Zeremi sebre 35:1-19
-
Rekaab buudã neb kõo mak-sõng sakrã wɛɛngẽ (1-19)
35 A Zeova goma ne a Zeremi, a Zoziyas biig a Zowakim+ sẽn yaa Zida rĩmã wakatẽ, n yeele:
2 “Kẽng Rekaab buudã neb+ nengẽ n tɩ gom ne-ba, n tall-b n wa a Zeova roogẽ wã, rɩɩbã roog* a yembr pʋgẽ. B sã n ta be bɩ f kãab-b divẽ.”
3 Dẽ, mam peega a Habaziniya biig a Zeremi biig a Yaazaniya ne a ba-biisã, a kambã fãa, la Rekaab buudã tõre,
4 n kẽng a Zeova roogẽ wã. Mam tall-b lame n tɩ kẽ a Igdaliya biig a Hanan sẽn yaa Wẽnnaam daoã kambã rɩɩb roogẽ. Yaa roog ning sẽn da pẽ nanambsã rɩɩbã roog sẽn be rigno-gũud a Salum biig a Maaseya rɩɩbã roog zugẽ wã.
5 Rẽ poore, mam dɩgla wũmbli la ko-tees sẽn pid ne divẽ Rekaab buudã neb taoore, n yeel-b yaa: “Yũ-y divẽ wã.”
6 La b yeelame: “Tõnd pa na n yũ divẽ ye. Bala tõnd yaab a Zonadaab*+ sẽn yaa a Rekaab biigã yeela tõnd yaa: ‘Yãmb ne y kambã fãa pa segd n yũ divẽ a bada.
7 Yãmb pa segd me n me roto, n bʋd bõn-buudu, n sel viyn tɩɩse, wall y tall viyn pʋt ye. Yãmb segd n zĩnda fu-rot pʋsẽ wakat fãa, sẽn na yɩl n vɩɩmd n kaoos soolem ning pʋgẽ yãmb sẽn be n yaa sãambã.’
8 Tõnd ket n sakda d yaab a Rekaab biig a Zonadaab sẽn yeel tõnd bũmb ninsã fãa, n pa tol n yũud divẽ ye. Yaa tõnd ne d pagbã la d kom-dibli wã ne d kom-pugli wã.
9 Sẽn paase, tõnd pa met rot n na n zĩnd b pʋsẽ, d pa tar viyn pʋto, pʋt wall bõn-buud ye.
10 Tõnd bee fu-rot pʋsẽ, la d sakd bũmb nins fãa tõnd yaab a Zonadaab* sẽn yeel tõndã.
11 La Babilon rĩm a Nebukadnezaar* sẽn wa n na n zab ne soolmã,+ tõnd yeelame yaa: ‘Wa-y tɩ d kẽ Zerizalɛm, sẽn na yɩl n põs Kalde la Siiri tãb-biisã. Rẽ tɛkã, tõnd bee Zerizalɛm.’”
12 Dẽ, a Zeova goma ne a Zeremi n yeele:
13 “Ad Israyɛll Wẽnnaam a Zeova sẽn yaa tãb-biis naabã sẽn yeele: ‘Kẽng n tɩ yeel Zida la Zerizalɛm nebã yaa: “B pa sagend yãmb wakat fãa tɩ y sak mam goamã sɩda?”+ Yaa a Zeova n yeele.
14 “A Rekaab biig a Zonadaab yeela a yagensã tɩ b ra yũ divẽ ye. B tũu a goamã n pa yũ divẽ hal n tãag rũndã, sẽn na yɩl n sak b yaabã noorã.+ La mam goma ne yãmb n yɩlme,* la yãmb pa sak maam ye.+
15 Mam da tʋmda no-rɛɛsdbã sẽn yaa m tʋm-tʋmdbã fãa yãmb nengẽ. M tʋm-b-la naoor wʋsg*+ n yeele: ‘M bõos tɩ y ned kam fãa bas a manesem-wẽnsã+ la a maan sẽn yaa tɩrga! Ra tũ-y wẽnnaam-dãmb a taaba, la y waoog-b ye. Rẽ la y na n kell n zĩnd soolem ning mam sẽn kõ yãmb ne y yaab-rãmbã pʋgẽ.’+ La yãmb pa kelg ye. Y pa kɩll y tʋb n kelg maam ye.
16 A Rekaab biig a Zonadaab yagensã tũu noor ning b yaabã sẽn kõ-bã,+ la nin-kãensã pa kelg maam ye.”’”
17 “Woto wã, ad Israyɛll Wẽnnaam a Zeova sẽn yaa tãb-biis Wẽnnaamã sẽn yeele: ‘Mam na n kɩtame tɩ yel-beed nins fãa poorẽ mam sẽn da keoog Zida la Zerizalɛm nebã wa b zutu.+ Bala mam da gomda ne-ba, la b ra pa kelgd ye. Mam da boond-b lame, la b ra pa sakd ye.’”+
18 A Zeremi yeela Rekaab buudã neb yaa: “Ad Israyɛll Wẽnnaam a Zeova sẽn yaa tãb-biis naabã sẽn yeele: ‘Yãmb sẽn sak y yaab a Zonadaab noorã yĩnga, n ket n tũud a noyã fãa n maand bũmb nins a sẽn yeel yãmbã kɛpɩ wã,
19 ad Israyɛll Wẽnnaam a Zeova sẽn yaa tãb-biis naabã sẽn yeele: “A Zonadaab* yagensã sʋka, b pa na n tol n kong ned sẽn na n tʋm mam taoor ye.”’”
Vẽnegr toor-toore
^ Bɩ, “ro-pʋg.”
^ Yʋʋrã tõr yaa Zehonadaab.
^ Yʋʋrã tõr yaa Zehonadaab.
^ Ebre, “Nebukadrezaar.” Yaa yʋʋrã boolg a to.
^ Ebre, “da sãta beoog n gomda.”
^ Ebre, “da sãta beoog fãa n tʋmd-b.”
^ Yʋʋrã tõr yaa Zehonadaab.
