Ezayi sebre 58:1-14
58 “Zẽk f koɛɛg n tãse. Ra bas ye!
Zẽk f koɛɛgã wa baorgo.
Moon n wilg m nin-buiidã b kɩɩsgã,+la f togs a Zakoob roogã rãmb b yel-wẽnã.
2 Bãmb baooda maam daar ne a to fãa,la b yetẽ tɩ b rata ne b sũur fãa n bãng m soayã,wa b yaa buud sẽn maand sẽn yaa tɩrga,la sẽn pa bas b Wẽnnaamã tɩrlem ye.+
Bãmb kota maam tɩ m kao bʋʋd tɩrga,wa b rat n pẽnega maam ne b sũur fãa+ n yetẽ yaa:
3 ‘Bõe yĩng tɩ tõnd sã n loe noor bɩ yãmb pa neẽ,+
la bõe yĩng tɩ tõnd sã n sɩbgd d mens* bɩ yãmb pa getẽ?’+
Yaa tɩ yãmb sã n loe noor daare, y baooda y mens nafa,la y weoogda y tʋm-tʋmdbã.+
4 Yãmb no-loeerã baasda ne no-koɛɛm la zaba,la y pãbda ne wẽnem nug-gila.
Yãmb pa tõe n loe noor wa y sẽn maand rũndã wã, n paam tɩ b kelg yãmb koees saasẽ ye.
5 Rẽ yĩnga, no-loeer ning m sẽn yãkã segd n yɩɩdaar ned sẽn na n sɩbg a menga,*n sulgd a zug wa mo-wogdo,n gãe bot la tompɛglem pʋgẽ sɩda?
Yãoã la yãmb boond tɩ no-loeer la raar sẽn tat a Zeova yam?
6 Ad no-loeer ning mam sẽn yãkã sẽn segd yɩ to-to:
Y segd n loka wẽnemã sẽbdse,n lok yubl-balgdgã wĩyã,+n bas tɩ b sẽn namsd b rãmbã paam lohorem,+la y kao yubl-balgdg fãa.
7 Segdame me tɩ y pʋɩ y rɩɩbã ne kom sẽn tar b rãmba,+tɩ y peeg naong soab la ned sẽn pa tar gãag zĩig n wa y zakẽ,tɩ y sã n yã ned sẽn yaa beell bɩ y kõ-a fuug t’a yelge,+la y ra wẽnemd y poor n tees y saam-biig ye.
8 Woto, yãmb vẽenemã na n yãga wa zĩ-yẽegre,+la y maagrã na n yɩɩ tao-tao.
Yãmb tɩrlmã na n kẽna y taoore,t’a Zeova ziirã be y poorẽ n gũud-y-yã.+
9 Dẽ, yãmb na n boolame, la a Zeova na n leokame.Y na n kelem n kosa sõngre, la yẽ na n leokame yaa: ‘Ad maam!’
Y sã n yãk yubl-balgdgã y sʋka,la y bas nug teesg la gom-beedo,+
10 yãmb sã n kõ kom sẽn tar a soab bũmb ning yãmb sẽn date,*+la y ges neb nins sẽn namsdã yell sõma,y vẽenemã na n yãga hal baa lik pʋgẽ,la y zĩ-sobd na n yɩɩ wa wĩnto-sʋka.+
11 A Zeova na n wilga yãmb sor wakat fãa,la a na n gesa yãmb yell baa tẽn-koɛɛngẽ.+A na n paasa y kõabã pãnga.Yãmb na n lebga wa zẽed zĩig sẽn paamd koom sõma,+la wa ko-bundg sẽn pa tol n sate.
12 B na n lebs n mee pĩnd raboodã yãmb yĩnga.+La yãmb na n lebs n manega zãmaan nins sẽn loogã raboodã yẽbgre.+
B na n boola yãmb tɩ lals sẽn sãam manegdba,+la soay nins noy b sẽn tõe n tilgã manegdba.
13 Yãmb sã n sak n pa bao y mens nafr vʋʋsg daarã sẽn yaa mam da-sõngã yĩnga,+n ges vʋʋsg daarã wa daar sẽn kõt sũ-noog wʋsgo, la daar sẽn yaa sõng a Zeova nifẽ tɩ b segd n waoog-a,+y sã n sɩd waoog-a n pa bao y mens nafr la y bas gom-vɩɩdo,
14 y na n paama sũ-noog wʋsg a Zeova yĩnga.M na n kɩtame tɩ y soog tẽngã zĩ-zãntse,+
la m kɩt tɩ y rɩ y yaab a Zakoob rogem-pʋɩɩrã yõodo.+Bala yaa a Zeova meng noor n yeele.”
