Ezayi sebre 39:1-8
-
Koe-taasdb sẽn yi Babilon n wa (1-8)
39 Wakat kãnga, a Baladan biig a Merodak-baladan sẽn yaa Babilon rĩmã tʋma neb tɩ b tɩ kõ a Ezekɩyaas+ lɛta ne kũuni. Bala yẽ wʋmame t’a Ezekɩyaas ra lʋɩɩ bãaga, la t’a bãagã sãoogame.+
2 A Ezekɩyaas reeg-b-la sõma, la a wilg-b a laogã bĩngr roogã:+ Wanzuri wã, sãnemã, bomiye kaamã* ne ka-sõng a to, a zab-teedã fãa, la bũmb nins fãa sẽn be a laogã bĩngr zĩigẽ wã. Bũmb pa be a na-yirã ne a soolmã fãa pʋgẽ a sẽn pa wilg-b ye.
3 Rẽ poore, no-rɛɛs a Ezayi waa rĩm a Ezekɩyaas nengẽ n sok-a yaa: “Nin-kãensã yeelame tɩ bõe, la b yii yɛ?” T’a Ezekɩyaas leok yaa: “Bãmb yii zĩ-zãrgẽ, Babilon soolmẽ wã.”+
4 A Ezayi leb n sokame yaa: “Bõe la b yã na-yirã pʋgẽ?” T’a Ezekɩyaas leok yaa: “B yãa bũmb nins fãa sẽn be na-yirã. Bũmb pa be mam laogã bĩngr zĩigẽ m sẽn pa wilg-b ye.”
5 A Ezayi yeela a Ezekɩyaas yaa: “Kelg-y-yã a Zeova sẽn yaa tãb-biis naabã koɛɛga.
6 Ad a Zeova sẽn yeele:+ ‘Gese! Wakat n wat tɩ b na n wʋk bũmb nins fãa sẽn be na-yirã la bũmb nins fãa f yaab-rãmbã sẽn bĩng n tãag masã wã n kẽng Babilonne. Bũmb baa a ye pa na n kell ye.’+
7 ‘Sẽn paase, b na n yõga kamb nins fo sẽn na n dogã kẽer n tall n kẽng Babilonne, tɩ b tɩ lebg Babilon rĩmã na-yirã tʋm-tʋmdba.’”+
8 A Ezekɩyaas sẽn wʋm rẽ, a yeela a Ezayi yaa: “A Zeova goamã fo sẽn togsã yaa sõma.” La a paasame: “Bala laafɩ la bãan na n zĩnda m vɩɩmã tɛka.”+
Vẽnegr toor-toore
^ Yaa tɩɩs kẽer kaam sẽn tar yũ-noogo.
