Zonas sebre 1:1-17
1 A Zeova goma ne a Amitayi biig a Zonas*+ n yeel yaa:
2 “Yik n kẽng Niniiv+ sẽn yaa tẽn-kãsengẽ wã, n tɩ moon bʋ-kaoor koɛɛga, bala mam yãa a nebã wẽnemã.”
3 La a Zonas yikame n na n zoe n kẽng Tarsiis n zãag ne a Zeova. A kẽnga Zope, n tɩ yã koom-koglg sẽn dabd Tarsiise. A yaoome n kẽ n na n tũ koglgã rãmb n kẽng Tarsiis n zãag ne a Zeova.
4 Dẽ, a Zeova kɩtame tɩ sob-kãseng yik mogrã zugu. Sob-kẽeng n zĩnd mogrã zugu, hal tɩ koom-koglgã rat n bõre.
5 Koom-koglgã pʋgẽ tʋm-tʋmdbã yɛɛsa wʋsgo, hal tɩ b ned kam fãa sɩng a wẽnnaam boolg n kot sõngre. B sɩngame me n lobd koglgã teed mogrã pʋgẽ, sẽn na yɩl t’a lebg faasga.+ La a Zonas ra siga koglgã tẽngr n gãand n gũs tamm.
6 Koom-koglgã yel-gɛtã kolgame n sok-a yaa: “Bõe yĩng tɩ fo gõe-yã? Yik n bool f wẽnnaamã! Tõe tɩ Wẽnnaam sɩd-sɩdã na n zoee d nimbãanega, tɩ d ra ki ye.”+
7 Rẽ poore, b goma ne taab n yeele: “Wa-y tɩ d maan bãnd+ n bãng ned ning sẽn yaa sabab tɩ yel-kãngã wa wã.” Dẽ, b maana bãnde, tɩ bãndã lʋɩ a Zonas zugu.+
8 B sok-a lame yaa: “D bõos tɩ f togs-do. Ãnda n yaa sabab tɩ yel-kãngã wa tõnd zutu? Fo tʋʋmd yaa bõe? Yɛ la fo yita? Fo yita tẽn-bʋgo? Fo yaa bu-bʋg neda?”
9 T’a leok yaa: “Mam yaa Ebre. Mam zoeta* a Zeova sẽn yaa saasẽ Wẽnnaamã, Soab ning sẽn maan mogrã la tẽn-koɛɛngã.”
10 Rẽ maneg n kẽesa rapã rabeem tɩ b sok-a yaa: “Yaa bõe la fo maan-yã?” (Rapã bãngame t’a ra zoet n na n zãaga ne a Zeova, bala a togs-b lame.)
11 Dẽ, b sok-a lame yaa: “Bõe la tõnd segd n maan foo tɩ mogrã sigi?” Bala sobgã sẽn da fugd mogrã zugã pãng ra tara paasgo.
12 T’a leok yaa: “Zẽk-y maam n lob mogrã pʋgẽ, tɩ mogrã na n sigame. Bala mam miime tɩ yaa mam yĩng la sob-kẽen-kãngã sẽn namsd yãmbã.”
13 Baasgo, rapã gaa koomã ne b pãng fãa sẽn na yɩl n tall koglgã n kẽng tẽn-koɛɛngẽ, la b pa tõog ye. Bala sobgã sẽn da fugd zĩig ning b sẽn be wã pãng ra tara paasgo.
14 Dẽ, b boola a Zeova n yeele: “Zeova, d bõos tɩ y ra bas tɩ d ki ra-kãngã yĩng* ye! Zeova, ra ning-y tõnd taal bʋʋm soab kũum* yĩng ye. Bala yãmb maana sẽn noom yãmba.”
15 Rẽ poore, b zẽka a Zonas n lob mogrã pʋgẽ, tɩ mogrã sẽn da gudgdã sigi.
16 Dẽ, a Zeova rabeem yõka rapã wʋsgo.+ B maana maoong n kõ a Zeova, la b pʋlm-a bũmb toor-toore.
17 A Zeova kɩtame tɩ zĩm-bedr wa vel a Zonase. Dẽ, a Zonas paa zĩnfã pʋgẽ rasem a tãabo, wĩndg la yʋngo.+
Vẽnegr toor-toore
^ Rat n yeel tɩ “Marwalle.”
^ Bɩ, “tũuda.”
^ Bɩ, “ra-kãngã sɩɩgã yĩng.”
^ Ebre, “zɩɩm.”
