Abdiyaas sebre 1:1-21
1 Ad vẽnegr a Abdiyaas* sẽn paame:
Ad a Zeova sẽn yaa Zu-soab sẽn ka to wã sẽn yeel Edom+ wɛɛngẽ:
“Tõnd wʋma koɛɛg sẽn yi a Zeova nengẽ.B tʋma koe-taasd buud toɛy-toɛyã sʋka, t’a yeel yaa:
‘Yik-y tɩ d segl d mens n zab ne-a.’”+
2 “Kelge! Mam kɩtame tɩ fo pa zem baa fʋɩ buud toɛy-toɛyã sʋk ye.B kisa foo wʋsgo.+
3 Fo sũurã sẽn pid ne tɩtaamã belga foo,+foom a soab ning sẽn be pĩisã pẽgsẽ,la sẽn be zĩ-zãntsẽ n yet f sũurẽ yaa:‘Ãnd n na n sik maam tẽnga?’
4 Baa fo sã n maan f roogã yĩngr* wa sɩlga,wall f tɩʋ f tʋkã ãdsã sʋka,mam na n kɩtame tɩ f yi be n lʋɩ.” Yaa a Zeova n yeele.
5 “Wagda sã n wa fo nengẽ, fãadb sã n wa ne yʋngo,b kõn zu b sẽn dat bũmb ningã bal sɩda?
Wall viyn biis wobdb sã n wa fo nengẽ,
b kõn bas kẽer tɩ ned tõe n yiis sɩda?+(B sɩd na n sãama foo zãnga!)*
6 Ad b vaeesa a Ezayu soolmã!
B gẽesa a bõn-sõma wã sẽn solgã zĩig fãa!
7 B riga foo n ta toadgẽ wã.
Fo sẽn da yõg zood ne b rãmbã* fãa zãmba foo.
Neb nins sẽn da zĩ bãan ne foomã zaba ne foo n tõoge.
Sẽn naag-b foom n dɩt rɩɩbã* na n bẽda foo,la fo pa na n bãng ye.”
8 A Zeova yeelame yaa: “Baraare,mam pa na n sãam yam dãmbã sẽn be Edommã,+la m sãam yam-vẽenem dãmbã a Ezayu soolmã sẽn yaa tãensẽ wã sɩda?
9 Foom a Temanne,+ rabeem na n yõka fo zabr gãndaadã,+bala b na n kʋʋ neb nins fãa sẽn be a Ezayu soolmã sẽn yaa tãensẽ wã ne sʋʋga.+
10 Fo sẽn maan f ba-biig a Zakoob wẽngã yĩnga,+yãnd na n yõka foo.+B na n sãama foo wakat fãa yĩnga.+
11 Daar ning fo sẽn yaas kɛɛnga,daar ning sãamb sẽn tall a tãb-biisã n kẽng yembdã,+sãambã sẽn wa n kẽ a galʋ-tẽngẽ wã* n maan bãnd+ Zerizalɛm wɛɛngẽ wã,fo maana wa bãmba.
12 F ba-biigã yel-pakrã daare, fo ra pa segd n kɩdem ye.+Fo ra pa segd n kɩdem sũ-noog Zida nebã wɛɛngẽ b sãoongã daar ye.+Fo ra pa segd n gom ne wuk-m-meng woto b toogã daar ye.
13 Fo ra pa segd n wa mam nin-buiidã rignoorẽ b sãoongã daar ye.+B sãoongã daare, fo ra pa segd n kɩdem b yel-pakrã yĩng ye.Fo ra pa segd n wʋk b paoongã b sãoongã daar ye.+
14 Fo ra pa segd n yaas sotiisẽ wã n kʋ b neb nins sẽn zoet n na n põsã ye.+Fo ra pa segd n yõg b neb nins sẽn põsã n ning b bɛɛbã nusẽ yel-pakrã daar ye.+
15 Bala a Zeova daarã kolgame. Yaa daar ning a sẽn na n zab ne buud toɛy-toɛyã fãa wã.+
B na n maana foo wa fo sẽn maanã.+
Fo sẽn maan f taabã bũmb ningã na n lebg n waa fo zugu.
16 Bala buud toɛy-toɛyã na n yũuda mam sũ-puugrã wa divẽ n pa basdẽ,+wa fo sẽn da yũud divẽ mam tãn-sõngã zugã.
B na n yũu mam sũ-puugrã. B na n vel-a-la tao-tao.Rẽ poore, na n yɩɩ wa b zɩ n zĩnd ye.
17 La neb nins sẽn na n põsã na n zĩnda Siyõ tãngã zugu.+A na n yɩɩ sõngo.+A Zakoob buudã neb na n sooga bũmb nins sẽn yaa bãmb dẽndã.+
18 A Zakoob buudã neb na n lebga wa bugum.A Zozɛf buudã neb na n lebga wa bug-witim,t’a Ezayu buudã neb yɩ wa moodo,tɩ b yõog-b n dɩ-ba.A Ezayu buudã ned baa a ye pa na n põs ye.+Bala yaa a Zeova meng n gome.
19 B na n sooga Negɛɛbã ne a Ezayu soolmã sẽn yaa tãensã,+n paas Sefela wã ne Filisti nebã soolmã.+
B na n sooga Efrayim weoogã ne Samari weoogã.+Bẽnzame buudã na n sooga Galaade.
20 Tẽn-kãngã sẽn gũbg lalsã neb nins sẽn kẽng yembdã,+rat n yeel tɩ Israyɛll nebã na n sooga Kanaã nebã soolem hal n tãag Sarfate.+
Zerizalɛm neb nins sẽn be yembd la sẽn da be Sefaraadã na n sooga Negɛɛbã tẽnsã.+
21 Fãagdb n na n dʋ Siyõ tãngã zugu,n kao a Ezayu soolmã sẽn yaa tãensã nebã bʋʋdo.+Dẽ, naamã na n lebga a Zeova rẽnda.”+
Vẽnegr toor-toore
^ Rat n yeel t’a “Zeova tʋm-tʋmda.”
^ Pa rẽ bɩ, “yɩk yĩngr.”
^ Pa rẽ bɩ, “B na n sãama foo n ta zĩ-bʋgo?”
^ Bɩ, “Sẽn da maan-b kaool ne foomã.”
^ Ebre, “burã.”
^ Ebre, “rignoyẽ wã.”
