Ezayi sebre 66:1-24
66 Ad a Zeova sẽn yeele:
“Saasã yaa mam geere, tɩ tẽngã yaa mam nao-roagendga.+
Dẽ wã, ro-bʋg la yãmb tõe n me n kõ maam,+la mam vʋʋsg zĩig bee yɛ?”+
2 A Zeova yeelame: “Yaa mam mengã nug n maan bõn-kãensã fãa,la yɩɩ woto tɩ b fãa wa beẽ.+
Dẽ wã, ad ned ning yell mam sẽn na n gese:Yaa sik-m-meng soab la sũ-sãang soab sẽn digd* mam goamã yĩnga.+
3 Ned ning sẽn kodgd loalg yaa wa ned sẽn kʋʋd ninsaala,+
tɩ sẽn kʋʋd-a pesg n maand maoong yaa wa ned sẽn kaood baag yubla.+
Ned ning sẽn kõt kũun yaa wa ned sẽn kõt kurkur zɩɩm,+
tɩ sẽn kõt-a wisd sẽn yaa pɛɛlg+ tẽegr yĩng yaa wa ned sẽn ningd bark ne zĩn-dãmb goama.*+
Bãmb tũu b mens soaya,la b* nonga bũmb sẽn yaa wẽnga.
4 Rẽ n so tɩ mam na n yãk m sẽn na n sɩbg-b to-to wã,+la mam na n kɩtame tɩ yɛl nins sẽn kẽesd bãmb rabeemã paam-ba.
Bala mam boolame, la ned pa leok ye.Mam gomame, la ned pa kelg ye.+
Bãmb kell n maana sẽn yaa wẽng mam nifẽ,la b yãka yam n na n maan bũmb nins sẽn pa noom maamã.”+
5 Yãmb a neb nins sẽn digd* mam goamã yĩngã, kelg-y-yã a Zeova gomde:
“Yãmb ba-biisã sẽn kisg yãmb la b rig yãmb mam yʋʋrã yĩngã yetame yaa: ‘Bɩ a Zeova paam pẽgre!’+
La Wẽnnaam na n vẽnega a meng n kõ yãmb sũ-noogo,la bãmb n na n paam yãnde.”+
6 Bʋrg rãamd n zẽkd tẽngã pʋgẽ, bʋrg n yit wẽnd-doogẽ wã.
Yaa a Zeova sẽn dond a bɛɛbã bũmb ning b sẽn segd ne wã rãamde.
7 Nand t’a kʋm rogem, a rogame.+
Nand tɩ rogmã toogã sɩnge, a paama bi-ribla.
8 Ãnd n zoe n wʋm tɩ b gomd bõn-kãngã yelle?
Ãnd n zoe n yã bõn-kãensã?
Rẽ yĩnga, b tõe n doga soolem raar a yembre,
wall b rog buud zĩig pʋgẽ sɩda?
Baasgo, Siyõ rogmã toog sẽn sɩngã bal t’a roga a kom-dibli wã.
9 A Zeova yeelame yaa: “Mam na bas t’a pʋgã bɩ n ta, n yaool n gɩdg a rogem?”
“Pa rẽ bɩ m na bas t’a sɩng rogem n yaool n pa bas t’a rog n baase?” Fo Wẽnnaamã n sokde.
10 Yãmb a neb nins fãa sẽn nong Zerizalɛmmã,+ naag-y-yã-a n kɩdem la y maan sũ-noogo.+
Yãmb a neb nins fãa sẽn maand sũ-sãang a poorẽ wã, naag-y-yã-a n kɩdem sũ-noog wʋsgo.
11 Bala yãmb na n yẽsma a bĩisã sẽn kõt belsgã n tɩge.Yãmb na n yũu sõma n maan sũ-noog a ziirã sẽn yaa wʋsg yĩnga.
12 Ad a Zeova sẽn yeele:
“Mam kõt-a-la laafɩ sẽn na n yɩ wa kʋɩlg koom,+la buud toɛy-toɛyã ziir wa ko-zoetem.+
B na n yẽsma yãmba, n pẽgen yãmb lʋgrẽ,la b na n tiisa yãmb rũmẽ.
13 Wa pag sẽn belsd a biigã,ma-me na n belsa yãmba.+Yãmb na n paama belsg Zerizalɛm poorẽ.+
14 Yãmb na n yãa rẽ la y na n kɩdma sũ-noogo.Y kõabã na n pida ne keelem wa mo-maasa.
A Zeova na n kɩtame t’a tʋm-tʋmdbã bãng a nugã,*la a kɩt t’a bɛɛbã bãng a sũ-puugrã.”+
15 “Bala a Zeova na n waa wa bugum,+la a saar-dãmbã* yaa wa sob-kãsenga.+A na n dola a bɛɛbã ne sũ-pu-kãsenga,la a tãs-b ne bug-witim.+
16 Bala a Zeova na n kaoo bʋʋd ne bugum.N-ye, a na n kaoo ninsaalbã* fãa bʋʋd ne sʋʋga,la neb nins a Zeova sẽn na n kʋ wã na n yɩɩ wʋsgo.”
17 A Zeova yeelame yaa: “Neb nins sẽn manegd b mens la b yɩlgd b mens sẽn na yɩl n tũ sẽn be-a tẽn-sʋkã n kẽ zẽed zĩisẽ wã,*+ b rãmb nins sẽn wãbd kurkur nemd+ ne yõens+ la bõn-dẽgd a taabã fãa na n naaga taab n ki.
18 Mam mii bãmb tʋʋmã ne b tagsa wã. Rẽ n so tɩ m wat n na n tigim buud toɛy-toɛy fãa neba, la sẽn gomd buud-goam toɛy-toɛya. Bãmb na n waame la b na n yãa mam ziirã.”
19 “Mam na n ninga bãnd bãmb sʋka. La mam na n tʋma neb kẽer sẽn põs tɩ b kẽng buud toɛy-toɛyã neb sẽn mi tãp tãoob sõma nengẽ: Yaa Tarsiis+ ne Pull la Luud.+ Mam na n tʋm-b-la Tuball ne Yavan+ la ko-sʋk tẽns sẽn zãr pʋgẽ me. Nin-kãens zɩ n wʋm tɩ b gomd mam yell wall b yã mam ziirã ye. Bãmb na n moona mam ziirã buud toɛy-toɛyã neb sʋka.”+
20 A Zeova yeelame: “Bãmb na n yiisa yãmb ba-biisã fãa buud toɛy-toɛyã pʋgẽ,+ n wa kõ a Zeova wa kũuni. B na n zombg-b-la wed-moos la saar-dãmb zutu, niis sarɛt-rãmbẽ, bõn-wees* la yʋgma sẽn tʋʋl zut n wa mam tãn-sõngẽ wã, Zerizalɛm. Na n yɩɩ wa Israyɛll nebã sẽn zãad b kũun laas sẽn yaa yɩlmã pʋsẽ, n wat a Zeova roogẽ wã.”
21 A Zeova yeelame yaa: “Mam na n yãka kẽer me tɩ b yɩ maan-kʋʋdba, la m yãk sãnda tɩ b yɩ Levi buudã neba.”
22 Bala a Zeova yeelame yaa: “Wa sa-paalsã ne tẽn-paalgã+ mam sẽn maandã sẽn na n kell n pa mam taoorã, yãmb yagensã me ne y yʋʋrã na n kell n paame.”+
23 A Zeova yeelame: “Ki-paalg ne vʋʋsg daar fãa,ninsaalbã* fãa na n wa wõgemda mam taoore.*+
24 Bãmb na n yiime n tɩ ges neb nins sẽn tõdg maamã kũ-rãmba.
Zũnzũy nins sẽn dɩt-bã pa na n ki,b bugmã me pa na n ki ye.+Bãmb na n lebga bũmb nebã fãa* sẽn kisi.”
Vẽnegr toor-toore
^ Bɩ, “maand yɩɩr.”
^ Pa rẽ bɩ, “ned sẽn pẽgd bõn-naandga.”
^ Bɩ, “b sɩɩsã.”
^ Bɩ, “maand yɩɩr.”
^ Bɩ, “pãngã.”
^ Yaa bũmb sẽn wõnd sarɛt tɩ wed-moos tatẽ.
^ Ebre, “yĩn-nemsã.”
^ Rat n yeel tɩ zẽed zĩis sẽn yaa toor zalle, tɩ b ra pʋʋsd bõn-naands be.
^ Yaa wed-moaag ne bõang biiga.
^ Bɩ, “yĩn-nemsã.”
^ Bɩ, “na n wa waooga maam.”
^ Ebre, “yĩn-nemsã fãa.”