Habakuk sebre 1:1-17
1 Ad koɛɛg no-rɛɛs a Habakuk* sẽn wʋm vẽnegr pʋgẽ:
2 Zeova, hal n tãag wakat bʋg la m na n kelem n bool yãmb tɩ y wa sõng-ma, tɩ y pa kelgdẽ?+
Hal n tãag wakat bʋg la m na n bool yãmb tɩ y wa fãag-m ne nen-kɛglmã tɩ y pa maand bũmbu?*+
3 Bõe yĩng tɩ yãmb bas tɩ m yãt tʋʋm-wẽnse?
Bõe yĩng tɩ y bas tɩ nebã namsd taaba?
Bõe yĩng tɩ sãoong ne nen-kɛglem be m taoore?
La bõe yĩng tɩ no-koɛɛm la zab be zĩig fãa?
4 Ned baa a ye pa le tũud noyã ye.B pa le kaood bʋʋd tɩrg ye.
Bala nin-wẽnsã tõogda nin-tɩrsã.Rẽ n kɩt tɩ tɩrlem pa le beẽ ye.+
5 “Maag-y y yĩng n ges bu-zẽmsã sʋka!
Ges-y tɩ y pɛleng yɩke, tɩ kẽes-y rabeem.Bala bũmb n na n maan yãmb wakatẽ wã,tɩ baa b sã n togs yãmb bɩ y pa na n tẽ ye.+
6 Mam na n kɩtame tɩ Kalde nebãsẽn yaa nin-toos la sẽn pa zoet ned nimbãanegã wa.+
B yãmbda dũniyã tẽns wʋsgo,n deesd zĩis sẽn pa bãmb n so.+
7 B kẽesda ned rabeem, la b sek yɛɛsg me.
B lugunda b mens noy la b naam.*+
8 B wed-moosã tʋʋlem yɩɩda ãbga.Bãmb wẽnemã yɩɩda we-baas sẽn yi yʋngo.+
B wed-moosã zoetame n watẽ.B yita zĩig sẽn zãre.
B fõt n wata wa sɩlg sẽn dat n dɩk bũmbu.+
9 B fãa wata nen-kɛglem yĩnga.+
B sã n naag taab n watẽ, yaa wa yaang sobgo.+B yõgda yembs wa b sẽn kãagd bĩisri.
10 B paoogda rĩm-dãmba,la b laad nanambse.+
B pa yɛɛsd tẽng sẽn gũbg lals ye.+B zamda tãndo, n dʋ n kẽ n soog-a.
11 Rẽ poore, b fõta wa sobg n pasg tẽngã.La b na n paama taale,+bala b yetame tɩ b pãngã yita b wẽnnaamã nengẽ.”*+
12 Zeova, yãmb pa be wakat sẽn kõn sa yĩng sɩda?+
Mam Wẽnnaam sẽn yaa mam Sõng soaba, yãmb pa kiid ye.*+
Zeova, yãmb n kɩt tɩ b na n wa ne sɩbgre.Mam Pĩiga,+ yãmb yãka bãmb tɩ b na n wa ne sɩbgre.*+
13 Yãmb ninã yaa yɩlem wʋsg n pa tõe n ges sẽn yaa wẽng ye.Yãmb pa tõe n sĩnd n get wẽng ye.+
Bõe yĩng masã tɩ y bas tɩ zãmb dãmbã maand b sẽn date,+la y sĩnd n getẽ tɩ nin-wẽng tõogd ned sẽn yaa tɩrg n yɩɩd yẽnda?+
14 Bõe yĩng tɩ y kɩt tɩ nebã yaa wa mogrã zĩm,wa koomẽ bõn-vɩɩs sẽn pa tar taoor soaba?
15 B* yõgda nin-kãens fãa ne lɛooga.
B yõgd-b-la ne b zĩm-gãmbrã,la b tigsd-b b gãmbrã pʋgẽ.
Rẽ n kɩt tɩ b kɩdemd sũ-noog wʋsgo.+
16 Yaa woto yĩng n kɩt tɩ b kʋʋd maand n kõt b zĩm-gãmbrã.La b maand maoong* b gãmbrã yĩnga.Bala gãmbrã n kɩt tɩ b paamd rɩɩb sẽn yaa noogo,*rɩɩb sẽn yaa sõma.
17 B na n ket n zukda bũmb nins sẽn be b gãmbrẽ wã bɩ?*
B na n ket n kʋʋda nebã n pa zoet b nimbãaneg bɩ?+
Vẽnegr toor-toore
^ Tõe n dat n yeelame tɩ “Mobgre.”
^ Bɩ, “fãagdẽ.”
^ Bɩ, “waoogre.”
^ Pa rẽ bɩ, “b pãngã yaa b wẽnnaam.”
^ Pa rẽ bɩ, “tõnd pa na n ki ye.”
^ Bɩ, “tɩ b na n kibli.”
^ Rat n yeel tɩ Kalde nebã sẽn yaa bɛɛbã.
^ Bɩ, “maoong sẽn nusd bug-zõos.”
^ Ebre, “kaam sẽn wʋme.”
^ Pa rẽ bɩ, “ket n wõogda b sʋʋgã bɩ?”
