Ezayi sebre 41:1-29
41 “Yãmb a ko-sʋk tẽnse, sĩnd-y n kelg-y maam.Bɩ buud toɛy-toɛyã lebs n paam b pãngã.
Bɩ b kolge, la b gome.+
Bɩ d seg taab tɩ m bʋ-yã.
2 Ãnd n yãk ned sẽn yit wĩndg sẽn pukdẽ,*+n boond-a ne tɩrlem t’a wa maan a raabo,*sẽn na yɩl n ning buud toɛy-toɛyã a nugẽ,la a kɩt t’a soog rĩm-dãmba?+
Ãnd n tall a sʋʋgã n kɩt tɩ b lebg tom,la a sãeeg bãmb ne a tãpã, wa sobg sẽn dɩkd moogo?
3 Yẽ rigda bãmba, n tũud soay a nao sẽn zɩ n tage,n loogdẽ tɩ bũmb pa gɩdgd-a ye.
4 Ãnda tʋʋmd la woto? Ãnd n maan bõn-kãngã,n boond zãmaan toɛy-toɛyã hal sɩngrẽ?
Yaa maam a Zeova. Maam n yaa Pipi soabã,+la hal n tãag yaoolem dãmbã, mam ket n yaa m sẽn yaa a soabã.”+
5 Ko-sʋk tẽnsã yãa rẽ n yɛɛse.
Dũniyã kɩremsã sɩnga rigbu.
Bãmb kolgdame, bãmb watame.
6 Ned fãa sõngda a tũud-n-taaga,la a yet a ba-biig yaa: “Keng f menga.”
7 Nug-tʋʋm soabã kengda yõakã raoodo,+tɩ ned ning sẽn saasd ne marto wãkengd sẽn toosd-a kɩsgr zugã raoodo.
Yẽ yetame tɩ sũgungã yaa sõma.
Rẽ poore, b kaad-a-la ne põents sẽn na yɩl tɩ ra vigs ye.
8 “La foom a Israyɛlle, fo yaa mam tʋm-tʋmda.+Foom a Zakoobe, mam yãka foo,+fo sẽn yaa a Abrahaam sẽn yaa m zoa wã yagengã,+
9 foom a soab ning mam sẽn yiis hal dũniyã satmẽ wã,+la foo a soab ning mam sẽn bool hal zĩis nins sẽn zãr n yɩɩdã.
Mam yeela foo yaa: ‘Fo yaa mam tʋm-tʋmda.+Mam yãka foom. Mam pa bas foom ye.+
10 Ra zoe rabeem ye. Bala mam bee ne foo.+
Ra maan yɩɩr ye. Bala mam yaa fo Wẽnnaam.+
Mam na n kõo foo pãnga. N-ye, mam na n sõnga foom,+mam na n gãda foo kãn-kãe ne m nug-rɩtgã sẽn wat ne tɩrlmã.’
11 Ade! Neb nins fãa sẽn yikd b sũy ne foomã na n paama yãnd la paoogre.+
B na n sãama neb nins sẽn zabd ne foomã n kɩt tɩ b lebg zaalem.+
12 Fo na n gẽesa neb nins sẽn maood ne foomã, la f pa na n yã-b ye.Neb nins sẽn zabd ne foomã na n lebga wa bũmb sẽn pa be, wa zaalem fasɩ.+
13 Bala maam a Zeova sẽn yaa fo Wẽnnaamã gãta fo nug-rɩtgo,la m yet foom yaa: ‘Da zoe rabeem ye. Mam na n sõnga foom.’+
14 A Zeova sẽn yaa fo Fãagdã,*+ n yaa Israyɛll Sõng soabã yeelame yaa:Zũnzũur* a Zakoobe,+ da zoe rabeem ye.Yãmb a Israyɛll neba, mam na n sõnga yãmba.”
15 “Gese! Mam kɩtame tɩ fo lebg zɛɛg ra-vuudga,+zɛɛg tʋʋm-te-paalg sẽn tar noy sẽn dɩt sõma.
Fo na n taba tãens n sirg-ba,la f kɩt tɩ kunkubã lebg wa wudgu.
16 Fo na n yelg-b lame,tɩ sobgã rɩk-b n looge.Sob-kẽeng n na n sãeeg-ba.
Fo na n kɩdma sũ-noog a Zeova pʋgẽ,+la fo na n pẽga f meng Israyɛll Sõng soabã pʋgẽ.”+
17 “Nimbãan-nedã ne naong soabã baooda koom, la ka be ye.
Ko-yũudã kɩtame tɩ b zɩlmã kʋɩ.+
Maam a Zeova na n sõng-b lame.+
Maam a Israyɛll Wẽnnaamã pa na n daag foo n bas ye.+
18 Mam na n kɩtame tɩ kʋɩls koom zoe kunkub nins zut baa fʋɩ sẽn pa yitẽ wã,+la m kɩt tɩ ko-bunds zoe tẽn-nabẽ wã.+
Mam na n kɩtame tɩ we-raoogã lebg bãk sẽn tar tãnwĩisi,la m kɩt tɩ zĩ-koɛɛgã lebg ko-bunds zĩiga.+
19 Mam na n sela sɛɛdr tɩɩg we-rasempʋɩɩgẽ,n paas akasiya ne mirt la pẽ tɩɩse.+
We-rasempʋɩɩg sẽn yaa tẽn-nabrẽ wã, mam na n sela zenevirie tɩɩga,ne frɛn* la sɩprɛs tɩɩse,+
20 sẽn na yɩl tɩ nebã fãa yã la b bãnge,n maag b yĩng n ges n bãngtɩ yaa a Zeova nug n maan bõn-kãnga,la tɩ yaa Israyɛll Sõng soabã n naan-a.”+
21 A Zeova yeelame yaa: “Togs-y y yellã.”
A Zakoob Rĩmã yeelame: “Wa-y ne y kasetã.”
22 “Wa-y ne kaset la y wilg bũmb nins sẽn na n maanã.
Togs-y tõnd bũmb nins sẽn zĩnd pĩndã,*sẽn na yɩl tɩ d tags b zut neer n bãng b baasg sẽn na n yɩ a soaba,
wall y togs tõnd bũmb nins sẽn watã.+
23 Wilg-y tõnd bũmb ning sẽn na n maan beoog-daare,tɩ d bãng tɩ yãmb yaa wẽnnaam-dãmba.+
N-ye, maan-y bũmbu, sõma wall wẽnga,tɩ d sã n yã bɩ ling-d wʋsgo.+
24 Ade! Yãmb ka yõodo,la y tʋʋmdã yaa zaalem.+
Ned ning sẽn yãkd yãmba, a yaa ned b sẽn kisi.+
25 Mam yãka ned sẽn yit nug-rɩtg sẽnesã, la a na n waame.+Yaa ned sẽn yit wĩndg sẽn pukdẽ*+ sẽn na n pẽg* mam yʋʋrã.
Yẽ na n taba nanambs wa tãndo,+la wa yagd sẽn tabd tãn-maasa.
26 Ãnd n togs rẽ hal sɩngrẽ wã tɩ tõnd da tõe n bãnge,wall hal pĩnd wẽndẽ, tɩ tõnd da tõe n yeel t’a bee bʋʋm?+
Hakɩɩka, ned baa a ye pa moon dẽ,
ned baa a ye pa gom rẽ yell me ye.
Yãmb pa togs baa fʋɩ tɩ ned wʋm ye!+
27 Maam n yɩ pipi n yeel Siyõ yaa: “Gese! Ad-y-ba!”+
Mam na n tʋma ned ne koe-noog Zerizalɛm.+
28 La mam da ket n getame, la m pa yã ned ye.Ned ra kae b sʋkã sẽn na n kõ sagls ye.
Mam da ket n kotame tɩ b leoke.
29 Ges-y-yã! Bãmb fãa ka võor ye.
B tʋʋmã yaa zaalem.
B bõn-naandsã sẽn dõogã yaa sobg la faoor bala.+
Vẽnegr toor-toore
^ Bɩ, “yaanga.”
^ Ebre, “a naoẽ.”
^ Bɩ, “Soab ning sẽn lebs n da foomã.”
^ Rat n yeel tɩ sẽn pa tõe n sõng a menga, la nimbãan-neda.
^ Yaa tɩ-bedre, t’a woglem tõe n ta metr 15. A vãadã yaa kẽeg n pɩnda, t’a wil-poalã kõbg yaa wa tompɛglem.
^ Ebre, “pipi wã.”
^ Bɩ, “yaang.”
^ Ebre, “bool.”
