Yɩɩn-sõamyã sebre 33:1-22
33 Yãmb a nin-tɩrse, kaas-y ne sũ-noog a Zeova yĩnga.+
Zemsame tɩ nin-tɩrsã pẽg-a.
2 Pʋʋs-y-yã a Zeova bark ne pɛndga.Yɩɩl-y n pẽg-y-yã-a ne yʋʋm-teed sẽn tar riss piiga.
3 Yɩɩl-y yɩɩn-paall yẽ yĩnga.+Wẽ-y yʋʋm-teed nins sẽn tar rissã sõma, la y kaas ne sũ-noogo.
4 Bala a Zeova gomdã yaa tɩrga.+B tõe n teega bũmb nins fãa a sẽn maandã.
5 A nonga tɩrlem, la a nong bʋʋd sẽn kao n pa bak n sõnge.+
Dũniyã pida ne a Zeova maan-neerã.+
6 Yɩɩ ne a Zeova gomdã la b maan saasã.+Yɩɩ ne a noorã pemsem* la b maan bũmb nins fãa sẽn be saasẽ wã.*
7 A tigimda mogrã koom wa b sẽn gɩdg ne lalga.+A ningda koomã sẽn gudgdã bao pʋsẽ.
8 Bɩ dũniyã tõr zoe a Zeova.+
Bɩ tẽn-gãongã nebã fãa zoe-a la b waoog-a.
9 Bala a gomame, la pidsame.+A kõo noore, la rẽ n yɩ.+
10 A Zeova kɩtame tɩ buud toɛy-toɛyã sẽn sedã* pa yãk neng ye.+A kɩtame tɩ ninsaalbã magbã* pa tõog ye.+
11 La a Zeova saglsã* na n paa wakat sẽn kõn sa yĩnga.+A sũurã tagsa paada zãmaan woo zãmaana.
12 Buud ning Wẽnnaam sẽn yaa a Zeova wã tara sũ-noogo,+rat n yeel tɩ neb nins a sẽn yãk tɩ yaa yẽ rẽndã.+
13 A Zeova bee saasẽ n sulgd n getẽ.A nee ãdem-biisã fãa.+
14 A bee a zĩigẽ wã,n get dũniyã nebã.
15 Yaa yẽ n maand nebã fãa sũy wa b sẽn yagd tãnd laok to-to wã.A maagda a yĩng n get ninsaalbã tʋʋmã fãa.+
16 Tãb-biis wʋsg pa tõe n fãag rĩm ye.+Gãndaoog pãn-kãsengã pa tõe n fãag-a ye.+
17 Sã n yaa ne fãagre,* wed-moaag pa baa fʋɩ.+A pãn-kãsengã pa tõe n kɩt tɩ ned põs ye.
18 A Zeova ninã geta sẽn zoet-b yẽ wã,+rat n yeel tɩ neb nins sẽn gũud a maan-neerã.
19 Yaa sẽn na n fãag bãmb* ne kũum,la a kɩt tɩ b ra ki kom wakat ye.+
20 Tõnd* gũuda a Zeova.
A yaa tõnd sõangd la d gãongo.+
21 Tõnd sũyã kɩdemda sũ-noogo,*bala tõnd teega a yʋ-sõngã.+
22 Zeova, bɩ yãmb maan-neerã pa tõnd zutu,+tɩ d ket n gũud yãmba.+
Vẽnegr toor-toore
^ Bɩ, “vʋʋsem.”
^ Ebre, “saasẽ tãb-biisã fãa.”
^ Bɩ, “saglsã.”
^ Bɩ, “tagsa wã.”
^ Ebre, “yam-yãkrã.”
^ Bɩ, “tõogre.”
^ Bɩ, “b sɩɩsã.”
^ Bɩ, “Tõnd sɩɩsã.”
^ Ebre, “kɩdemda yẽ pʋgẽ.”
