Wiisg sebre 3:1-66
א [Aleph]
3 Yaa maam la ned ning sẽn paam namsg a sũ-puugrã dasaar yĩngã.
2 A riga maam n yiisi, la a kɩt tɩ m kẽnd lik pʋgẽ lakae, pa vẽenem pʋgẽ ye.+
3 Sɩd me, daarã tõre, a zẽkda a nug n zabd ne maam n yɩlemdẽ.+
ב [Beth]
4 A kɩtame tɩ mam yĩn-nemsã ne m gãongã faage.A kaoo mam kõabã.
5 A gũbga maam. A gũbga maam ne zẽnem sẽn yaa toog liga,+ la ne namsgo.
6 A modga maam tɩ m zĩnd lik zĩisẽ wa neb nins sẽn ki hal daar zãrã.
ג [Gimel]
7 A mee lalg n gũbg maam tɩ m pa tõe n zoe n loog ye.A sẽba maam ne zũud bãens sẽn yaa zɩsgo.+
8 Mam sã n zẽk m koɛɛg n kot sõngr ne m sũur fãa, a pa reegd mam pʋʋsgã ye.*+
9 A gɩdga mam so-bugsã ne kug b sẽn peese.A sãama mam soayã.+
ד [Daleth]
10 A wũgame n gũud maam wa urse,* wa gɩgemd sẽn solge.+
11 A modga maam tɩ m yi so-bugsã zutu, la a ta maam n tõse.A kɩtame tɩ m lebg m yembre.+
12 A yãaga* a tãpã la a kɩt tɩ mam lebg bũmb ning a sẽn na n tãoã.
ה [He]
13 A tãoo mam yiimã ne a lokã pɛɛmã.*
14 Mam lebga bũmb buud toɛy-toɛyã fãa neb sẽn laade. Daarã tõre, b yɩɩnd n yaanda maam.
15 A kɩtame tɩ mam pid ne bũmb toor-toor sẽn yaa toog liga, la a kɩt tɩ m tɩg absẽnte.*+
ו [Waw]
16 A kaooda mam yẽnã ne kuga.A kɩtame tɩ m gãe tompɛglmã pʋgẽ.+
17 Yãmb monga maam* laafɩ. Mam yĩma sõma sẽn yaa a soaba.
18 Rẽ n so tɩ mam yeele: “Mam ziirã saame. Mam pa le gũud baa fʋɩ a Zeova nengẽ ye.”
ז [Zayin]
19 Tẽeg-y mam namsgã la m sẽn pa le tar doogã yelle,+ absẽntã* ne zẽnem sẽn yaa toog liga wã yelle.+
20 Sãmbg sẽn kae, yãmb* na n tẽegame, n sulg n ges maam.+
21 Mam tẽega rẽ yelle. Yaa rẽ yĩng la mam sẽn na n maag m yĩng n gũ wã.+
ח [Heth]
22 Yaa a Zeova maan-neerã yĩng la tõnd sẽn pa sa wã.+Bala a nimbãan-zoeerã pa sat a bada.+
23 A palemda yibeoog fãa.+ Yãmb kɩs-sɩdã yaa wʋsgo.+
24 Mam yeelame yaa:* “A Zeova yaa mam pʋɩɩre.+ Yaa rẽ yĩng la mam sẽn na n maag m yĩng n gũ-a wã.”+
ט [Teth]
25 A Zeova yaa sõma ned ning sẽn tẽed-a wã yĩnga,+ rat n yeel tɩ ned* ning sẽn baood-a n pa basdẽ wã.+
26 Yaa sõma tɩ f sĩnd n gũ*+ a Zeova fãagrã.+
27 Yaa sõma tɩ ned tʋk zɩɩb sẽn yaa zɩsg a yãadem wakate.+
י [Yod]
28 Wẽnnaam sã n wa tʋkd-a zɩɩbã bɩ a zĩnd a yembre, la a sĩndi.+
29 Bɩ a ning a noorã tomẽ wã.+ Tõe tɩ saagr ket n beeme.+
30 Bɩ a wẽnemd a yɛgdgã n tees ned ning sẽn pãbd-a wã. Bɩ a paam tʋy tɩ sek-a.
כ [Kaph]
31 Bala a Zeova pa na n daag tõnd n bas wakat fãa yĩng ye.+
32 Baa a sẽn kɩt tɩ sũ-sãang wa wã, a na n zoee tõnd nimbãaneg me wa sẽn zems a maan-neerã sẽn yaa wʋsgã.+
33 Bala kɩt tɩ ninsaalbã kamb paam namsg wall sũ-sãang pa noom-a ye.+
ל [Lamed]
34 Ned sã n tab dũniyã neb nins sẽn be bãens roogẽ wã,+
35 ned sã n mong a to bʋʋm Sẽn ka-a to wã taoore,+
36 ned sã n zãmb a to bʋʋd zĩigẽ,a Zeova pa sakd bũmb a woto ye.
מ [Mem]
37 Ãnda n tõe n togs bũmb la a kɩt tɩ pidsi, tɩ sã n pa a Zeova n yeele?
38 Bõn-wẽns la bõn-sõma pa naagd taabn yi Sẽn ka-a to wã noorẽ ye.
39 Nin-vɩɩg segd n yẽgma a yel-wẽnd biis poorẽ sɩda?+
נ [Nun]
40 Bɩ d maag d yĩng n tags d manesmã zugu.+ Bɩ d lebg n leb a Zeova nengẽ.+
41 Bɩ d zẽk d sũyã n naag d nusã n tees Wẽnnaam sẽn be saasẽ wã n yeele:+
42 “Tõnd beega yãmb la d tõdg yãmba,+ tɩ yãmb pa kõ tõnd sugr ye.+
ס [Samekh]
43 Yãmb sũurã puugame tɩ y gɩdg tõnd tɩ d pa tõe n kolg yãmb ye.+Yãmb diga tõnd n kʋ n pa zoe d nimbãaneg ye.+
44 Yãmb gɩdga y sorã ne sawadgo, sẽn na yɩl tɩ d pʋʋsgã ra pasg n ta yãmb ye.+
45 Yãmb kɩtame tɩ tõnd lebg rẽgd la sagd buud toɛy-toɛyã sʋka.”
פ [Pe]
46 Tõnd bɛɛbã fãa yaaga b noy n gomd tõnd wẽnga.+
47 Wakat fãa, lebga rabeem la yel-beed n paamd tõndo,+ n paas sãoong la sabab-wẽnse.+
48 Mam nin-buiidã sãoongã yĩnga, mam nintãmã zoeta wʋsg wa kʋɩlg koom.+
ע [Ayin]
49 Mam yãbdame n pa basdẽ ye. Mam yãbdame n pa sĩndedẽ,+
50 hal t’a Zeova wa pa saasẽ n sulg n gese.+
51 Mam sã n ges bũmb ning sẽn paam mam tẽngã kom-pugli wã, mam* namsda wʋsgo.+
צ [Tsade]
52 Mam bɛɛbã riga maam wa liuul n yõk zaalem bala.
53 B sãama mam vɩɩmã bokã pʋgẽ. B kell n loba maam kuga.
54 Koom n lim mam zugã, tɩ mam yeel yaa: “M kiime!”
ק [Qoph]
55 Zeova, mam paa bokã zĩ-zulumsẽ wã n bool yãmb yʋʋrã.+
56 Kelg-y mam koɛɛgã. Ra yẽd-y y tʋbr n pa kelg mam sẽn kelemd n kot sõngrã, mam sẽn kot yolsgã ye.
57 Daar ning mam sẽn bool yãmbã, yãmb kolga maam. Yãmb yeelame: “Ra zoe rabeem ye.”
ר [Resh]
58 Zeova, yãmb sõnga maam tɩ m paam bʋʋm. Yãmb fãaga mam vɩɩmã.+
59 Zeova, yãmb yãa wẽng ning b sẽn maan maamã. M bõos tɩ y kao m bʋʋd tɩrga.+
60 Yãmb yãa b sũ-dokrã fãa, magb nins fãa b sẽn magd n na n maan maam wẽngã.
ש [Sin] wall [Shin]
61 Zeova, yãmb wʋma b tʋyã, magb nins fãa b sẽn magd n na n maan maam wẽngã,+
62 rat n yeel tɩ mam bɛɛbã no-goamã, la b sẽn walemd taab n gomd mam yell wẽng daarã tõrã.
63 Ges-y-ba. B zĩime tɩ b yasame me, b yɩɩndame n yaand maam!
ת [Taw]
64 Zeova, yãmb na n keo-b-la wa sẽn zems b tʋʋmã.
65 Yãmb na n kɩtame tɩ b sũyã riglmi. B kãab-wẽngã na n yɩɩ woto.
66 Yãmb a Zeova na n dig-b-la y sũ-puugrã pʋgẽ, n menes-b zãng y saasã tẽngre.
Vẽnegr toor-toore
^ Bɩ, “a gɩdgda mam pʋʋsgã.”
^ Yaa we-rũng sẽn tar nao a naas n yaa bedre, t’a noorã wõnd baag noore.
^ Ebre, “taba.”
^ Ebre, “kom-dibli.”
^ Absẽnt yaa tɩɩga, t’a sũmã yaa toog liga n le yaa zẽnem.
^ Bɩ, “mam sɩɩgã.”
^ Absẽnt yaa tɩɩga, t’a sũmã yaa toog liga n le yaa zẽnem.
^ Bɩ, “yãmb sɩɩgã.”
^ Bɩ, “Mam sɩɩgã yeelame yaa.”
^ Bɩ, “sɩɩg.”
^ Bɩ, “maag f yĩng n gũ.”
^ Bɩ, “mam sɩɩgã.”
