Mark sebre 16:1-8
-
A Zeezi vʋʋgame (1-8)
16 Dẽ, Vʋʋsg daarã+ sẽn wa n loogã, a Maari sẽn yit Magdala wã ne a Zak ma a Maari+ n paas a Salome raa kaam toor-toor sẽn tar yũ-noogo, n na n tɩ ning a Zeezi kũumã.+
2 La semennã pipi daarã* yibeoog pĩnda, wĩntoogã sẽn wa n pukdẽ wã, b kẽnga yaoogẽ wã.+
3 B ra yeta taab yaa: “Ãnda n na n bilim kugrã n lak n bas yaoogã noor n kõ tõndo?”
4 La b sẽn zẽk b nens n gese, b yãame tɩ kugrã bilmame n lak n bas yaoogã noore, baa ne kugrã sẽn da yaa bedr wʋsgã.+
5 B sẽn kẽ yaoogã pʋgẽ, b yãa bi-bɩɩg sẽn yer kasaab-pɛɛlg n zĩ rɩtgã. La b yɛɛsa wʋsgo.
6 A yeel-b lame: “Ra zoe-y rabeem ye.+ Yãmb gẽesda Nazarɛt rao a Zeezi b sẽn kʋ ra-lukã zugã. B vʋʋg-a lame.+ A pa be ka ye. Ges-y-yã! Ad zĩig ning b sẽn da gãneg-a wã.+
7 La bɩ y kẽng n tɩ togs a karen-biisã ne a Pɩyɛɛr yaa: ‘A renga yãmb taoor n dabd Galile.+ Yãmb na n yã-a-la beenẽ wa a sẽn da togs yãmbã.’”+
8 Dẽ, b sẽn yi yaoogẽ wã, b zoee ne rabeem, hal n da rigda. La b sẽn da yɛɛsdã yĩnga, b pa yeel ned baa a ye bũmb ye.*+
Vẽnegr toor-toore
^ Ges-y tẽngr vẽnegr ning sẽn be Matiye 28:1 wã.
^ Biiblã seb-kʋd nins sẽn gʋls ne nusã kẽer pʋsẽ, a Mark Evãnzillã tekda ne goam nins sẽn be vɛrse a 8 soabã pʋgẽ wã. Ges-y vẽnegr ning sẽn yaa A3.