Zonas sebre 4:1-11
4 La bõn-kãngã pa yɩ a Zonas noog baa bilf ye. Kɩtame t’a sũurã yik wʋsgo.
2 Rẽ n so t’a pʋʋs a Zeova n yeele: “Zeova, mam sẽn wa n be m tẽngẽ wã, m da miime tɩ na n yɩɩ woto! Yaa rẽ yĩng la mam sẽn deng n mak n na n zoe n kẽng Tarsiisã.+ Bala mam da miime tɩ yãmb yaa Wẽnnaam sẽn yaa sõmblem soab la nimbãan-zoɛta, sũur sẽn pa yikd tao-tao, sẽn pid ne maan-neere,+ la sũur sẽn sãamd ne yel-beedo.
3 Masã, Zeova, m bõos tɩ y reeg m vɩɩmã,* bala mam sẽn kiid n são m sẽn na n ket n vɩ.”+
4 A Zeova sokame yaa: “Fo bee bʋʋm n na n yik f sũurã woto sɩda?”
5 Dẽ, a Zonas yii tẽngã, n kẽng tẽngã yaang n tɩ zĩndi. A tii zãnd be n zĩnd a maasmẽ wã, n na n ges bũmb ning sẽn na n paam tẽngã.+
6 Wẽnnaam a Zeova kɩtame tɩ kãand yi sẽn na yɩl t’a Zonas paam maasem, la a paam yolsg a nimbãanegã pʋgẽ. A Zonas sũur yɩɩ noog wʋsg ne kãandã.
7 La vẽkembeoogã yibeoog pĩnda, Wẽnnaam kɩtame tɩ zũnzũur wa wãb kãandã t’a ki.
8 Wĩntoogã sẽn wa n zẽkdẽ wã, Wẽnnaam kɩtame me tɩ yaang sob-tʋʋlg fugi, tɩ wĩntoogã pãb a Zonas zugã t’a rat n sobge. A ra kot n na n kiime.* A ra yetame yaa: “Mam sẽn kiid n são m sẽn na n ket n vɩ.”+
9 Wẽnnaam soka a Zonas yaa: “Fo bee bʋʋm n na n yik f sũurã woto fãa kãandã yĩng sɩda?”+
T’a yeel yaa: “Mam tara bʋʋm n na n yik m sũuri. M sũurã yikame hal tɩ m dat n ki.”
10 La a Zeova yeelame: “Fo sũurã sãama kãandã poorẽ, tɩ fo yaool n pa tʋm a yĩnga, wall f kɩt t’a yi ye. A yii yʋn-yɛnga, n ki yʋn-yɛnga.
11 Woto wã, mam pa segd n zoe Niniiv sẽn yaa tẽn-kãsengã+ nimbãaneg sɩda? Yaa neb tus-koabg la pisi la zak n be a pʋgẽ n pa mi sẽn yaa sõma ne wẽng meng n bake,* n paas b rũmsã sẽn yaa wʋsgã.”+
Vẽnegr toor-toore
^ Bɩ, “sɩɩgã.”
^ Bɩ, “kotame t’a sɩɩgã ki.”
^ Bɩ, “n pa mi b nug-goabg la b nug-rɩtg n bake.”