Wiisg sebre 4:1-22
א [Aleph]
4 Ad sãnem ning sẽn da pɩndã sɩd sobgame, rat n yeel tɩ sãnem halaalã!+
Kug-sõamyã+ wã sãeegame n dɩg sotiisã fãa zutu!+
ב [Beth]
2 Sã n yaa ne Siyõ kom-dibli wã b sẽn da nande, b sẽn da makd ne sãnem halaalã,*b ges-b-la wa tãnd rʋgdo,rat n yeel tɩ yagd nug tʋʋmde!
ג [Gimel]
3 Baa we-baasã meng kõta b kambã bĩisa,la mam nin-buiidã lebga nin-toose,+ wa naneoondã sẽn be we-raoogẽ wã.+
ד [Daleth]
4 Kamb nins sẽn ket n yẽsemdẽ wã zɩlma tabenda b ragsendakã ko-yũudã yĩnga.
Kambã kota rɩɩbo,*+ la ned pa kõt-b bũmb ye.+
ה [He]
5 Neb nins sẽn da minim n dɩt rɩ-noodã gãee soayã zut+ ne kom.
Neb nins sẽn sɩng n yer fu-moaam hal b yãadmẽ wã+ gãee tompɛglem dʋy zutu.
ו [Waw]
6 Mam nin-buiidã sɩbgr* yaa kãseng n yɩɩd sɩbgr ning Sodom sẽn paam a yel-wẽndã yĩnga,+b sẽn sãam-a zĩig pʋgẽ, tɩ ned pa zĩnd n sõng-a wã.+
ז [Zayin]
7 A Nazireyẽ-rãmbã*+ ra yaa yɩlem n yɩɩd sa-lamdo, la pɛɛl n yɩɩd bĩisim.
B ra yaa miid n yɩɩd koray-rãmba.* B ra pɩnda wa safɩɩr kugri.
ח [Heth]
8 B lebga sabl n yɩɩd bug-vũundu.*Nebã pa le mi-b soayã zut ye.
B gãongã kʋɩɩ b kõabã zutu.+ A lebga wa ra-koɛɛnga.
ט [Teth]
9 Neb nins b sẽn kʋ ne sʋʋsã sãoo neb nins komã sẽn kʋ wã,+rat n yeel tɩ neb nins sẽn faag b sẽn pa paam pʋtã rɩɩb n dɩ wã yĩnga, tɩ yaa wa b kõs-b-la ne sʋʋsã.
י [Yod]
10 Pagb nins sẽn yaa nimbãan-zoɛtbã rʋga b mens kamba.+
B kambã lebga b kʋʋr dɩɩbo, mam nin-buiidã sãoongã sasa.+
כ [Kaph]
11 A Zeova wilga a sũ-puugrã.A pʋdga a sũ-pu-kãsengã.+
A widga bugum Siyõ pʋgẽ, t’a rɩt a yẽbgrã.+
ל [Lamed]
12 Tẽngã rĩm-dãmbã ne neb nins fãa sẽn be tẽn-gãongã zugã ra pa tẽedtɩ zabd-n-taagã la bɛ wã na n tũu Zerizalɛm rignoyã n kẽ ye.+
מ [Mem]
13 Yɩɩ woto, a no-rɛɛsdbã yel-wẽnã ne a maan-kʋʋdbã kongrã yĩnga,+b sẽn daag nin-tɩrs zɩɩm a pʋgẽ wã.+
נ [Nun]
14 B ra yeebda soayã zut wa zoense.+
Zɩɩm n dẽgm-ba,+hal tɩ ned baa a ye pa tõe n sɩɩs b futã ye.
ס [Samekh]
15 Nebã zẽkda b koees n yet-b yaa: “Loog-y-yã! Y yaa rẽgdo! Loog-y-yã! Loog-y-yã! Ra sɩɩs-y tõnd ye!”
Bala b lebga neb sẽn pa tar doto, n saad n yeebdẽ.
Neb n yeel buud toɛy-toɛyã sʋk yaa: “B pa tõe n pa ka ne tõnd ye.*+
פ [Pe]
16 Yaa a Zeova meng* n sãeeg-ba.+A pa na n le maan-b lohorem ye.
Nebã pa na n waoog maan-kʋʋdbã,+ wall b maan kãsem-dãmbã lohorem ye.”+
ע [Ayin]
17 Hal baa masã, tõnd ninã gẽega sõngr n ya.+
Tõnd gũume n saagdẽ tɩ buud sẽn da pa tõe n fãag tõnd wa sõng-do.+
צ [Tsade]
18 D sã n da maan na-yakdem fãa b rigda tõndo,+ hal tɩ d pa tõe n kẽn d zãma wã zĩisẽ ye.
Tõnd saabã kolgame. Tõnd rayã saame, bala tõnd saabã taame.
ק [Qoph]
19 Sẽn da rigd-b tõndã tʋʋlame n yɩɩd sɩlsã sẽn yɩgd yĩngrã.+
B riga tõnd tãensã zutu. B ra wũga we-raoogẽ wã n gũud tõndo.
ר [Resh]
20 B yõka tõnd yõ-bogdã vʋʋsmã b bog-yalengã pʋgẽ,+ rat n yeel t’a Zeova sẽn yãk* a soabã,+ned ning wɛɛngẽ tõnd sẽn yeele: “Yaa yẽ maasmẽ la tõnd na n vɩɩmd buud toɛy-toɛyã sʋka.”
ש [Sin]
21 Foom a Edom bi-pugla,+ maan sũ-noog la f kɩdme, n vɩ wa f sẽn vɩ to-to Uuz soolmẽ wã.
La b na n kõo fo-me wũmblã.+ Fo na n yũume tɩ f nengã yilmi, tɩ f yees f futã n lebg a zaala.+
ת [Taw]
22 Foom a Siyõ bi-pugla, fo kongrã sɩbgr taa a tɛka.
A pa na n le tall foo n kẽng yembd ye.+
La foom a Edom bi-pugla, a na n tẽega fo kongrã yelle.
A na n vẽnega fo yel-wẽnã.+
Vẽnegr toor-toore
^ Bɩ, “sẽn da tar yõod wa sãnem halaalã.”
^ Ebre, “buri.”
^ Ebre, “kongr.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Ebre, “sablem.”
^ Bɩ, “zĩnd sãand ka ye.”
^ Ebre, “a Zeova nengã.”
^ Ebre, “zae.” Ges-y gom-biis võor bilgrã zĩigẽ.
