Zoob sebre 2:1-13
2 Rẽ poore, daar wa n taame tɩ Wẽnnaam kom-dibli wã*+ kẽ n yals a Zeova taoore,+ la a Sʋɩtãan me kẽe bãmb sʋka, n yals a Zeova taoore.+
2 Dẽ, a Zeova soka a Sʋɩtãan yaa: “Fo yii yɛ?” T’a Sʋɩtãan leok a Zeova: “M da saad n gilgda tẽngã zugu.”+
3 T’a Zeova sok-a yaa: “Fo gũus n gesa mam tʋm-tʋmd a Zoob bɩ? Ned ka be tẽngã zug n yaa wa yẽ ye. A yaa nin-tɩrga, n yaa burkĩna.*+ A zoeta Wẽnnaam, n zãagd a meng ne wẽnga. A ket n yasa a burkĩndã pʋgẽ n pa vigsdẽ,+ baa fo sẽn dat tɩ mam sãam-a*+ zaalmã.”
4 La a Sʋɩtãan yeela a Zeova yaa: “Gãongo, gãong yĩnga. Ninsaal na n sak n kõo bũmb nins fãa a sẽn tarã a vɩɩmã yĩnga.
5 Dẽ wã, bɩ y tẽeg y nug n sɩɩs a kõabã ne a yĩn-nemsã n ges t’a na tʋʋs yãmb y nifẽ!”+
6 Rẽ la a Zeova yeel a Sʋɩtãan yaa: “Ade! A bee fo nugẽ. La sẽn be bala, ra yãk a yõorã* ye.
7 Woto, a Sʋɩtãan yii a Zeova taoor n tɩ lob a Zoob nod-tãoodse,*+ sẽn sɩng ne a na-sɩlpamã n tãag a zugã tẽn-sʋka.
8 La a Zoob rɩka sa-pɛɛg n zagemd a yĩngã, n zĩ tompɛglem pʋgẽ.+
9 A pagã wa n baas n yeel-a lame yaa: “Fo ket n gãda f burkĩndã kãn-kãe la? Tʋʋs Wẽnnaam la f ki!”
10 La yẽ yeel-a lame yaa: “Fo gomda wa pʋg-yalma. Yaa sẽn yaa sõma bal la d segd n deeg Wẽnnaam nengẽ la? D pa segd n sak n deeg sẽn pa sõma wã me sɩda?+ La bõn-kãensã fãa pʋgẽ, a Zoob pa beeg ne a no-bɩmsã ye.+
11 A Zoob zo-rãmb* a tãab n wʋm yel-beed nins sẽn paam-a wã, tɩ b ned kam fãa yi a tẽngẽ n wa. Yaa Teman rao a Elifaaze,+ Suwa+ rao a Bildaad+ n paas Naama rao a Sofaare.+ Bãmb zemsa taab n na n seg taab n tɩ kʋm a Zoob la b bels-a.
12 B sẽn pa yɩɩg n yã-a wã, b pa bãng-a ye. B zẽka b koees n sɩng yãbre, la b pãrs b futã, n wʋk tom n lob yĩngr tɩ sudg b zutã.+
13 Dẽ, bãmb zĩnda tẽng ne-a rasem a yopoe, wĩntoog ne yʋngo. La b ned baa a ye pa yaag a noor n yeel-a tɩ bũmb ye. Bala b yãame t’a toogã yaa kãsenga.+
Vẽnegr toor-toore
^ Yaa Ebre wã gomd sẽn dat n yeel tɩ Wẽnnaam malɛgsã.
^ Bɩ, “ned sẽn pa tar taale.”
^ Ebre, “vel-a.”
^ Bɩ, “sɩɩgã.”
^ Bɩ, “nod-kɛgemse.”
^ Bɩ, “mitins.”
