell sɩda?+
33 Neb a taab zoe n wʋma Wẽnnaam koɛɛg sẽn yit bugum pʋgẽ wa yãmb sẽn wʋm n ket n vɩ wã sɩda?+
34 Wẽnnaam zoe n makame n na n yãk buud a mengã yĩng buud a to sʋka, n tũnug ne bʋ-kaoor toor-toore, ne bãna, ne yel-soalma,+ ne zabre,+ ne nug sẽn tar pãnga,+ ne kang sẽn tar pãnga, la ne tʋʋm-kãsems sẽn kẽesd rabeem,+ wa yãmb Wẽnnaam a Zeova sẽn maan yãmb yĩng Ezɩpt soolmẽ wã yãmb nifẽ wã sɩda?
35 B wilga yãmb bõn-kãensã fãa, sẽn na yɩl tɩ y bãng t’a Zeova n yaa Wẽnnaam sɩd-sɩdã,+ la tɩ Wẽnnaam a to kae n zʋʋg yẽ ye.+
36 A kɩtame tɩ yãmb wʋm a koɛɛg sẽn yit saasẽ, sẽn na yɩl n dems yãmba. La tẽngã zugu, a kɩtame tɩ yãmb yã a bug-kãsengã, la y wʋm a goamã sẽn da yit bugmã pʋgẽ.+
37 “A sẽn nong yãmb yaab-rãmbã, la a sẽn yãk b yagensã sẽn na n pʋgl bãmbã+ tɩ b yɩ yẽ nin-buiidã yĩnga, a lʋɩɩ yãmb taoor n yiis yãmb Ezɩpt ne a pãn-kãsengã.
38 A riga buud sẽn yaa kãsems la sẽn tar pãng n yɩɩd yãmba, n tall yãmb n wa kẽes bãmb soolmã pʋgẽ tɩ yɩ y pʋɩɩre, wa sẽn yaa to-to rũndã wã.+
39 Woto yĩnga, bɩ y bãng rũndã, la y ning y yamẽ tɩ yaa a Zeova n yaa Wẽnnaam sɩd-sɩd saasẽ la tẽngã zugu.+ Wẽnnaam a to kae ye.+
40 Yãmb segd n kell n tũu a noyã la a tõodã mam sẽn wilgd yãmb rũndã wã, sẽn na yɩl tɩ yɛlã yɩ sõma ne yãmb la y kambã sẽn na n pʋgl yãmbã, la y kell n vɩɩmd n kaoos soolem ning yãmb Wẽnnaam a Zeova sẽn na n kõ yãmbã pʋgẽ.”+
41 Wakat kãnga, a Moyiiz yãka tẽns a tãab sẽn be Zʋrdẽ+ kʋɩlgã yaang n welg toore.
42 Ned sã n kʋ a to ne yĩdgu, la a ra pa kis-a,+ a segd n zoe n kẽnga tẽn-kãensã a yembr pʋgẽ, n tɩ zĩnd be.+
43 Tẽn-kãens yaa Bezɛɛr+ sẽn be we-raoogã tẽn-laagẽ wã, Rubɛn buudã neb yĩnga, ne Ramot+ sẽn be Galaadã, Gaad buudã neb yĩnga, n paas Golan+ sẽn be Basannã, Manase buudã neb yĩnga.+
44 Masã, ad Tõogã+ a Moyiiz sẽn kõ Israyɛll nebã.
45 Yaa saglse, noy la tõod a Moyiiz sẽn kõ Israyɛll nebã, b sẽn yi Ezɩptã+ poore,
46 Zʋrdẽ kʋɩlgã sẽnese, long ning sẽn tees Bɛt-pewoorã,+ Amoor nebã rĩm a Siyon sẽn da be Hɛsbonnã+ soolmẽ. Yaa yẽ la a Moyiiz ne Israyɛll nebã sẽn zab ne n tõoge, b sẽn yi Ezɩptã+ poorã.
47 La bãmb sooga yẽ soolmã ne Basan rĩm a Oog+ soolmã, rat n yeel tɩ Amoor nebã rĩm-dãmb a yiibã sẽn da be Zʋrdẽ kʋɩlgã yaang sẽnesã soolem,
48 sẽn sɩng Arowɛɛr+ sẽn be Arno longã* noorã, n tãag Sɩyõ tãngã b sẽn boond tɩ Hɛrmo wã,+
49 ne Araba wã fãa sẽn be Zʋrdẽ kʋɩlgã yaang sẽnesã n tɩ tãag Araba wã mogrã* sẽn be Pisga+ tãngã sigdgẽ wã.
Vẽnegr toor-toore
^ Ebre, “Goam piigã.”
^ Bɩ, “sẽn yaa yẽ pʋɩɩre.”
^ Ges-y gom-biis võor bilgrã zĩigẽ.
^ Bɩ, “Arno kosoogã.”
^ Rat n yeel tɩ Yamsem mogrã, bɩ Mog-kɩɩngã.
