Tõod sebre 7:1-26
7 “Yãmb Wẽnnaam a Zeova sã n tall yãmb n tɩ kẽes tẽng ning yãmb sẽn na n soogã pʋgẽ,+ a na n diga buud toɛy-toɛy sẽn tar neb wʋsg me yãmb taoore:+ Yaa Hɛt nebã, Girgas nebã, Amoor nebã,+ Kanaã nebã, Perɛɛz nebã, Hevi nebã n paas Zebuus nebã.+ B fãa yaa buud a yopoe tɩ b sõorã la b pãngã yɩɩd yãmba.+
2 Yãmb Wẽnnaam a Zeova na n ning-b-la yãmb nugẽ tɩ y tõog-ba.+ Yãmb tog n sãam-b lame n da bas-b ye.+ Y pa segd n maan kaool ne-ba, wall y maan-b lohorem baa bilf ye.+
3 Yãmb pa segd n maan kaool ne-b kãadmã wɛɛngẽ ye.* Da rɩk-y y kom-pugli n kõ b kom-dibli, wall y rɩk b kom-pugli n kõ y kom-dibli ye.+
4 Bala bãmb na n kɩtame tɩ y kom-dibli wã wa bas Wẽnnaam n tũ wẽnnaam-dãmb a taaba.+ Dẽ, a Zeova sũurã na n puuga wʋsg ne yãmba, t’a menes-y tao-tao.+
5 “Ad yãmb sẽn segd n maan bu-kãens bũmb ninga: Sãam-y b tẽn-kugã, n wã kugã b sẽn lugl n pʋʋsdẽ wã,+ n kɛ ra-lugsã b sẽn lugl n pʋʋsdẽ* wã+ n lubi, la y yõog bõn-naandsã b sẽn peesã.+
6 Bala yãmb yaa buud sẽn welg toor y Wẽnnaam a Zeova yĩnga. Yãmb Wẽnnaam a Zeova yãka yãmb tɩ y lebg a nin-buiidu, buud sẽn yaa toor zall buud toɛy-toɛyã fãa sẽn be tẽngã zugã sʋka.+
7 “Pa yãmb sõor sẽn yɩɩd buud a taabã yĩng la y Wẽnnaam a Zeova wilg t’a nonga yãmba, n yãk-y ye.+ Bala buud a taabã fãa sʋka, yãmb sõorã n da yaa bilf n yɩɩda.+
8 Yaa a Zeova sẽn nong yãmbã yĩnga, n paas a sẽn pids pʋlengã a sẽn pʋlem y yaab-rãmbã yĩnga,+ la a Zeova sẽn yiis yãmb ne nug sẽn tar pãnga, n fãag-y tẽng ning pʋgẽ y sẽn da yaa yembsã,+ rat n yeel tɩ Ezɩpt rĩm a Farawõ nugẽ wã.
9 Yãmb mii vẽeneg tɩ yãmb Wẽnnaam a Zeova n yaa Wẽnnaam sɩd-sɩdã, Wẽnnaam ning sẽn maand sɩda, n pidsd kaool ning a sẽn maan ne neb nins sẽn nong-a la b sakd a noyã, la a maand nin-kãens neer hal n tãag b zãmaan tusa wã.+
10 La Wẽnnaam na n sãama neb nins sẽn kis yẽ wã tɩ yɩ b keoore.+ A na n sɩbga neb nins sẽn kis yẽ wã n pa tadg ye. A na n sãam-b lame tɩ yɩ b keoore.
11 Woto yĩnga, gũus-y neere, n sak goamã, noyã la tõod nins mam sẽn togs yãmb rũndã wã, n tũ-b neere.
12 “Yãmb sã n kell n kelg tõ-kãensã la y tũ-b neere, yãmb Wẽnnaam a Zeova na n pidsa kaool ning a sẽn maanã, la a maan-y neer wa a sẽn pʋlem y yaab-rãmbã.
13 A na n nonga yãmba, n ning-y bark la a kɩt tɩ y lebg wʋsgo. Soolem ning a sẽn pʋlem y yaab-rãmbã t’a na n kõo yãmbã pʋgẽ,+ a na n ninga yãmb bark tɩ y paam kamb wʋsgo,+ la a ning y tẽngã bõn-koaadlã barka, y koodã, y divẽ-paalgã, y kaamã,+ y rũm-bõonegã la y rũm-bɛdã kamb barka.
14 Yãmb na n lebga buud sẽn tar bark n yɩɩd buud a taabã fãa.+ Yãmb sʋkã pag bɩ rao pa na n kong biig ye. Yãmb rũmsã me pa na n kong kamb ye.+
15 A Zeova na n yiisa bãasã fãa yãmb sʋka. A pa na n kɩt tɩ bã-toos nins yãmb sẽn yã Ezɩptã baa a ye yõk-y ye.+ A pʋd n na n kɩtame tɩ bã-kãens yõk neb nins fãa sẽn kis yãmbã.
16 Yãmb segd n sãama buud nins fãa yãmb Wẽnnaam a Zeova sẽn na n ning yãmb nugẽ wã.+ Yãmb pa segd n zoe b nimbãanega,+ y pa segd me n tũ b wẽnnaam-dãmbã ye.+ Bala rẽ na n yɩɩ bẽdg y yĩnga.+
17 “Yãmb sã n wa yeel y sũurẽ yaa: ‘Bu-kãensã nebã sõor yɩɩda tõndo. D na n maana wãn n dig-ba?’+
18 Yãmb pa segd n zoe-b ye.+ Y segd n tẽega y Wẽnnaam a Zeova sẽn maan a Farawõ la Ezɩpt soolmã fãa bũmb ningã,+
19 sɩbg-kãsengã yãmb sẽn yã wã, la bãnã ne yel-soalmã,+ n paas yãmb Wẽnnaam a Zeova sẽn yiis yãmb ne nug sẽn tar pãng la ne kang sẽn tar pãngã.+ Yaa woto la yãmb Wẽnnaam a Zeova na n maan buud nins fãa yãmb sẽn zoetã.+
20 Yãmb Wẽnnaam a Zeova na n kɩtame tɩ b koms raood* hal tɩ neb nins sẽn kete,+ n da solgd b mens ne yãmbã menem fasɩ.
21 Ra zoe-y rabeem bãmb yĩng ye. Bala yãmb Wẽnnaam a Zeova bee ne yãmba.+ A yaa Wẽnnaam sẽn yaa kãsenga, tɩ nebã segd n zoe-a la b waoog-a.+
22 “Yãmb Wẽnnaam a Zeova na n diga bu-kãensã neb yãmb taoor bilf-bilfu.+ Wẽnnaam pa na n bas tɩ y sãam-b zĩig pʋgẽ, tɩ we-rũmsã wa lebg wʋsg n maan yãmb wẽng ye.
23 Yãmb Wẽnnaam a Zeova na n ninga bãmb yãmb nugẽ tɩ y tõog-ba, hal n wa menes-b zãnga.+
24 A na n ninga b rĩm-dãmbã yãmb nugẽ,+ la yãmb na n kɩtame tɩ b yʋyã menem saasã tẽngre.+ Ned baa a ye kõn tõog n yals yãmb taoore,+ hal tɩ y wa sãam-b zãnga.+
25 Yãmb segd n yõoga bõn-naandsã b sẽn pees n maan b wẽnnaam-dãmbã.+ Ra tʋlg-y wanzuri wã ne sãnemã sẽn be b zutã, wall y wʋk n sooge,+ tɩ wa yɩ bẽdg yãmb yĩng ye. Bala yaa bũmb yãmb Wẽnnaam a Zeova sẽn kisi.+
26 Yãmb pa segd n tall bũmb Wẽnnaam sẽn kis n wa y zagsẽ, tɩ wa kɩt tɩ y lebg bũmb sẽn segd ne sãoong wa bõn-kãng ye. Yãmb segd n kisga rẽ ne y sũur fãa, bala yaa bũmb sẽn segd ne sãoongo.
Vẽnegr toor-toore
^ Bɩ, “kẽ kãadem ne-b ye.”
^ Ges-y gom-biis võor bilgrã zĩigẽ.
^ Pa rẽ bɩ, “yirb, yɛɛs.”
