Ezayi sebre 61:1-11
61 Zu-soab sẽn ka to a Zeova vʋʋsmã bee mam zugu.+Bala a Zeova yãka* maam tɩ m taas sik-m-mens rãmbã koe-noogo.+
Yẽ tʋma maam tɩ m vil neb nins sũy sẽn sãamã noada,tɩ m togs yembsã tɩ b na n paama b mense,tɩ m togs sẽn be-b bãens roogã tɩ b nin na n puka sõma,+
2 tɩ m moon a Zeova maan-neer* yʋʋmdã,la tõnd Wẽnnaamã sũ-dokr daare.+Tɩ m bels neb nins fãa sẽn be sũ-sãang pʋgẽ wã,+
3 tɩ m ges Siyõ neb nins sẽn be sũ-sãang pʋgẽ wã yelle,tɩ m kõ-b zug-fuugu, la pa tompɛglem,kɩdeng kaam, la pa sũ-sãanga,pẽgr futu, la pa raood komsg ye.
B na n boola bãmb tɩ tɩrlem tɩ-kãsemse,tɩɩs a Zeova sẽn sel a mengã ziir yĩnga.+
4 Bãmb na n lebs n mee kʋdem-wẽndẽ raboodã.B na n yika pĩnd zĩis nins sẽn da yaa vɩɩdã,+la b lebs n maneg tẽns nins sẽn da sãamã,+zĩis b sẽn da bas vɩɩd zãmaan woo zãmaanã.+
5 “Sãamb n na n wa kɩɩm yãmb rũmsã,tɩ bu-zẽms neb+ lebg yãmb koaadba, la b ges y viyn pʋtã yelle.+
6 La yãmba, b na n boola yãmb t’a Zeova maan-kʋʋdba,+la b bool yãmb tɩ tõnd Wẽnnaamã tʋm-tʋmdba.
Yãmb na n dɩɩ buud toɛy-toɛyã paoongo,+la y na n pẽga y mens bãmb ziirã* yĩnga.
7 Yãmb pa na n paam yãnd ye. Yaa pʋɩɩr a yiib la y na n paame.B pa na n paam paoogr ye. B na n kaasa ne sũ-noog b pʋɩɩrã yĩnga.
N-ye, bãmb na n paama pʋɩɩr a yiib b soolmã pʋgẽ.+
B na n kɩdma wakat sẽn kõn sa yĩnga.+
8 Bala maam a Zeova nonga tɩrlem.+Mam kisa wagdem la kɛgre.+
Mam na n yaood-b-la ne pʋ-peelem,la m na n maana kaool sẽn paad wakat sẽn kõn sa ne bãmba.+
9 B na n bãnga b yagensã buud toɛy-toɛyã sʋka,+la b roogã rãmb nin-buiidã sʋka.
Neb nins fãa sẽn na n yã bãmbã na n bãng-b lame.B na n bãngame tɩ bãmb la yagens nins a Zeova sẽn ning barkã.”+
10 Mam na n kɩdma sũ-noog wʋsg a Zeova yĩnga.*
Mam mengã tõr na n kɩdma sũ-noog m Wẽnnaamã yĩnga.+
Bala yẽ yeelga maam fãagr futu.+Yẽ yeelga maam tɩrlem kasaabo,*wa pʋg-paal sɩd sẽn vil zu-vindg sẽn wõnd maan-kʋʋd rẽnda,+la wa pʋg-paal sẽn nags a meng ne a fan-teedo.
11 Bala a wa tẽngã sẽn kɩtd tɩ bõn-buud buli,tɩ zẽed zĩig kɩtdẽ tɩ bũmb nins b sẽn bʋd a pʋgẽ wã bundã,Zu-soab sẽn ka to a Zeova mena n kɩtame tɩ tɩrlem+ ne pẽgr bul+ buud toɛy-toɛyã fãa nifẽ.
Vẽnegr toor-toore
^ Ebre, “zaee.” Ges-y gom-biis võor bilgrã zĩigẽ.
^ Bɩ, “lohorem.”
^ Bɩ, “arzɛgsã.”
^ Ebre, “a Zeova pʋgẽ.”
^ Bɩ, “kobr sẽn yaa bãg-vɩɩdo.”
