Habakuk sebre 2:1-20
2 Mam na n kell n yalsa m gũubã zĩigẽ.+M na n yalsa lalgã* zugu.
Mam na n gũume, n wa bãng a sẽn dat tɩ m togs bũmb ningã,la m sẽn na n leok to-to, a sã n wa zabd-ma.
2 Dẽ, a Zeova yeela maam yaa:
“Gʋls fo sẽn na n yã bũmb ningã wals zut vẽenega,+tɩ ned sã n na n zẽk a koɛɛg n karm-a bɩ a tõog n karem nana-nana.*+
3 Bala fo sẽn na n yã bũmb ningã na n pidsa a wakate.A pidsgã wakat wata tao-tao. A pa na n vaal ye.*
Baa a sã n kaoosdame,* bɩ f kell n gũ-a.*+
Bala a na n pidsame n pa vaal ye.
A na n pidsa a wakatã bal kɛpɩ.
4 Ges wuk-m-meng soaba.A pa nin-tɩrg ye.
La nin-tɩrg na n vɩɩmda a sẽn maand sɩdã* yĩnga.+
5 Sɩd-sɩda, divẽ* tõe n kɩtame tɩ ned tʋm yalemdo.Rẽ n kɩt tɩ ned ning sẽn wukd a meng pa na n tõog n pids a raabã ye.
A kɩtame t’a velemdã yaa kãseng wa Yaoogã.*A yaa wa kũum, n pa tol n tɩgd ye.
A ket n tigimda buud toɛy-toɛyã fãa,la a tigimd nebã fãa a mengã yĩnga.+
6 B fãa pa na n gomd a yell ne yel-bũndi, ne makr la ne pagd n yaand-a sɩda?+
B na n yeelame yaa:
‘Toog bee ne ned ning sẽn kãagd a sẽn pa so,la ne ned ning sẽn paasd a sam tɩ lebgd wʋsgo!Na n kaoosame n ta dabʋre?
7 Fo sam-dãmbã pa na n yik zĩig pʋgẽ sɩda?
B na n yikame n miim foo sõma,la fo na n lebga bũmb b sẽn na n zɛ.+
8 Fo sẽn zɛ buud wʋsgã yĩnga,buud a taabã sẽn ketã me na n zɛɛ foom.+Bala fo raaga neb zɩɩm,fo sãama soolem toɛy-toɛyã,n paas galʋ-tẽnsã la neb nins sẽn be b pʋsẽ wã.+
9 Toog bee ne ned ning sẽn maand zãmb a zak rãmb* nafr yĩnga,sẽn na yɩl n tɩʋ a tʋk hal yĩngri,yẽ sẽn dat n paam n põs yel-beed yĩnga!
10 Fo sẽn maan sɩlmã kɩtame tɩ fo zakã rãmb* paam yãnde.
Fo sẽn sãam buud wʋsgã yĩnga, fo* maana yel-wẽnde.+
11 Bala kugr n na n pa lalgẽ wã n kelme,tɩ sug-raoog zĩnd sug-raadã sʋk n leoke.
12 Toog bee ne ned sẽn daagd zɩɩm n met galʋ-tẽnga,la sẽn tʋmd tʋʋm-wẽns n lugund tẽnga!
13 Ges-y-yã! Buud toɛy-toɛyã sã n tʋmd wʋsg bũmb bugum sẽn na n wa rɩ yĩnga, la b tʋmd wʋsg zaalem yĩnga,+pa a Zeova sẽn yaa tãb-biis naabã n kɩt tɩ yaa woto sɩda?
14 Bala dũniyã na n pida ne neb sẽn mi a Zeova ziirã,wa mogrã sẽn pid ne koomã.+
15 Toog bee ne ned ning sũur sẽn puug wʋsgo,t’a kõt a taab rãam tɩ b yũ n dat tɩ b nens yilmi,t’a paam n ges b yãndã!
16 Fo na n paama paoogre, fo pa na n paam ziir ye.
Fo-me yũ n yees f futã zãng tɩ nebã yã tɩ f pa kẽ bãong ye.*
Wũmblã sẽn be a Zeova nug-rɩtgã na n pɩʋʋga fo taoore.+La yãnd n na n deeg fo ziirã zĩiga.
17 Bala nen-kɛglem tʋʋm nins sẽn tʋm Libã wã na n luda foo.Sãoong ning sẽn kẽes we-rũmsã rabeemã na n waa fo zugu.Bala fo raaga neb zɩɩm,fo sãama soolem toɛy-toɛyã,n paas galʋ-tẽnsã la neb nins sẽn be b pʋsẽ wã.+
18 Bõn-naandg b sẽn pees yõod yaa bõene a soab ning sẽn pees-a wã?
Bõn-naandg b sẽn dõog t’a yaa karen-saamb sẽn zãmsd ziri yõod yaa bõe,baa sẽn maan-a wã sã n teeg-a lame?A maanda wẽn-faad sẽn pa tõe n gom ye.+
19 Toog bee ne ned ning sẽn yet raoog yaa: “Neke!”
Wall sẽn yet kugr sẽn pa tõe n gomã yaa: “Yik n zãms-do!”
Gese! B bolg-a-la ne sãnem la wanzuri,+la vʋʋsem baa bilf ka be a pʋgẽ ye.+
20 La a Zeova bee a ro-sõngã pʋgẽ.+
Bɩ dũniyã nebã fãa sĩnd a taoore!’”+
Vẽnegr toor-toore
^ Bɩ, “zĩig b sẽn me tɩ tar pãngã.”
^ Bɩ, “faag-faaga.”
^ Ebre, “A pa na n yag ziri ye.”
^ Bɩ, “baa sã n wõnd a kaoosdame.”
^ Bɩ, “gũ-a ne f sũur fãa.”
^ Pa rẽ bɩ, “a tẽebã.”
^ Bɩ, “rãam.”
^ Ges-y gom-biis võor bilgrã zĩigẽ.
^ Bɩ, “buudã.”
^ Bɩ, “fo buudã.”
^ Bɩ, “fo sɩɩgã.”
^ Pa rẽ bɩ, “n lenge.”
