Tõod sebre 6:1-25
6 “Ad goama, noy la tõod nins yãmb Wẽnnaam a Zeova sẽn kõ n na n zãms yãmbã. Yaa sẽn na yɩl tɩ y tũ-ba, y sã n wa rʋʋg kʋɩlgã n kẽ soolem ning y sẽn na n soogã pʋgẽ.
2 Woto, yãmb ne y kambã la y yagensã+ na n zoee yãmb Wẽnnaam a Zeova, la y tũ a tõodã ne a noyã fãa mam sẽn kõt yãmbã y vɩɩmã tõre, sẽn na yɩl n vɩɩmd n kaoose.+
3 Israyɛll neba, yãmb segd n kelg-b lame la y tũ-b neere, tɩ bũmb fãa yɩ sõma ne-yã, tɩ y lebg wʋsg tẽng ning sẽn pid ne bĩisim la sɩɩdã pʋgẽ, wa a Zeova sẽn yaa yãmb yaab-rãmbã Wẽnnaamã sẽn pʋlem yãmbã.
4 “Israyɛll neba, kelg-y-yã. Tõnd Wẽnnaam a Zeova yaa Zeova-yɛnga.+
5 Yãmb segd n nonga a Zeova sẽn yaa yãmb Wẽnnaamã ne y sũurã fãa, ne y sɩɩgã* fãa,+ la ne y pãngã fãa.*+
6 Gom-kãensã mam sẽn togsd yãmb rũndã wã segd n paa yãmb sũyã pʋsẽ.
7 Yãmb segd n dɩk-b lame n zãms y kambã,*+ la y gom b yell ne-ba, y sã n wa zĩ y zakẽ, y sã n wa kẽnd sor zugu, y gãandg wakate, la y yikr wakate.+
8 Loe-y bãmb y nugẽ wã sẽn na yɩl n tẽegd b yelle. B segd n yɩɩ wa bãnd* y rĩyẽ wã.*+
9 Gʋls-y bãmb y kʋɩlensã lugã zutu, la y rignoyã zutu.
10 “Yãmb Wẽnnaam a Zeova sã n wa tall yãmb n tɩ kẽes soolem ning a sẽn pʋlem yãmb yaab-rãmb a Abrahaam, a Izaak la a Zakoob t’a na n kõo yãmbã pʋgẽ,+ (yaa soolem sẽn tar tẽns sẽn yaa bɛd la sẽn yaa neeb yãmb sẽn pa me,+
11 ne rot sẽn pid ne bõn-sõma buud fãa yãmb sẽn pa tʋm n paame, la buls yãmb sẽn pa tu, n paas viyn pʋt la oliiv tɩɩs yãmb sẽn pa sele,) tɩ y wa rɩ n tɩge,+
12 bɩ y gũus n da yĩm a Zeova yelle,+ soab ning sẽn yiis yãmb Ezɩpt soolmẽ wã, tẽng ning pʋgẽ yãmb sẽn da yaa yembsã ye.
13 Yaa yãmb Wẽnnaam a Zeova la y segd n zoe.+ Yẽ la yãmb segd n tũ.+ Yaa ne yẽ yʋʋr me la y segd n wẽendẽ.+
14 Yãmb pa segd n tũ wẽnnaam-dãmb a taaba, rat n yeel tɩ buud nins fãa sẽn gũbg yãmbã wẽnnaam-dãmb ye.+
15 Bala yãmb Wẽnnaam a Zeova sẽn be yãmb sʋkã yaa Wẽnnaam sẽn dat tɩ b tũ yẽ a ye tãa bala.+ Sã n pa rẽ, yãmb Wẽnnaam a Zeova sũur na n puuga ne yãmba,+ t’a sãam yãmb tẽn-gãongã zugu.+
16 “Yãmb pa segd n mak yãmb Wẽnnaam a Zeova,+ wa y sẽn mak-a to-to Masa+ wã ye.
17 Yãmb segd n tũu y Wẽnnaam a Zeova goamã, a saglsã la noy nins a sẽn yeel-y tɩ y tũ wã ne y sũur fãa.
18 Yãmb segd n maana sẽn yaa tɩrg la sẽn yaa sõma a Zeova nifẽ, sẽn na yɩl tɩ bũmb fãa yɩ sõma ne-yã, la tɩ y kẽ tẽn-noog ning a Zeova sẽn pʋlem y yaab-rãmbã pʋgẽ,+ n soog-a,
19 n dig yãmb bɛɛbã fãa y taoore, wa a Zeova sẽn pʋlmã.+
20 “Beoog-daare, yãmb kambã sã n wa sok-y yaa: ‘Bõe yĩng tɩ tõnd Wẽnnaam a Zeova kõ yãmb saglsã, noyã la tõodã?’
21 Bɩ y leok-b yaa: ‘Tõnd da yaa a Farawõ yembs Ezɩpt soolmẽ wã. La a Zeova yiisa tõnd Ezɩpt soolmẽ wã ne nug sẽn tar pãnga.
22 Tõnd nifẽ, a Zeova maana bãn la yel-soalem sẽn yaa kãsems la sẽn wat ne sãoongo, n nams Ezɩpt soolmã,+ ne a Farawõ la a zakã neb fãa.+
23 La a yiisa tõnd be n wa ka, n kõ tõnd soolem ning a sẽn da pʋlem tõnd yaab-rãmbã.+
24 Rẽ poore, a Zeova yeela tõnd tɩ d tũ no-kãensã fãa, la d zoe tõnd Wẽnnaam a Zeova tɩ naf-d wakat fãa,+ la d kell n vɩɩmde,+ wa sẽn yaa to-to rũndã wã.
25 Tõnd sã n sak d Wẽnnaam a Zeova n tũ no-kãensã fãa neer wa a sẽn yeel tõndã, na n wilgame tɩ d yaa tɩrse.’+
Vẽnegr toor-toore
^ Ges-y gom-biis võor bilgrã zĩigẽ.
^ Bɩ, “y sẽn tarã fãa.”
^ Bɩ, “n togs y kambã n yɩlme.”
^ Bɩ, “zu-vindg.”
^ Ebre, “yãmb ninã sʋka.”
