Ezayi sebre 43:1-28
43 Masã, Zakoobe, ad a Zeova sẽn yaa fo Naandã,Soab ning sẽn naan foom a Israyɛllã+ sẽn yeele:
“Ra yɛɛs ye. Bala mam fãaga* foom.+
Mam boola foom ne f yʋʋre.
Maam n so foom.
2 Fo sã n wa pasgd koom, mam na n zĩnda ne foom,+la fo sã n wa rʋʋgd kʋɩlse, koomã pa na n lim-f ye.+
Fo sã n wa kẽnd bugmẽ, bugmã pa na n yõog foom,bug-witmã me pa na n vʋʋl-f ye.
3 Bala mam yaa fo Wẽnnaam a Zeova,Israyɛll Sõng soabã sẽn yaa fo Fãagdã.
Mam dɩka Ezɩpt n yao n fãag foom,la Etiyopi ne Seba me n kõ n deeg foom.
4 Bala fo tara yõod mam nifẽ.+Mam zẽka fo zug la m nong foom.+
Rẽ n so tɩ m na n dɩk neb n kõ n fãag foom,la m dɩk buud toɛy-toɛy n kɩs n fãag f yõorã.*
5 Ra yɛɛs ye. Bala mam bee ne foom.+
Mam na n kɩtame tɩ f yagensã yi yaang n wa,la m tɩ tall-b nin-taoor n wa.+
6 Mam na n yeela rɩtg yaa: ‘Wa ne-ba!’+
La m yeel goabg yaa: ‘Ra gɩdg-b ye.
Tall m kom-dibli wã sẽn be zĩ-zãrgẽ wã, la m kom-pugli wã sẽn be dũniyã kɩremsẽ wã n wa.+
7 Yaa neb nins fãa b sẽn boond ne mam yʋʋrã,+neb m sẽn naan m ziirã yĩnga,la m sẽn yag la m maane.’+
8 Yiis-y nin-buiid sẽn yaa zoens baa ne b sẽn tar ninã,la sẽn yaa wʋms baa ne b sẽn tar tʋbã.+
9 Bɩ buud toɛy-toɛyã fãa tigim taab zĩ-yɛnga,la bɩ nin-buiidã tigim taaba.+
Ãnd bãmb sʋkã n tõe n togs bõn-kãngã,
wall ãnd n tõe n kɩt tɩ tõnd wʋm pipi yɛlã?*+
Bɩ b wa ne b kaset rãmb n wilg tɩ b bee bʋʋm,pa rẽ bɩ b kelg la b yeel tɩ yaa sɩda.”+
10 A Zeova yetame yaa: “Yãmb yaa mam kaset rãmba.”+“N-ye, mam tʋm-tʋmd mam sẽn yãke,+sẽn na yɩl tɩ y bãng maam la y tẽ maam,*la y bãng me tɩ mam ket n yaa m sẽn yaa a soabã.+
Sẽn deng maam, Wẽnnaam pa zĩnd ye.La mam poorẽ, a to pa zĩnd me ye.+
11 Maam, mam yaa a Zeova.+ Mam sẽn yãk m toogo, fãagd kae ye.”+
12 A Zeova yetame yaa: “Maam la soab ning sẽn togse, sẽn fãage, la sẽn kɩt tɩ b bãnge,wẽn-sãang sẽn wa n ka be yãmb sʋkã.+
Woto wã, yãmb yaa mam kaset rãmba, tɩ mam yaa Wẽnnaam.+
13 Sẽn paase, mam yaa m sẽn yaa a soabã wakat fãa.+Ned pa tõe n fãag bũmb mam nugẽ ye.+
Mam sã n maand bũmbu, ãnd n tõe n gɩdg-a?”+
14 Ad a Zeova sẽn yaa yãmb Fãagdã,*+ n yaa Israyɛll Sõng soabã+ sẽn yeele:
“Yãmb yĩnga, mam na n tʋma tãb-biis Babilon tɩ b tɩ sãam a kʋɩlensã fãa,+la Kalde nebã sẽn be b koom-kogendã pʋsẽ wã na n yãba ne sũ-sãanga.+
15 Mam yaa a Zeova, yãmb Sõng soabã,+ Israyɛll Naandã+ sẽn yaa yãmb Rĩmã.”+
16 Ad a Zeova,Soab ning sẽn pãrgd sor mogrã pʋgẽ,n tukd sor baa koom sẽn gudgd pʋgẽ,+
17 la Soab ning sẽn yiisd saar* la wed-moaaga,+ne tãb-biisã la gãndaadã fãa wã sẽn yeele:
“Bãmb na n gãandame n pa yik ye.+
B na n kiis-b-la tẽma wa fɩtl laongo.”
18 “Ra tẽeg-y bũmb nins sẽn zĩnd pĩndã,la y ra tagsd sẽn loogã yell n pa basdẽ ye.
19 Ade! Mam maanda bõn-paalga.+Baa masã menga a sɩngame.*
Yãmb pa ne-a la?
Mam na n tuka sor we-raoogẽ wã+la m kɩt tɩ kʋɩls pɩʋʋg we-rasempʋɩɩgã sʋka.+
20 We-rũmsi, rat n yeel tɩ we-baasãne naneoondã na n waooga maam.Bala mam na n kɩtame tɩ koom zĩnd we-raoogẽ,la m kɩt tɩ kʋɩls zĩnd we-rasempʋɩɩgẽ,+sẽn na yɩl tɩ m nin-buiidã, mam sẽn yãk b rãmbã+ yũ.
21 Mam kɩtame tɩ bãmb lebg nin-buiid mam sẽn so,tɩ b tõe n pẽg maam m tʋʋmã yĩnga.+
22 La Zakoobe, fo pa pʋʋs* maam ye.+Bala fo yam yii maam, Israyɛlle.+
23 Fo pa wa kõ maam piis fo maand sẽn yõogd bugmã yĩnga,wall n waoog maam ne f maandã ye.
Mam pa modg foom tɩ f wa kõ-m kũuni,m pa nams-f me n kɩt tɩ f wa ne wisd sẽn yaa pɛɛlg ye.+
24 Fo pa ra raoog sẽn tar yũ-noog ne f ligd n kõ maam,la fo pa kõ maam f maandã kaam tɩ sek-m ye.+
Fo pʋd n zɩsga maam ne f yel-wẽnã,la f kɩt tɩ m yɛ ne f kongrã sẽn yaa wʋsgã.+
25 Maam, mam yaa Soab ning sẽn yẽesd fo beegrã*+ m yʋʋrã yĩnga.+Mam pa na n tẽeg f yel-wẽnã yell ye.+
26 Tẽeg maam. Wa tɩ d bʋ d yellã ne taaba.Gom n wilg tɩ f tara bʋʋm.
27 Fo pipi yaabã maana yel-wẽnde,la f koe-taasdbã* kɩɩsa maam.+
28 Rẽ n so tɩ m na n kɩt tɩ zĩ-sõngã nanambs lebg bõn-dẽgdo.Mam na n kɩtame tɩ b sãam a Zakoobe,la m kɩt tɩ b tʋ a Israyɛlle.+
Vẽnegr toor-toore
^ Bɩ, “mam lebs n daa.”
^ Bɩ, “sɩɩgã.”
^ Tõe tɩ yaa bũmb nins sẽn da na n deng n maan beoog-daarã.
^ Bɩ, “kɩs maam sɩda.”
^ Bɩ, “Soab ning sẽn lebs n da yãmbã.”
^ Yaa bũmb sẽn wõnd sarɛt tɩ wed-moos tatẽ.
^ Bɩ, “a bundame.”
^ Ebre, “bool.”
^ Bɩ, “kɩɩsgã.”
^ Tõe tɩ yaa Tõogã karen-saam-dãmb yell la b sẽn gomdã.
