Sebr b sẽn tool a Filemo 1:1-25
1 Maam a Poll sẽn be bãens roogẽ+ Kirist Zeezi yĩngã, la d saam-biig a Tɩmote+ n gʋls seb-kãngã n tool d tʋmd-n-taag a Filemo d sẽn nong wʋsgã,
2 n paas d saam-bi-poak a Afiya, la tõnd soda-taag a Arsipe,+ ne tiging ning sẽn tigimd fo zakẽ wã:+
3 Bɩ bark* la laafɩ sẽn yit Wẽnnaam sẽn yaa tõnd Ba wã nengẽ, la Zu-soab a Zeezi Kirist nengẽ zĩnd ne yãmba.
4 Mam sã n wa pʋʋsd n gomd fo yelle, m pʋʋsda m Wẽnnaamã bark wakat fãa,+
5 bala mam wʋmda b sẽn gomd fo tẽebã yelle, la fo sẽn nong Zu-soab a Zeezi, la nin-sõamyã wã fãa to-to wã yelle.
6 Mam kota Wẽnnaam tɩ fo sẽn tar tẽeb ning tõnd fãa sẽn tarã na kɩt tɩ f bãng tɩ bõn-sõma nins fãa d sẽn tarã yaa Kirist maasem yĩnga.
7 M saam-biiga, mam sẽn wʋm fo nonglmã kibarã, m paama sũ-noog la belsg wʋsgo. Bala nin-sõamyã wã sũy paama belsg fo yĩnga.
8 Yaa rẽ n so tɩ baa mam sẽn tõe n gom ne bas-m-yam Kirist maasem yĩnga, n togs foom tɩ f maan sẽn zemsã,
9 mam dat n kosa foom bũmb nonglem yĩnga, bala maam a Poll yaa nin-kẽema, n leb n be bãens roogẽ Kirist Zeezi yĩnga.
10 Mam yõkd-f-la sɛɛg m biig a Onezɩm+ yĩnga. Mam lebga yẽ ba+ bãensã roogẽ.*
11 Yẽ ra ka yõod ne foom ye. La masã, a bee yõod ne foom, la ne ma-me.
12 Mam lebsd-a-la foom. Yẽ yaa ned m sẽn nong wʋsgo.
13 M da nongẽ lame t’a pa ne maam, n ledg foom n sõng maam sasa kãngã m sẽn be bãens roogẽ koe-noogã yĩngã.+
14 La mam ka rat n maan bũmb tɩ pa tũ ne fo raabo, sẽn na yɩl tɩ fo tʋʋm-sõngã ra yɩ ne modgre, la yɩ ne yamleoogo.+
15 Tõe meng t’a sẽn zoe n bas foom wakat bilfã,* yaa sẽn na yɩl tɩ fo paam t’a lebg n wa fo nengẽ wakat fãa yĩnga.
16 A pa le yaa fo yamb bal ye.+ A yɩɩda yamba, bala a lebga d saam-biig d sẽn nonge.+ Mam nonga yẽ wʋsgo, la fo nengẽ n segd n yɩɩda, a sẽn yaa f yamba, n leb n yaa f saam-biig Zu-soabã pʋgẽ wã yĩnga.
17 Woto yĩnga, mam sã n yaa fo zoa,* bɩ f reeg-a neer wa f sẽn da na n deeg maam to-to wã.
18 Sẽn paase, yẽ sã n da beega foom, wall a sã n tara fo samde, bɩ f rɩk n dogl maam.
19 Maam a Poll n gʋlsd seb-kãngã ne m meng nugu: M na n lebs-f lame. La fo pʋd n tara mam samd sẽn yaa fo meng vɩɩmã.
20 M saam-biiga, bɩ f sõng maam yel-kãngã pʋgẽ Zu-soabã yĩnga. Bels m sũurã Kirist yĩnga.
21 Mam kɩsa sɩd tɩ fo na n sakame. Rẽ n so tɩ mam gʋlsd foo, n miẽ tɩ f na n maaname tɩ zʋʋg m sẽn kosã.
22 La sẽn paas rẽ, m kotame tɩ f maneg gãag zĩig n bĩng maam, bala m saagdame tɩ yãmb pʋʋsgã maasem yĩnga, mam na n paama m meng n wa yãmb nengẽ.*+
23 A Epafras+ sẽn be ne maam bãensã roogẽ Kirist Zeezi yĩngã toonda foom a pʋʋsem.
24 A Mark ne a Aristark+ n paas a Demas+ la a Luk+ sẽn yaa m tʋmd-n-taasã me toonda foom b pʋʋsem.
25 Bɩ tõnd Zu-soab a Zeezi Kirist barkã* zĩnd ne yãmba, y sẽn wilgd tɩ y tara zʋg-sõma wã yĩnga.
Vẽnegr toor-toore
^ Bɩ, “lohorem d sẽn pa segd ne.”
^ Gɛrk, “balgrã pʋgẽ.”
^ Gɛrk, “lɛɛr a yembrã.”
^ Gɛrk, “pʋɩt-n-taaga.”
^ Bɩ, “b na yiis-m n kõ-yã.”
^ Bɩ, “lohorem d sẽn pa segd ne wã.”
