Ezayi sebre 7:1-25
7 Zida rĩm a Akaaz+ sẽn yaa a Ozɩyas biig a Zotam biigã naam wakate, Siiri rĩm a Rezĩn ne a Remaliya biig a Peka+ sẽn yaa Israyɛll rĩmã waame n na n zab ne Zerizalɛm, la bãmb* pa tõog n deeg-a ye.+
2 B tɩ togsa a Davɩɩd roogã rãmb n yeel-b yaa: “Siiri tãb-biisã tɩ naaga Efrayim tãb-biisã.”
A Akaaz ne a nin-buiidã sẽn wʋm dẽ wã, b yɛɛsame n sɩng rigb wa sobg sẽn miimd tɩɩs weoogẽ.
3 Dẽ la a Zeova yeel a Ezayi yaa: “M kotame tɩ f peeg f bi-ribl a Seyaar-yasuub*+ tɩ y yi n tɩ seg a Akaaz yĩngr bãkã+ ko-sorã satmẽ, so-kõodr ning sẽn dabd gar-loasdã pʋʋgẽ wã noore.
4 Fo segd n tɩ yeel-a lame yaa: ‘Bas f yam. Ra zoe rabeem, la ra koms raood ra-gi-kãensã b yiibã sẽn nusd bug-zõosã, Siiri rĩm a Rezĩn ne a Remaliya+ biigã sũ-puugrã yĩng ye.
5 Bala Siiri ne Efrayim la a Remaliya biigã sedame n na n maan foo wẽnga, n yetẽ yaa:
6 “Wa-y tɩ d kẽng n tɩ zab ne Zida, n tõs-a* la d reeg-a n sooge, n kɩt t’a Tabeyɛll biigã lebg tẽngã rĩma.”+
7 “‘Ad Zu-soab sẽn ka to a Zeova sẽn yeele:
“Bõn-kãngã kõn tõoge,a kõn yɩ me.
8 Bala Siiri na-tẽngã yaa Damaase,tɩ Damaas zu-soabã yaa a Rezĩn.
Ka la yʋʋm pis-yoob la a nu bala,b na n sãama Efrayim zãng t’a pa le yaa buud ye.+
9 Efrayim na-tẽngã yaa Samari,+tɩ Samari zu-soabã yaa a Remaliya biigã.+
Yãmb sã n pa tall tẽeb sõma,y pa na n tõog n yals kãn-kãe ye.”’”
10 A Zeova kell n goma ne a Akaaz n yeel-a yaa:
11 “Kos fo Wẽnnaam a Zeova bãnde.+ Tõe n yɩɩ zulung wa Yaoogã,* wall zẽk yĩngr wa saasã.”
12 La a Akaaz yeelame yaa: “Mam pa na n kose, la m pa na n mak a Zeova me ye.”
13 T’a Ezayi yeel yaa: “A Davɩɩd roogã rãmba, kelg-y-yã! Yãmb sẽn maan tɩ ninsaalb yam yi yãmbã pa seke, tɩ y rat n maan tɩ Wẽnnaam yam yi-yã?+
14 Dẽ wã, a Zeova meng na n kõo yãmb bãnde: Ade! Pʋg-sad n na n dɩk pʋg n dog bi-ribla,+ la a na n pʋda a yʋʋr t’a Emanuwɛll.*+
15 Nand meng tɩ biigã bãng wẽng zãgsg la sẽn yaa sõma yãkre, a na n dɩɩ bĩis-kaam ne sɩɩdo.
16 Bala nand tɩ biigã bãng wẽng zãgsg la sẽn yaa sõma yãkre, rĩm-dãmb a yiibã yãmb sẽn zoetã soolem na n lebga vɩʋʋgo.+
17 A Zeova na n kɩtame tɩ foo ne f nin-buiidã la f ba wã roog rãmb yã toog wakat sẽn zɩ n zĩndi, Efrayim sẽn welg a meng ne Zida wã tɛka.+ Bala Wẽnnaam na n kɩtame tɩ Asiiri rĩmã wa.+
18 “Baraare, a Zeova na n fɩɩlame n bool zõos tɩ b yi hal Ezɩpt Nill kʋɩlgã noore, la sĩ tɩ b yi Asiiri soolmẽ wã n wa.
19 B fãa na n wa siga tãn-londẽ wã,* pĩisã pẽgsẽ, gõos tuudẽ wã, la zĩis nins fãa b sẽn yũnugd rũmsã.
20 “Baraare, a Zeova na n talla barg a sẽn yao Kʋɩlgã* soolmẽ tɩ wa, rat n yeel tɩ Asiiri rĩmã.+ Ne yẽ maasem, a na n põnga zugã, n kõog karsã kõbdo, la a põng toeemsã me.
21 “Baraare, yaa nag-sadg a ye la rao na n tõog n fãag a bãgrã pʋgẽ, la piis a yiibu.
22 La bĩismã sẽn na n yɩ wʋsgã yĩnga, b na n dɩɩ bĩis-kaam. Bala ned ning fãa sẽn na n pa soolmã pʋgẽ na n dɩɩ bĩis-kaam ne sɩɩdo.
23 “Baraare, zĩis nins fãa viyn tɩɩs tusr sẽn zem wanzuri ligd-koeems tusr sẽn da be wã, gõos tuud ne mood bal n na n zĩnd be.
24 Nebã na n kẽnga be ne tãbd la pɛɛma, bala tẽngã fãa na n lebga gõos tuud la moodo.
25 La fo pa na n le kolg tãens nins fãa b sẽn da kood ne wãkã, gõos tuudã la moodã rabeem yĩnga. Zĩ-kãens na n lebga lols wãbneg zĩiga, la zĩis piis sẽn tabde.”
Vẽnegr toor-toore
^ Pa rẽ bɩ, “yẽ.”
^ Rat n yeel tɩ “Kell bal n na n lebg n wa.”
^ Pa rẽ bɩ, “kẽes-a rabeem.”
^ Ges-y gom-biis võor bilgrã zĩigẽ.
^ Rat n yeel tɩ “Wẽnd-be-ne-do.”
^ Bɩ, “kosoodẽ wã.”
^ Rat n yeel tɩ Efrat kʋɩlgã.
