Zoob sebre 1:1-22
1 Rao a ye n da be tẽng b sẽn boond tɩ Uuz t’a yʋʋr la a Zoob.*+ A ra yaa nin-tɩrga, n yaa burkĩna.*+ Yẽ ra zoeta Wẽnnaam, n zãagd a meng ne wẽnga.+
2 Yẽ roga kom-dibli a yopoe la kom-pugli a tãabo.
3 A ra tara piis tus a yopoe, yʋgma tus a tã, niis tusri, la bõens* kobs-nu, n paas tʋm-tʋmdb hal wʋsgo, n da lebg nin-kãseng sẽn yɩɩd a taabã yaang nebã fãa sʋka.
4 A kom-dibli wã ned kam fãa ra tara daar n maand tigr a zakẽ.* Bãmb da boonda b tãop a tãabã tɩ b wa naag-b n dɩ la b yũ.
5 B sã n da maan tig n gilg n soge, a Zoob tʋmdame tɩ b tɩ bool-b tɩ b wa t’a yɩlg-ba. Dẽ, a yikda yibeoog pĩnda, n maan maand sẽn yõogd bugum+ b ned kam fãa yĩnga. Bala a Zoob ra yetame yaa: “Tõe tɩ mam kambã beegame, n tʋʋs Wẽnnaam b sũurẽ.” Yaa woto la a Zoob ra maand wakat fãa.+
6 La daar wa n taame tɩ Wẽnnaam kom-dibli wã*+ kẽ n yals a Zeova taoore,+ la a Sʋɩtãan+ me wa n kẽ n yalsa b sʋka.+
7 Dẽ, a Zeova soka a Sʋɩtãan yaa: “Fo yii yɛ?” T’a Sʋɩtãan leok a Zeova: “M da saad n gilgda tẽngã zugu.”+
8 T’a Zeova sok-a yaa: “Fo gũus n gesa mam tʋm-tʋmd a Zoob bɩ? Ned pa be tẽngã zug n yaa wa yẽ ye. A yaa nin-tɩrga, n yaa burkĩna.*+ A zoeta Wẽnnaam, n zãagd a meng ne wẽnga.”
9 Rẽ la a Sʋɩtãan yeel a Zeova yaa: “Yaa zaalem la a Zoob sẽn zoet Wẽnnaamã la?+
10 Yãmb pa wẽ yãgr n gũbg yẽ+ ne a zakã la a sẽn so wã fãa la? Yãmb ninga a nusã tʋʋm barka,+ t’a rũmsã fɩɩg n pid tẽngã.
11 Dẽ wã, bɩ y tẽeg y nug n sɩɩs a sẽn so wã fãa n ges t’a na tʋʋs yãmb y nifẽ!”
12 Rẽ la a Zeova yeel a Sʋɩtãan yaa: “Ade! Bũmb nins fãa a sẽn so wã bee fo nugẽ. La sẽn be bala, ra sɩɩs a mengã ye!” Woto, a Sʋɩtãan yii a Zeova taoor n looge.+
13 Daar a yembre, a Zoob kom-dibli wã ne a kom-pugli wã sẽn wa n be b kẽemã yir n dɩtẽ la b yũud divẽ,+
14 a Zoob tʋm-tʋmd n wa n yeel a Zoob yaa: “Niisã ra koodame, tɩ bõensã wãbd yamd b sɛɛgẽ,
15 la Sabe-rãmbã wa n zaba ne tõndo, n deeg rũmsã, la b kʋ tʋm-tʋmdbã ne sʋʋse. Yaa maam m ye bal n põse, n wa n na n togs-yã.”
16 A sẽn wa n ket n gomdã, tʋm-tʋmd a to n wa n yeel-a yaa: “Wẽnnaam bugum* n yi saasẽ n sig n dɩ piisã ne tʋm-tʋmdbã! Yaa maam m ye bal n põse, n wa n na n togs-yã.”
17 Yẽ sẽn wa n ket n gomdã, tʋm-tʋmd a to n wa n yeel-a yaa: “Kalde nebã+ weela taab sul a tãab n wa pig yʋgma wã n yõg-ba, la b kʋ tʋm-tʋmdbã ne sʋʋse. Yaa maam m ye bal n põse, n wa n na n togs-yã.”
18 Yẽ me sẽn wa n ket n gomdã, tʋm-tʋmd a to n wa n yeel-a yaa: “Yãmb kom-dibli wã ne y kom-pugli wã ra bee b kẽemã yir n dɩtẽ la b yũud divẽ.
19 La zĩig pʋgẽ, seb-kãseng n yi we-raoogẽ wã n wa fug roogã kɩrems a naasã, tɩ roogã lʋɩ n zãb kom-bɩɩsã tɩ b ki. Yaa maam m ye bal n põse, n wa n na n togs-yã.”
20 Dẽ, a Zoob yikame n pãrs a futã la a wõrs a zoobdã. Rẽ poore, a lʋɩɩ tẽng n wõgemde,
21 n yeel yaa:
“Mam yii m ma wã pʋgẽ beelle,la yaa beell la m na n lebe.+
Yaa a Zeova n kõ,+ la a Zeova n le reege.
Bɩ a Zeova yʋʋrã kell n paam pẽgre.”
22 La bõn-kãensã fãa pʋgẽ, a Zoob pa beege, la a pa yeel me tɩ Wẽnnaam maana sẽn pa zems ye.
Vẽnegr toor-toore
^ Tõe n dat n yeelame tɩ “b sẽn kisg a soabã.”
^ Bɩ, “ned sẽn pa tar taale.”
^ Ebre, “bõn-yãans.”
^ Bɩ, “n maand tigr ned kam fãa zakẽ n deesd taaba.”
^ Yaa Ebre wã gomd sẽn dat n yeel tɩ Wẽnnaam malɛgsã.
^ Bɩ, “ned sẽn pa tar taale.”
^ Pa rẽ bɩ, “Sa-yãgb.”
